അന്നം അനൂപിന് അന്യമാവും പകരം കാര്ത്തികേയന് ?
സ്പീക്കര് സ്ഥാനം രാജിവെയ്ക്കുന്ന ജി കാര്ത്തികേയന് ഭക്ഷ്യ-സിവില് സപ്ലൈസ് വകുപ്പ് നല്കുന്ന കാര്യത്തില് കോണ്ഗ്രസില് തത്വത്തില് ധാരണ. നേരത്തേയും ഭക്ഷ്യമന്ത്രിയായിരുന്നു കാര്ത്തികേയന്. അന്ന് അദ്ദേഹം മാതൃകാപരമായ പ്രവര്ത്തനമാണ് കാഴ്ചവച്ചത്. അനൂപ് ജേക്കബ് സിവില് സപ്ലൈസ് വകുപ്പിനെ കുട്ടിച്ചോറാക്കി എന്നാണ് കോണ്ഗ്രസിലുണ്ടായിരിക്കുന്ന പൊതുവികാരം. ഇതിനിടെ ആരോപണങ്ങള്ക്ക് ആക്കം കൂട്ടി ഭക്ഷ്യധാന്യങ്ങളുടെ കള്ളക്കച്ചവടം സംസ്ഥാനത്ത് പൊടിപൊടിക്കുന്നതിന്റെ വാര്ത്ത ഒരു ദൃശ്യമാധ്യമം തെളിവുസഹിതം പുറത്തുവിട്ടു.
സ്പീക്കര് സ്ഥാനത്ത് നിന്നും രാജിവയ്ക്കാനുള്ള തീരുമാനം പുറത്തുവന്നയുടനെ ഭക്ഷ്യവകുപ്പ് തങ്ങളില് നിന്നും മാറ്റരുതെന്ന പ്രസ്താവനയുമായി കേരളകോണ്ഗ്രസ് -ജേക്കബ് നേതാവ് ജോണിനെല്ലൂര് രംഗത്തു വന്നിരുന്നു. അഴിമതിയുടെ പേരില് ജോണി നെല്ലൂര് അനൂപിനേയും തിരിച്ചും വിഷമവൃത്തത്തിലാക്കിയിരുന്നു. അനൂപിന്റെ ഭരണം തുടരരുതെന്ന അഭിപ്രായക്കാരാണ് മന്ത്രിസഭയിലെ ബഹുഭൂരിപക്ഷവും. അനൂപന്റെ കഴിവില്ലായ്മയെക്കാള് കൂടുതല് പകലില് നടക്കുന്ന അഴിമതിയാണ് മന്ത്രിയുടെ സഹപ്രവര്ത്തകര് ചൂണ്ടിക്കാണിക്കുന്നത്. അഴിമതി നിയന്ത്രിക്കാന് മന്ത്രിക്കാവുന്നില്ലെന്നും അദ്ദേഹത്തിന്റെ പാര്ട്ടിയില് ചിലര്ക്ക് റേഷന് കരിഞ്ചന്തയുമായി ബന്ധമുണ്ടെന്നും കോണ്ഗ്രസ് ആരോപിക്കുന്നു.
അതേസമയം അനൂപില് നിന്നും ഭക്ഷ്യവകുപ്പ് എടുത്തുമാറ്റാന് അനുവദിക്കില്ലെന്നാണ് പാര്ട്ടിയുടെ നിലപാട്. എന്നാല് മികവു തെളിയിക്കാനാകാത്ത ഒരു വകുപ്പ് തനിക്ക് വേണ്ടെന്നാണ് അനൂപിന്റെ അഭിപ്രായമെന്നും അറിയുന്നു. തന്റെ പ്രായത്തിനും പക്വതയ്ക്കും ചേരുന്ന ഒരു ചെറിയ വകുപ്പാണ് മന്ത്രി അനൂപ് ജേക്കബ് പ്രതീക്ഷിക്കുന്നത്.
മന്ത്രി നിശബ്ദനായതോടെ അദ്ദേഹത്തിന്റെ വകുപ്പില് ഉദ്യോഗസ്ഥരുടെ ഗൂഢസംഘങ്ങളും പ്രവര്ത്തനം സജീവമാക്കിയിട്ടുണ്ട്. മന്ത്രിയോ സെക്രട്ടറിയോ അറിയാതെയാണ് അഴിമതി പൊടിപൊടിക്കുന്നത്. മന്ത്രിയാകട്ടെ ഒന്നിനും നിയന്ത്രണമില്ലാത്ത അവസ്ഥയിലുമാണ്. മന്ത്രിക്ക് വകുപ്പില് വേണ്ടത്ര പിടുത്തമില്ലെന്ന ആരോപണവും ഇതിനിടെ ശക്തമായിട്ടുണ്ട്.
വകുപ്പ് മാറ്റുന്ന കാര്യം ഉമ്മന്ചാണ്ടിയും അനൂപും അനൗപചാരികമായി സംസാരിച്ചിട്ടുണ്ടെന്നാണ് അറിയുന്നത്. റ്റി എം ജേക്കബിനെപ്പോലെ പ്രഗല്ഭനായ ഒരാള് കൈകാര്യം ചെയ്തിരുന്ന വകുപ്പ് ഒരിക്കലും മോശമാകാന് പാടില്ലെന്ന അഭിപ്രായമാണ് ഉമ്മന്ചാണ്ടിക്കുള്ളത്. കാര്ത്തികേയനെപ്പോലെ സീനിയറായ ഒരാള്ക്ക് ഭക്ഷ്യവകുപ്പ് നന്നായി ഭരിക്കാനാകുമെന്നും മുഖ്യമന്ത്രി അനൂപിനെ ഉപദേശിച്ചത്രേ. ഇതിന് അനൂപ് എന്തു മറുപടി നല്കിയെന്ന് സൂചനയില്ല.
ഏതായാലും മറ്റേതെങ്കിലും മന്ത്രിയുടെ കൈവശം ഇരിക്കുന്ന ഒരു ചെറിയ വകുപ്പ് അനൂപിന് നല്കും. പകരം ഭക്ഷ്യ-സിവില് സപ്ലൈസ് കാര്ത്തികേയനും. പകരം വകുപ്പ് ഏറ്റെടുക്കാന് അനൂപ് തയ്യാറാകാതിരുന്നാല് അനൂപിന് മന്ത്രിസ്ഥാനം ലഭിക്കില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
