സി എന്‍ ബാലകൃഷ്ണന് പുറത്താവും? അനൂപ്‌ ജേക്കബില്‍ നിന്നും ഭക്ഷ്യം പൊക്കും?
സഹകരണമന്ത്രി സി എന്‍ ബാലകൃഷ്‌ണനെ മന്ത്രിസഭാ പുന:സംഘടനയില്‍ മന്ത്രി സ്ഥാനത്ത്‌ നിന്നും ഒഴിവാക്കാനും മന്ത്രി അനൂപ്‌ ജേക്കബില്‍ നിന്നും ഭക്ഷ്യ വകുപ്പ്‌ എടുത്ത്‌ മാറ്റാനും മുഖ്യമന്ത്രി ഉമ്മന്‍ചാണ്ടി തീരുമാനിച്ചു. സുധീരനെ ഒഴിവാക്കി ഉമ്മന്‍ചാണ്ടി ഡല്‍ഹിയിലെത്തി മന്ത്രിസഭാ പുന:സംഘടനാ ചര്‍ച്ച നടത്തുകയാണ്‌. അതേ സമയം വി എം സുധീരന്, കെ മുരളീധരന്‍, രമേശ് ചെന്നിത്തല, എന്നിവര്‍ക്ക്‌ പുന:സംഘടനയോട്‌ താല്‌പര്യമില്ല. അനൂപ്‌ ജേക്കബിന്റെ ഭക്ഷ്യ വകുപ്പ്‌ സര്ക്കാരിന് ചീത്തപ്പേരുണ്ടാക്കുന്നുവെന്ന തോന്നല്‍ നേരത്തെ മുതല്‍ ഉമ്മന്‍ചാണ്ടിക്കുണ്ട്‌. ഇതിനിടെ അനൂപിനെതിരെ ധാരാളം ആരോപണങ്ങളും ഉയര്‍ന്നിരുന്നു. സ്വന്തം പാര്‍ട്ടിയില്‍ നിന്ന് തന്നെ ആരോപണം ഉയര്‍ന്നതിനെ തുടര്‍ന്ന്‌ അനൂപ്‌ ധര്‍മ്മ സങ്കടത്തിലുമായിരുന്നു. ചുരുങ്ങിയ കാലം കൊണ്ട്‌ ഏറ്റവുമധികം വിജിലന്‍സ്‌ കേസുകള്‍ നേരിടേണ്ടി വന്ന മന്ത്രി എന്ന റെക്കോഡും അനൂപില്‍ വന്നു ചേര്‍ന്നു.
സി എന്‍ ബാലകൃഷ്‌ണന്റെ പ്രവര്‍ത്തനം നിര്‍ജ്ജീവമാണെന്ന അഭിപ്രായമാണ്‌ ഉമ്മന്‍ചാണ്ടിക്കുള്ളത്‌. സഹകരണ വകുപ്പ്‌ അശക്തമാണെന്ന വാദവും ശക്തമാണ്‌. സഹകരണവകുപ്പില്‍ നടക്കുന്നത്‌ ഉദ്യോഗസ്ഥ ഭരണമാണെന്നും ആരോപണം ഉയര്‍ന്നു. സി എന്‍ ബാലകൃഷ്ണന് കാര്യങ്ങളെ ശരിയായ ദിശയില്‍ നയിക്കാനാകുന്നില്ലെന്ന ആക്ഷേപവും ശക്തമാണ്‌. രമേശ് ചെന്നിത്തലയുടെ നോമിനിയാണ്‌ സി എന്‍ . അദ്ദേഹത്തെ മാറ്റണമെന്ന നിര്‍ദ്ദേശം ഉമ്മന്‍ചാണ്ടി മുന്നോട്ടു വച്ചാല്‍ രമേശ് എതിര്‍ക്കാനിടയില്ല. സി എന്‍ നിലവാരം പുലര്‍ത്തുന്നില്ലെന്ന ആക്ഷേപം രമേശിനുമുണ്ട്‌.
അതേസമയം ഗണേശിനു വേണ്ടിയാണ്‌ സി എന്‍ ബാലകൃഷ്‌ണനെ മാറ്റുന്നതെന്ന ആക്ഷേപം രമേശ് അംഗീകരിക്കാനിടയില്ല. ഗണേശിനെ മന്ത്രിസഭയില്‍ കൊണ്ടു വരുന്നത്‌ ഉമ്മന്‍ചാണ്ടിയുടെ താല്‌പര്യം സംരക്ഷിക്കാന്‍ വേണ്ടി മാത്രമാണെന്ന്‌ ഐ ഗ്രൂപ്പ്‌ വിശ്വസിക്കുന്നു. സരിതാനായര്‍ക്ക്‌ നേരെയാണ്‌ ഐ ഗ്രൂപ്പ്‌ വിരല്‍ ചൂണ്ടുന്നത്‌. സരിതയുടെ ആരോപണങ്ങളില്‍ നിന്നും എ ഗ്രൂപ്പിലെ പ്രമുഖ നേതാക്കളെ രക്ഷിച്ചത്‌ ഗണേശനാണെന്ന്‌ ഉമ്മന്‍ചാണ്ടിക്കറിയാം. മുഖ്യമന്ത്രിയുടെ ഓഫീസുമായുളള ബന്ധം സരിത തുറന്നു പറഞ്ഞിരുന്നെങ്കില്‍ മുഖ്യമന്ത്രി പ്രതിസന്ധിയിലായേനെ.
വി എം സുധീരനും ഗണേശനോട്‌ താല്‌പര്യമില്ല. എന്‍ എസ് എസ് നേതൃത്വത്തോട്‌ സുധീരനുള്ള വിരോധവും ഇതിന്‌ പിന്നിലുണ്ട്‌. ആര്‍ ബാലകൃഷ്‌ണ പിള്ള എന്‍ എസ് എസിന്റെ പ്രമുഖ നേതാവാണ്‌. മാത്രവുമല്ല സരിതാ വിഷയത്തില്‍ ആരോപണത്തിന്റെ നിഴലില്‍ നില്‍ക്കുന്ന ഗണേശനെ മന്ത്രിസഭയിലേക്ക്‌ വലിച്ചു കയറ്റിയാല്‍ അത് മന്ത്രിസഭയ്‌ക്ക്‌ തട്ടു കേടുണ്ടാക്കുമെന്നും സുധീരന് വിശ്വസിക്കുന്നു. അതേസമയം നിര്‍ജീവരായ അനൂപിന്റേയും ബാലകൃഷ്‌ണന്റേയും വകുപ്പുകള്‍ മാറ്റുന്നതില്‍ സുധീരന് വിയോജിപ്പില്ല.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
