ഗണേശിനെ മന്ത്രിയാക്കാന് ഉമ്മന്ചാണ്ടി സുകുമാരന് നായരെ രംഗത്തിറക്കും
ഉമ്മന് ചാണ്ടിക്കും വിഎം സുധീരനുമെതിരെ രമേശ് ചെന്നിത്തല ഡല്ഹിയില് പരിദേവനങ്ങളുടെ കെട്ടഴിക്കും. ഉമ്മന് ചാണ്ടിക്കും സുധീരനുമിടയില് അസ്ഥിത്വം നഷ്ടപ്പെട്ടതിന്റെ വേദനയായിരിക്കും രമേശ് ഹൈക്കമാന്ഡിന്റെ മുമ്പാകെ സമര്പ്പിക്കുക. കേരള രാഷ്ട്രീയത്തില് തനിക്കുള്ള പ്രസക്തി നഷ്ടപ്പെട്ടതായ തോന്നല് രമേശിനുണ്ട്. ഇതിനോടുള്ള വിരോധം ഏറെ നാളായി അദ്ദേഹം കൊണ്ടു നടക്കുകയായിരുന്നു.
രമേശ് ആഭ്യന്തര മന്ത്രിയായതോടെ കെപിസിസിക്ക് അനഭിമതനായി. ഇന്നലെവരെ പാര്ട്ടിയെ നിയന്ത്രിച്ചയാളിന് പണ്ട് കെ. മുരളീധരന് സംഭവിച്ചതിന് സമാനമായ സംഭവ വികാസങ്ങളാണ് ഉണ്ടായത്. കെ മുരളീധരന് മന്ത്രിസഭയിലും പരാജയപ്പെട്ടു. രമേശിന് അതുണ്ടായില്ല. സ്വതസിദ്ധമായ കഴിവോടെ അദ്ദേഹം ആഭ്യന്തര വകുപ്പിലെ പ്രവര്ത്തനം തിളക്കമുള്ളതാക്കി.
രമേശിന്റെ ഡല്ഹിയിലെ പിടി അയഞ്ഞിരിക്കുകയാണ്. രമേശ് മന്ത്രിയാകുന്നതിനോട് രാഹുലിനും സോണിയയ്ക്കും താത്പര്യമുണ്ടായിരുന്നില്ല. ഹിന്ദിയും ഇംഗ്ലീഷും നന്നായി കൈകാര്യം ചെയ്യുന്ന രമേശ് പാര്ട്ടി നേതൃത്വത്തിലുണ്ടാവുന്നതിനോടായിരുന്നു സോണിയയ്ക്ക് താത്പര്യം. എന്നാല് ആഭ്യന്തരമന്ത്രിയായാലേ അടങ്ങൂ എന്ന രമേശിന്റെ വാശിക്ക് മുമ്പില് ഹൈക്കമാന്ഡ് അടിയറവ് പറയുകയായിരുന്നു.
തന്നോട് ആലോചിക്കാതെ മന്ത്രിസഭാ പുനസംഘടനെ കുറിച്ച് തീരുമാനിച്ച ഉമ്മന് ചാണ്ടിക്കെതിരേയാണ് രമേശിന്റെ നീക്കം. മന്ത്രിസഭ പുനസംഘടിക്കുകയാണെങ്കില് സിഎന് ബാലകൃഷ്ണനേയോ വിഎസ് ശിവകുമാറിനേയോ ബലി കൊടുക്കേണ്ടി വരും. രണ്ടിനോടും രമേശിന് താത്പര്യമില്ല. രമേശാണ് അവസാനം മന്ത്രിസഭയിലേക്ക് വന്നത്. അത് ഗണേശിന്റെ ഒഴിവിലായിരുന്നു. ഗണേശിന്റെ ഒഴിവില് രമേശ് വരുമ്പോള് ഗണേശിന് വീണ്ടും മന്ത്രിയാവണമെങ്കില് രമേശോ അദ്ദേഹത്തിന്റെ സഹപ്രവര്ത്തകരോ ഒഴിഞ്ഞുകൊടുക്കണം. കെസി ജോസഫ് ഒഴിഞ്ഞുകൊടുക്കാമെന്ന് പറഞ്ഞെങ്കിലും ഉമ്മന് ചാണ്ടി സമ്മതിച്ചില്ല. ഗണേശിന്റെ ഭാരം രമേശ് അനുഭവിക്കട്ടെ എന്നാണ് ഉമ്മന്ചാണ്ടിയുടെ നിലപാട്.
അതേസമയം ഗണേശിനെ മന്ത്രിസഭയിലേക്ക് മടക്കിക്കൊണ്ടുവരാന് തന്നെയാണ് ഉമ്മന് ചാണ്ടിക്ക് താത്പര്യം. ഗണേശിന്റെ മടങ്ങി വരവുമായി പ്രശ്നങ്ങള് ഉണ്ടെങ്കിലും അദ്ദേഹം മികച്ച മന്ത്രിയാണെന്നാണ് ഉമ്മന്ചാണ്ടിയുടെ പക്ഷം. ഗണേഷിനെ മന്ത്രിയാക്കുന്ന കാര്യത്തില് എന്എസ്എസ് ഇടപെടുമെന്നറിയുന്നു. ആര് ബാലകൃഷ്ണ പിള്ള എന്എസ്എസിന്റെ സമുന്നത നേതാവുമാണ്. അദ്ദേഹത്തിന്റെ പ്രതിസന്ധിയില് എന്എസ്എസ് സഹായിക്കാനുണ്ടാകും. ഗണേശിനെ മന്ത്രിയാക്കുന്ന കാര്യത്തില് ജി. സുകുമാരന് നായരെ ഇടപെടുവിക്കാനാണ് ഉമ്മന് ചാണ്ടിയുടെ തീരുമാനം. സുകുമാരന് നായര് പറഞ്ഞാല് രമേശിന് അനുസരിക്കേണ്ടി വരും. ഗണേശിന്റെ കാര്യം തന്ത്രപൂര്വം കൈകാര്യം ചെയ്യാനാണ് ഉമ്മന് ചാണ്ടിയുടെ തീരുമാനം. അതേസമയം ഹൈക്കമാന്ഡ് രമേശിന്റെ അഭിപ്രായത്തോട് പ്രതികരിക്കാന് സാധ്യതയില്ലെന്നാണ് അറിയുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
