വിദേശ സഹായം കേരളത്തിലെ സമരങ്ങള്ക്കും; പിടി വീഴും, ഉടന്!
കേരളത്തില് പ്രവര്ത്തിക്കുന്ന ചില സര്ക്കാര് ഇതര സംഘടനകള്ക്ക് ഉടന് പിടി വീഴുന്നേക്കും. ആറന്മുള, കൂടംകുളം തുടങ്ങിയ പദ്ധതികള്ക്കെതിരെ പ്രവര്ത്തിക്കുന്ന സംഘടനകളെ പിടികൂടാനാണ് നരേന്ദ്രമോദി തീരുമാനിച്ചിരിക്കുന്നത്. ചില വിദേശരാജ്യങ്ങള് ഇവരെ കൈയയച്ച് സഹായിക്കുന്നു എന്നാണ് ഐ.ബിയുടെ കണ്ടെത്തല്. ഇത്തരം ആരോപണങ്ങള് മുമ്പും ഉണ്ടായിട്ടുണ്ട്. എന്നാല് പണം വരവ് തെളിയിക്കാനാവാത്ത സാഹചര്യത്തില് ഇവര്ക്കെതിരെ നടപടി സ്വീകരിക്കാനായില്ല. സര്ക്കാര് ഇതര സംഘടനകളെ നിയന്ത്രിക്കണമെന്ന ആവശ്യം കഴിഞ്ഞ സര്ക്കാരിന്റെ കാലത്ത് തന്നെ ഉയര്ന്നിരുന്നു. എന്നാല് യുപിഎ സര്ക്കാര് അസ്ഥിരമായതു കാരണം ആര്ക്കുമെതിരെ നടപടിയെടുക്കാന് കഴിഞ്ഞിരുന്നില്ല. നരേന്ദ്രമോദി ശക്തനായി സര്ക്കാരിലെത്തിയതോടെ സര്ക്കാര് ഇതര സംഘടനകളുടെ ചിറകരിയാന് തീരുമാനിച്ചു.
സര്ക്കാര് ഇതര സംഘടനകള് വികസനത്തെ എതിര്ക്കുന്നു എന്നാണ് പ്രധാന പരാതി. വികസനത്തെ എതിര്ക്കുന്നത് വിദേശ സഹായം കിട്ടിയതു കൊണ്ടാണെന്നും സര്ക്കാര് വാദിക്കുന്നു. കേന്ദ്ര രഹസ്യാന്വേഷണ ഏജന്സിയുടെ റിപ്പോര്ട്ട് ഇപ്പോള് പ്രധാനമന്ത്രിയുടെ പരിഗണനയിലാണ് ഉള്ളത്. പരിസ്ഥിതിയുടെ പേരിലാണ് തട്ടിപ്പുകള് കൂടുതലായി നടക്കുന്നതെന്നും കേന്ദ്ര സര്ക്കാര് ആരോപിക്കുന്നു. തിരുവനന്തപുരം ജില്ലയിലെ മുക്കുന്നിമലയില് അനധികൃത ക്വാറികള്ക്കെതിരെ ജനകീയ പ്രക്ഷോഭം നടന്നു വരികയാണ്. സിപിഎമ്മും കോണ്ഗ്രസും ബിജെപിയും ഉള്പ്പെടെയുള്ള രാഷ്ട്രീയ കക്ഷികള് മുക്കുന്നിമല പ്രക്ഷോഭത്തിന് എതിരാണ്. അതേസമയം എസ്.ഡി.പി.ഐ പ്രക്ഷോഭത്തിന് അനുകൂലമായി രംഗത്തെത്തിയിട്ടുണ്ട്. ഇവിടത്തെ സമരത്തിന് ഒരു സര്ക്കാര് ഇതര സംഘടനകളും ഇതുവരെ പിന്തുണ നല്കിയിട്ടില്ല. എന്നാലും മുക്കുന്നിമല സമരം അട്ടിമറിക്കാനുള്ള നീക്കങ്ങള് അണിയറയില് സജീവമായി കഴിഞ്ഞു. ക്വാറിമാഫിയകള്ക്ക് കേരളത്തിനകത്തും പുറത്തുമുള്ള ബന്ധങ്ങളാണ് കാരണം. ഡല്ഹിയിലും ഇവരുടെ കരങ്ങള് ശക്തമാണ്. മുക്കുന്നിമല സമരത്തെ വിദേശരാജ്യങ്ങളിലെ അനധികൃത സംഭാവനകളുമായി കൂട്ടിയോജിപ്പിക്കാന് ശ്രമങ്ങള് ആരംഭിച്ചു കഴിഞ്ഞു.
കാത്തലിക് ഓര്ഗനൈസേഷന് ഫോര് ഡവലപ്മെന്റ്, ഗ്രീന്പീസ്, ആംനസ്മി ഇന്റര്നാഷണല് തുടങ്ങിയ സംഘടനകളാണ് വിദേശ ഫണ്ട് ഇന്ത്യയിലേക്ക് ഒഴുക്കുന്നതെന്നാണ് കേന്ദ്ര ഇന്റലിജന്സ് ഏജന്സിയുടെ കണ്ടെത്തല്. തമിഴ്നാട്ടിലെ കൂടംകുളം സമരത്തിന് മുമ്പില് നില്ക്കുന്നവര്ക്ക് അമേരിക്കയിലെ ഒരു സര്വകലാശാലയില് നിന്നും സഹായം ലഭിക്കുന്നതിനായി കേന്ദ്ര ഇന്റലിജന്സ് ഏജന്സി കണ്ടെത്തിയിട്ടുണ്ട്. ഇതു തെളിയിക്കാന് കൂടംകുളം സമരനായകന് എസ്.പി.ഉദയകുമാര് വെല്ലുവിളിച്ചെങ്കിലും ഇന്റലിജന്സുകാര് പ്രതികരിച്ചില്ല. ഇതിനര്ത്ഥം ഉദയകുമാറിന്റെ വെല്ലുവിളി ഏറ്റെടുക്കാന് സര്ക്കാര് തയ്യാറല്ലെന്നാണ്.
റിപ്പോര്ട്ടിന്റെ പകര്പ്പ് കേരള സര്ക്കാരിന് കൈമാറി കഴിഞ്ഞു. ഇതില് കേരളത്തില് പ്രവര്ത്തിക്കുകയും വിദേശസഹായം ലഭിക്കുകയും ചെയ്യുന്ന സര്ക്കാര് ഇതര സംഘടനകളുടെ ലിസ്റ്റുണ്ട്. ഇതനുസരിച്ച് നടപടിയെടുക്കാനാണ് കേന്ദ്ര സര്ക്കാര് നിര്ദ്ദേശിച്ചിരിക്കുന്നത്. ഇത്തരമൊരു റിപ്പോര്ട്ടിനായി കാത്തിരിക്കുകയായിരുന്നു കേരള സര്ക്കാര്. അതായത് ചിലര്ക്ക് ഉടന് പിടിവീഴുമെന്ന് ചുരുക്കം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
