സുധീരന്‍ അയഞ്ഞു; ഹൈക്കോടതി മറയായി 200 ബാറുകള്‍ ഉടന്‍
സുധീരന്‍ ഒഴിച്ചുള്ള ഭരണപക്ഷവും അച്യുതാനന്ദന്‍ ഉള്‍പ്പെടെയുള്ള പ്രതിപക്ഷവും ഒത്തുകളിച്ചതിന്റെ ഫലമായി ഇരുന്നൂറോളം ബാറുകള്‍ തുറക്കുന്നു. നിലവാരമില്ലാത്തതിന്റെ പേരില്‍ പൂട്ടിയ 418 ബാറുകളില്‍ നിന്നാണ്‌ 200 എണ്ണം തുറക്കുന്നത്‌. നിലവാരം ഉയര്‍ത്തിയ ബാറുകളാണ്‌ തുറക്കാന്‍ പോകുന്നത്‌. ഹൈക്കോടതി ഉത്തരവ്‌ മറയാക്കിയാണ്‌ ബാര്‍ തുറക്കാന്‍ സര്‍ക്കാര്‍ തീരുമാനിച്ചിരിക്കുന്നത്‌. ഒരു മാസത്തിനകം ബാര്‍ ലൈസന്‍സ്‌ പുതുക്കുന്ന കാര്യത്തില്‍ തീരുമാനമെടുക്കണമെന്ന്‌ ഹൈക്കോടതി സര്ക്കാരിന് നിര്‍ദ്ദേശം നല്‍കിയിരുന്നു,
ബാര്‍ തുറക്കുന്നതിന്‌ സര്‍ക്കാര്‍ ഒരു വിദഗ്‌ധ സമിതിയെ നിയോഗിക്കും. അവരുടെ നിര്‍ദ്ദേശത്തിന്റെ അടിസ്ഥാനത്തിലായിരിക്കും നിലവാരം ഉയര്‍ത്തിയ ബാറുകള്‍ തുറക്കുക. നിലവാരം എന്നാല്‍ എന്താണെന്ന്‌ വ്യക്തമാക്കിയിട്ടില്ല. ചില ബാറുകളില്‍ ടൈലുകള്‍ പതിക്കാനും മറ്റും ആരംഭിച്ചിട്ടുണ്ട്‌. ഭൗതിക സാഹചര്യങ്ങള്‍ ഉയര്‍ത്തുകയാണ്‌ ലക്ഷ്യം. നിലവാരം ഭൗതികസൗഹചര്യമാണെങ്കില്‍ പൂട്ടിക്കിടക്കാന്‍ സാധ്യതയുള്ള ബാക്കി ബാറുകളും ഉടന്‍ തുറക്കും. ഇതിനിടെ ബാര്‍ പ്രശ്‌നത്തില്‍ കര്‍ക്കശ നിലപാട്‌ തുടരരുതെന്ന്‌ അഭ്യുദയകാംക്ഷികള്‍ സുധീരനോട്‌ ആവശ്യപ്പെട്ടിട്ടുണ്ട്‌. മുസ്ലീംലീഗ്‌ സുധീരനൊപ്പമാണെങ്കില്‍ കേരള കോണ്‍ഗ്രസ്‌ എം നിലവാരമുള്ള ബാറുകള്‍ തുറക്കണമെന്ന അഭിപ്രായക്കാരാണ്‌.
ബാറുകള്‍ പൂട്ടിയതോടെ ഇരുപതിനായിരത്തിലധികം പേരുടെ ജോലി നഷ്‌ടപ്പെട്ടു. പകുതി ബാറുകള്‍ തുറന്നാല്‍ അത്രയും പേര്‍ക്ക്‌ തൊഴില്‍ കിട്ടുമെന്നാണ്‌ പ്രതീക്ഷ. തൊഴില്‍ നഷ്‌ടം സര്‍ക്കാരിന്റെ ഇമേജ്‌ കുറയ്‌ക്കുമെന്നും അഭിപ്രായമുണ്ട്‌. ഇതൊക്കെക്കൊണ്ടാണ്‌ സുധീരന്‍ തന്റെ നിലപാടില്‍ അയവുവരുത്താന്‍ തീരുമാനിച്ചത്‌. അതേസമയം സുധീരന്റെ നിലപാടാണ്‌ ശരിയെന്ന്‌ ലീഗ്‌ നേതൃത്വം ആവര്‍ത്തിക്കുന്നു. ക്രിസ്‌തീയ സഭകളും സുധീരനൊപ്പമാണ്‌ നിലകൊള്ളുന്നത്‌. എന്നാല്‍ ആദര്‍ശം പറഞ്ഞിരുന്നാല്‍ വയറു വീര്‍ക്കില്ലെന്നാണ്‌ ഒദ്യോഗികപക്ഷത്തിന്റെ നിലപാട്‌.
ഭരണപക്ഷവും പ്രതിപക്ഷവും തമ്മില്‍ ഇക്കാര്യത്തില്‍ ആശയവിനിമയം നടത്തിയിട്ടുണ്ട്‌. ബാര്‍ തൊഴിലാളികള്‍ക്ക്‌ തൊഴില്‍ നഷ്‌ടപ്പെടുന്നതോടെ ഇവരരുടെ കുടുംബങ്ങള്‍ സര്‍ക്കാരിനെതിരാകും. ബാര്‍ തൊഴിലാളികള്‍ ഇടതുപക്ഷ രാഷ്‌ട്രീയ പ്രവര്‍ത്തകരാണ്‌. ഒരു ചെറിയ ശതമാനം കോണ്‍ഗ്രസ്‌ പ്രവര്‍ത്തകരുണ്ട്‌. എന്നാല്‍ യു ഡി എഫ്‌ സര്‍ക്കാര്‍ തങ്ങളുടെ തൊഴില്‍ കളഞ്ഞെന്ന പരാതി കേള്‍ക്കാന്‍ സര്‍ക്കാര്‍ തയ്യാറല്ല.
അതേസമയം ബാര്‍ തുറക്കാനുള്ള തീരുമാനത്തിനു പിന്നില്‍ ഇത്തരം രാഷ്‌ട്രീയ പരിഗണനകള്‍ മാത്രമല്ല ഉള്ളത്‌. കോടിക്കണക്കിന്‌ രൂപയാണ്‌ ബാര്‍ തുറക്കാന്‍ സര്‍ക്കാര്‍ തലത്തില്‍ മറിഞ്ഞത്‌. രാഷ്‌ട്രീയ ഭേദമന്യേ എല്ലാവരും പണം വാങ്ങിയിട്ടുണ്ട്‌. ഇതാണു സാഹചര്യമെന്നിരിക്കെ സുധീരന്‍ മാത്രം സമരം ചെയ്‌തിട്ടെന്തു പ്രയോജനം?
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
