ജയിലില്‍ വാങ്ങുന്നത്‌ 40 ലക്ഷത്തിന്റെ ബീഡി!
തടവുകാരുടെ പുകവലിക്ക്‌ അവസാനമായി. ഇനി ഉദ്യോഗസ്ഥരുടെ പുകവലി മാത്രം അവസാനിപ്പിച്ചാല്‍ മതി. ജയിലിനുള്ളില്‍ പുകവലിയും മദ്യപാനവും വര്‍ദ്ധിക്കുകയാണെന്ന പരാതികള്‍ വര്‍ദ്ധിച്ചപ്പോഴാണ്‌ പുകവലി അവസാനിപ്പിക്കാന്‍ ജയില്‍ ഡി ജി പി തീരുമാനിച്ചത്‌. പുകവലി അവസാനിപ്പിക്കാന്‍ ശാരീരിക ബുദ്ധിമുട്ടുള്ളവര്‍ക്ക്‌ ജയിലിനുള്ളില്‍ ചികിത്സ നല്‍കാനും സെന്‍കുമാര്‍ തീരുമാനിച്ചു. പൊതു സ്ഥലത്തെ പുകവലി നിരോധിച്ചു കൊണ്ടുള്ള സുപ്രീംകോടതി വിധിയുടെ അടിസ്ഥാനത്തിലാണ്‌ ജയിലിനുള്ളില്‍ പുകവലി നിരോധിക്കാന്‍ സെന്‍കുമാര്‍ സര്‍ക്കുലര്‍ ഇറക്കിയത്‌. ഒരു മാസം കൊണ്ട്‌ തടവുകാരുടെ പുകവലി നിര്‍ത്തിക്കാനാണ്‌ തീരുമാനം.
കണ്ണൂര്‍ സെന്‍ട്രല്‍ ജയിലില്‍ ഒരു വര്‍ഷം 40 ലക്ഷം രൂപയുടെ സിഗററ്റും ബീഡിയമാണ്‌ വാങ്ങുന്നത്‌. ഇത് ദേശീയ മനുഷ്യാവകാശ കമ്മീഷന്റെ വിമര്‍ശനത്തിന്‌ കാരണമായിരുന്നു.
ജയിലിനുള്ളില്‍ പുകവലി നിരോധിക്കാന്‍ തീരുമാനിച്ചു കഴിഞ്ഞതായി തെക്കന്‍മേഖല ഡി ഐ ജി ശിവദാസ്‌ കെ തൈപറമ്പില്‍ പറഞ്ഞു.ജയിലിനുള്ളില്‍ മാനസിക സമ്മര്‍ദ്ദം കുറയ്‌ക്കാന്‍ പുകവലി വേണമെന്ന തടവുകാരുടെ ആവശ്യം അംഗീകരിക്കാന്‍ തയ്യാറല്ല. ഇത് പരിഹാരമല്ല എന്നാണ്‌ ശിവദാസ്‌ തൈപറമ്പിലിന്റെ അഭിപ്രായം.
ജയിലുകളില്‍ ബീഡിയും സിഗററ്റും വാങ്ങുന്നത്‌ അവസാനിപ്പിക്കാനും ജയില്‍ അധികൃതര്‍ തീരുമാനിച്ചു. ജൂലൈ 17ന്‌ നടപടി പാടേ അവസാനിപ്പിക്കണമെന്ന്‌ ജയില്‍ ഉദ്യോഗസ്ഥര്‍ പറഞ്ഞു. പുകവലി കാരണമുണ്ടാകുന്ന ദോഷങ്ങള്‍ വര്‍ദ്ധിക്കുന്ന പശ്ചാത്തലത്തിലായിരുന്നു നടപടി. എന്നാല്‍ ടി പി കേസിലുള്ള പ്രതികള്‍ പുകവലിയും മദ്യപാനവും പതിവാക്കിയ പശ്ചാത്തലത്തിലായിരുന്നു സെന്‍കുമാര്‍ പുകവലിയും മദ്യപാനവും ജയിലില്‍ നിരോധിക്കാന്‍ തീരുമാനിച്ചത്‌. ഇക്കാര്യം ആവശ്യപ്പെട്ട്‌ സെന്‍കുമാര്‍ സര്‍ക്കാരിനെ സമീപിച്ചെങ്കിലും സര്‍ക്കാര്‍ നടപടിയൊന്നും സ്വീകരിച്ചില്ല. തുടര്‍ന്നാണ്‌ തീരുമാനം നടപ്പാക്കാന്‍ സെന്‍കുമാര്‍ സ്വയം തീരുമാനിച്ചത്‌.
സെന്‍കുമാറിന്റെ നിര്‍ദ്ദേശം തടവുകാര്‍ ഒഴിച്ച്‌ മറ്റുള്ളവര്‍ സ്വാഗതം ചെയ്‌തിട്ടുണ്ട്‌. തടവുകാര്‍ പുകവലി നിര്‍ത്തിയാലും ഉദ്യോഗസ്ഥര്‍ ജയിലിനുളളില്‍ തന്നെ പുകവലിയും മദ്യപാനവും പതിവാക്കിയിട്ടുണ്ട്‌. ചില ഉദ്യോഗസ്ഥര്‍ ഇതിനായി തടവുകാരെ കൂട്ടുപിടിക്കാറുമുണ്ട്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
