വിഐപികളുടെ പിടലിക്ക്‌ പിടി വീഴുന്നു; കഞ്ഞിയും കറിയും വയ്‌ക്കാന്‍ ഇനി ഹോംഗാര്‍ഡ്‌!
മുഖ്യമന്ത്രിമാര്‍ക്കും മന്ത്രിമാര്‍ക്കും അതുപോലുള്ള തന്ത്രപ്രധാന സ്ഥാനങ്ങളിലിരിക്കുന്നവര്‍ക്കൊഴിച്ച്‌ സെക്യൂരിറ്റി ആവശ്യപ്പെടുന്ന വിഐപികള്‍ക്ക്‌ ഹോംഗാര്‍ഡ്‌ മാതൃകയില്‍ ഉദ്യോഗസ്ഥരെ സെക്യൂരിറ്റി ഗാര്‍ഡുമാരായി നല്‍കാന്‍ സര്‍ക്കാര്‍ ആലോചിക്കുന്നു. സര്‍വീസില്‍ നിന്നും വിരമിച്ച മിലിറ്ററി, പോലീസ് ഉദ്യോഗസ്ഥരെയാണ്‌ ഹോംഗാര്‍ഡുമാരായി നിയമിക്കാറുള്ളത്‌. സ്വകാര്യ സെക്യൂരിറ്റി ഏജന്‍സികളെ വിഐപി സെക്യൂരിറ്റിക്ക്‌ നിയമിക്കാനും ആലോചനയുണ്ട്‌. സെക്യൂരിറ്റി റിവ്യൂ കമ്മറ്റിയുടേതാണ്‌ തീരുമാനം.
1980 ല്‍ വിരമിച്ച ജഡ്‌ജിമാര്‍ക്കുപോലും പോലീസ് സെക്യൂരിറ്റി നല്‍കുന്നുണ്ടെന്നാണ്‌ റിവ്യൂകമ്മറ്റിയുടെ കണ്ടെത്തല്‍. ഇത്തരത്തില്‍ 700 ലധികം പോലീസുകാര്‍ വിരമിച്ച പോലീസ് ഉദ്യോഗസ്ഥര്‍ക്കും വിരമിച്ച ജഡ്‌ജിമാര്‍ക്കും സംരക്ഷണം നല്‍കുന്നുണ്ട്‌. ഇവര്‍ സംരക്ഷണം മാത്രമല്ല, സംരക്ഷണം നല്‍കുന്നയാളിന്റെ വീട്ടുജോലിയും ചെയ്യേണ്ടിവരുന്നു. സംസ്ഥാനത്ത്‌ കടുത്ത പോലീസ് ക്ഷാമം നേരിടുമ്പോഴാണ്‌ വിഐപികള്‍ക്കു വേണ്ടി ഇത്രയധികം സെക്യൂരിറ്റികളെ നിയമിക്കുന്നത്‌. 55,000ലധികം പോലീസുകാരാണ്‌ സേനയിലുള്ളത്‌. സുരക്ഷാ ഭീഷണി ഉയര്‍ത്തുന്ന ഒരു മിസ്‌ഡ്‌ കോള്‍ വന്നാല്‍ പോലും ചിലര്‍ക്ക്‌ പോലീസ് സംരക്ഷണം നല്‍കാറുണ്ട്‌.
സെക്യൂരിറ്റി റിവ്യൂ കമ്മിറ്റിയുടെ യോഗത്തില്‍ പരിദേവനങ്ങളുടെ ഭാണ്‌ഡക്കെട്ടാണ്‌ തുറന്നത്‌. കേസന്വേഷണം നടത്താനും ക്രമസമാധാനം ഉറപ്പു വരുത്താനും പോലീസുകാരെ കിട്ടാതിരിക്കുമ്പോള്‍ വിരമിച്ച ഉദ്യോഗസ്ഥരുടെ വീടു പണി ചെയ്യാന്‍ പോലീസുകാര്‍ നിയോഗിക്കപ്പെടുന്നത്‌ നിര്‍ഭാഗ്യകരമാണെന്ന്‌ സെക്യൂരിറ്റി റിവ്യൂ കമ്മിറ്റി അഭിപ്രായപ്പെട്ടു. കമ്മിറ്റിയുടെ അനുമതിയില്ലാതെ പോലീസ് സംരക്ഷണം നല്‍കുന്നതും കമ്മിറ്റിയുടെ വിമര്‍ശനത്തിന്‌ വിധേയമായി. സര്‍ക്കാര്‍ അനുമതിയില്ലാതെ പോലീസ് സംരക്ഷണം നല്‍കുന്നവരുടെ വിശദവിവരങ്ങള്‍ ഒരാഴ്‌ചയ്‌ക്കുള്ളില്‍ സമര്‍പ്പിക്കാന്‍ കമ്മിറ്റി സംസ്ഥാന പോലീസ് മേധാവിക്ക്‌ നിര്‍ദ്ദേശം നല്‍കിയിട്ടുണ്ട്‌.
മൂന്നുവര്‍ഷത്തിലൊരിക്കല്‍ സെക്യൂരിറ്റി ജീവനക്കാരെ മാറ്റണമെന്നും സര്‍ക്കാര്‍ നിര്‍ദ്ദേശമുണ്ട്‌. സെക്യൂരിറ്റി ജോലിയിലുള്ള മുഴുവന്‍ ജീവനക്കാരുടെയും വിശദാംശങ്ങള്‍ ശേഖരിക്കാന്‍ പോലീസ് ആസ്ഥാനത്ത്‌ നടപടി തുടങ്ങി. സെക്യൂരിറ്റി ഉദ്യോഗസ്ഥര്‍ സംരക്ഷണം നല്‍കപ്പെടുന്നയാളിന്റെ സ്വന്തക്കാരനാകുന്നതോടെ പ്രശ്‌നങ്ങള്‍ ഉടലെടുക്കുന്നുവെന്നാണ്‌ സര്‍ക്കാരിന്റെ കണ്ടെത്തല്‍.
ഇതിന്‌ പരിഹാരമായാണ്‌ സെക്യൂരിറ്റി ചുമതലയിലുള്ള പോലീസുകാരെ ഒഴിക്കാന്‍ സര്‍ക്കാര്‍ ആലോചിക്കുന്നത്‌. സ്വകാര്യ സ്ഥാപനങ്ങളില്‍ നിന്നും വാടകയ്‌ക്ക്‌ എടുക്കാനോ ഹോംഗാര്‍ഡുമാരെ നിയമിക്കാനോ ഉള്ള പദ്ധതി പിടിവീഴുന്ന വിഐപികള്‍ അനുവദിക്കുമോ എന്ന്‌ കണ്ടറിയാം!
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
