പൂട്ടിയ ബാറുകള്‍ തുറക്കാന്‍ എക്‌സൈസ്‌ മന്ത്രി കെ. ബാബു വാശിപിടിക്കുന്നതെന്തിന്‌? ബാബുവിന്റെ ആവേശം അട്ടിമറിക്കാന്‍ കെ.പി.സി.സി അധ്യക്ഷന്‍ വി.എം സുധീരന്‍ ശ്രമിക്കുന്നതെന്തിന്‌?
രണ്ടിനും പിന്നിലുള്ള രഹസ്യം ഇതാ മലയാളി വാര്‍ത്ത പുറത്തു വിടുന്നു. സാക്ഷാല്‍ വെള്ളാപ്പള്ളി നടേശന്‍ !
നടേശാനുഗ്രഹമാണ്‌ ബാബുവിനെയും ഉമ്മന്‍ചാണ്ടിയെയും മുന്നോട്ടു നയിക്കുന്നത്‌. സുധീരനാകട്ടെ വെള്ളാപ്പള്ളി നടേശന്റെ ഒന്നാം നമ്പര്‍ ശത്രുവും. നടേശന്‍ മുതലാളിയുടെ നിര്‍ബന്ധമാണ്‌ ബാര്‍ തുറപ്പിക്കലിന്‌ പിന്നിലെന്ന്‌ ബാബു മുതിര്‍ന്ന കോണ്‍ഗ്രസ്‌ നേതാക്കളെ അറിയിച്ചെങ്കിലും സുധീരന്‍ ഒരു വിട്ടു വീഴ്‌ചയ്‌ക്കും തയ്യാറല്ല. എന്തു സംഭവിച്ചാലും ബാര്‍ തുറക്കാന്‍ അനുവദിക്കില്ലെന്നു തന്നെയാണ്‌ സുധീരന്റെ നിലപാട്‌.
ചുരുക്കത്തില്‍ ബാര്‍ വിവാദം കൊഴുത്തതോടെ കെ. ബാബു മദ്യകച്ചവടക്കാരുടെ വക്താവായി മുദ്രകുത്തപ്പെട്ടിരിക്കുന്നു. മദ്യവില്‌പനക്കാര്‍ ബാബുവിനെ കാണേണ്ട രീതിയില്‍ കണ്ടതായും ആരോപണങ്ങള്‍ ഉയരുന്നു. സോഷ്യല്‍ മീഡിയയില്‍ ബാബു ഒന്നാന്തരം ഒരു ബാര്‍മാനായി . സുധീരന്റെ ഫേസ്‌ബുക്കില്‍ ലൈക്കുകളുടെ എണ്ണം കൂടുന്നു. മദ്യത്തിനെതിരെ പ്രചാരണം നടത്തിയ മന്ത്രി കെ ബാബു മദ്യത്തിനു വേണ്ടി പ്രചരണം തുടങ്ങിയത്‌ അദ്ദേഹത്തിനെ അറിയുന്നവരെയെല്ലാം ഞെട്ടിച്ചുകളഞ്ഞു. ബാറുകള്‍ പൂട്ടിയ ശേഷം മദ്യവില്‌പന കുറഞ്ഞെന്ന്‌ സുധീരനും കൂടിയെന്ന്‌ ബാബുവും കണക്കുകള്‍ ഉദ്ധരിച്ചു പറയുന്നു.
ബിവറേജസ്‌ കോര്‍പ്പറേഷന്‍ കള്ളം പറയുന്നുവെന്നാണ്‌ ബാബുവിന്റെ ഓഫീസ്‌ പറയുന്നത്‌. അതേസമയം കോര്‍പ്പറേഷന്റെ കണക്കുകള്‍ ഉദ്ധരിച്ചാണ്‌ മദ്യഉപയോഗം കുറഞ്ഞതിന്റെ സത്യാവസ്ഥ ചില ചാനലുകള്‍ പുറത്തു വിട്ടത്‌. മദ്യ വിരുദ്ധ സമിതി പിന്നീട്‌ ഇതിന്റെ പിതൃത്വം ഏറ്റെടുക്കുകയും വന്‍ വിവാദം ഉണ്ടാവുകയും ചെയ്‌തു. അപ്പോഴും ബാര്‍ അടച്ചിട്ടും മദ്യവില്‌പന കൂടിയതായാണ്‌ ബാബു വാദിയായത്‌. തന്റെ സുഹൃത്തുക്കളായ കോണ്‍ഗ്രസുകാര്‍ വികാരപരമായാണ്‌ സംസാരിക്കുന്നതെന്ന്‌ നിയമസഭയില്‍ പറയാനും മന്ത്രി മറന്നില്ല. ബീവറേജസ്‌ കോര്‍പ്പറേഷന്‍ തങ്ങളുടെ വെബ്‌സൈറ്റില്‍ പ്രസിദ്ധീകരിച്ചത്‌ കള്ള കണക്കാണെങ്കില്‍ ബന്ധപ്പെട്ട ഉദ്യോഗസ്ഥനെ സസ്‌പെന്റ്‌ ചെയ്യേണ്ടതല്ലേ എന്നാണ്‌ ബാബു വിരുദ്ധ പക്ഷത്തിന്റെ ആവശ്യം.
വെള്ളാപ്പള്ളിയാണ്‌ ബാബുവിന്റെ പിന്നിലെന്ന്‌ എല്ലാവര്‍ക്കും അറിയാമെങ്കിലും അക്കാര്യം ആരും മിണ്ടുന്നില്ല. വെള്ളാപ്പള്ളിയെ സഹായിക്കാന്‍ ചില മന്ത്രിമാര്‍ക്ക്‌ താത്‌പര്യമുണ്ടെങ്കിലും സഹായിച്ചാല്‍ നാറും എന്ന സാഹചര്യമാണുള്ളത്‌. ഉമ്മന്‍ചാണ്ടി തന്റെ നിസഹായത നടേശനെ അറിയിച്ചിട്ടുണ്ട്‌. സുധീരനെതിരെ ഹൈക്കമാന്റ്‌ ലോകമാന്റ്‌ ആയതോടെ സംസ്ഥാനത്തേക്ക്‌ നേതൃത്വത്തില്‍ നിന്നും നിര്‍ദ്ദേശങ്ങളൊന്നും വരുന്നില്ല. ആകെയുള്ള ആന്റണി കേരളത്തിലെത്തി സുധീരനെ കെട്ടിപിടിച്ചതോടെ ഡല്‍ഹിയില്‍ എന്തെങ്കിലും സംഭവിക്കുമെന്ന പ്രതീക്ഷയും കോണ്‍ഗ്രസ്‌ നേതാക്കള്‍ക്ക്‌ അസ്‌തമിച്ചു.
പാര്‍ട്ടിയും സര്‍ക്കാരും തമ്മിലുള്ള വാക്‌പോര്‍ മുറുകുമ്പോള്‍ മന്ത്രി ബാബു നിസഹായനാവുകയാണ്‌. ഉമ്മന്‍ചാണ്ടിയാകട്ടെ സുധീരനെയും ആന്റണിയെയും പിണക്കാതെ മുന്നോട്ടു പോകുന്നു. ഒടുവില്‍ ബാബു രക്തസാക്ഷിയാകാനാണ്‌ സാധ്യത.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha