തഴുതാമ ഔഷധയോഗ്യമായ ഒരു സസ്യമാണ്. ഈ സസ്യം വെളുത്തതും ചുവന്നതുമായി രണ്ട് തരത്തിലുണ്ട്. പുനര്‍നവ എന്നപേരിലും തഴുതാമ അറിയപ്പെടുന്നു. ഇന്ത്യയിലെ ഏതു കാലാവസ്ഥയിലും തഴച്ചു വളരുന്ന സസ്യം എന്ന പ്രത്യേകതയും തഴുതാമയ്ക്കുണ്ട്. ആമവാതത്തിന് ഏറ്റവും നല്ല ഔഷധങ്ങളില്‍ ഒന്നാണ് തഴുതാമ.

തഴുതാമയുടെ വേര്, കച്ചോലം, ചുക്ക് എന്നിവ സമാസമം എടുത്ത് കഷായമായി രാവിലെയും വൈകുന്നേരവും 25 മില്ലി ലിറ്റര്‍ വീതം ഏഴു ദിവസം തുടര്‍ച്ചയായി കഴിച്ചാല്‍ ആമവാതം ശമിക്കും.തഴുതാമയുടെ ഇല കൊണ്ടുള്ള തോരന്‍ സ്ഥിരമായി ഭക്ഷണത്തിലുള്‍പ്പെടുത്തുന്നതും ഫലം നല്‍കും.പൊട്ടാസ്യം നൈട്രേറ്റ് ധാരാളം അടങ്ങിയിട്ടുള്ളതാണ് തഴുതാമ. വെള്ളത്തില്‍ തഴുതാമയുടെ ഇല ചേര്‍ത്ത് തിളപ്പിച്ച് കുടിച്ചാല്‍ മൂത്ര തടസ്സം ഒഴിവായിക്കിട്ടും. പ്രാണികള്‍ കടിച്ചുണ്ടാകുന്ന നീര്, വിഷം എന്നവിയ്ക്കും തഴുതാമ നല്ലതാണ്.

തഴുതാമ വേര്, എരുത്തില്‍ വേര്, കടുക്കമൂലി വേര്. മഞ്ഞള്‍, വയമ്പ് ഇവ സമാസം ചേര്‍ത്ത് ഗോമൂത്രത്തില്‍ ചാലിച്ച് നീരുള്ള ഭാഗത്ത് പുരട്ടിയാല്‍ നീര് വറ്റും. വെളുത്ത തഴുതാമ ഇടിച്ചു പിഴിഞ്ഞെടുത്ത നീര് മുലപ്പാലില്‍ ചേര്‍ത്ത് കണ്ണിലൊഴിച്ചാല്‍ കണ്ണിലെ ചൊറിച്ചില്‍ ശമിക്കും. കഫ സംബന്ധമായ പ്രശ്‌നങ്ങള്‍ക്ക് തഴുതാമ വേരും വയമ്പും ചേര്‍ത്ത് സേവിക്കുന്നത് നല്ലതാണ്. വെളുത്ത തഴുതാമ കഷായമാക്കി എള്ളെണ്ണയില്‍ ചേര്‍ത്ത് കാച്ചി തേച്ചാല്‍ വാത രക്തത്തിന് ശമനമുണ്ടാകും.

തഴുതാമ സമൂലം അരച്ച് കുഴമ്പു രൂപത്തിലാക്കി ആറുഗ്രാം വരെ എടുത്ത് രാവിലെയും വൈകുന്നേരവും കഴിച്ചാല്‍ കൃമി കീടങ്ങള്‍ കൊണ്ട് ശരീരത്തിലേറ്റ വിഷാംശം നശിക്കും. അമിതമായി മദ്യം കഴിച്ചുണ്ടാകുന്ന ക്ഷീണം, തലകറക്കം തുടങ്ങിയവയ്ക്ക് തഴുതാമ ഗുണകരമാണ്. തഴുതാമ കഷായമായി അതേ അളവില്‍ ശുദ്ധമായ പശുവിന്‍ പാലു ചേര്‍ത്ത് കാച്ചി നേര്‍ പകുതിയാക്കി രാവിലെയും വൈകുന്നേരവും ഇരുപത്തിയഞ്ച് മില്ലി ലിറ്റര്‍ വീതം കഴിച്ചാല്‍ മദ്യം കഴിച്ചുണ്ടാകുന്ന അസ്വസ്ഥതകള്‍ മാറിക്കിട്ടും.