ശരീരത്തിന്റെ മെലിവ് പലരുടെയും ആത്മവിശ്വാസം തകർക്കും. എത്ര വലിച്ചുവാരി കഴിച്ചിട്ടും ഒരു മാറ്റവുമില്ലാത്തവരുമുണ്ട്. ചിലയാളുകള്‍ ഭക്ഷണം കഴിക്കാത്തതു കൊണ്ട് മെലിഞ്ഞിരിക്കുന്നു. വണ്ണം വയ്ക്കാൻ നിരവധി ഹോര്‍മോണ്‍ അടങ്ങിയ ഗുളിക, മരുന്നുകള്‍, ലേഹ്യങ്ങള്‍ തുടങ്ങിയവ വിപണിയിൽ ലഭ്യമാണ്. എന്നാൽ ഇങ്ങനെ ചെയ്യുന്നതുവഴി ഭാവിയിൽ പല ആരോഗ്യപ്രശ്നങ്ങളുമുണ്ടാകുന്നു. മാത്രമല്ല ഇത്തരം ഗുളികകളുടെ ഉപയോഗം പിന്നീട് അമിതവണ്ണത്തിലേയ്ക്ക് നയിക്കുകയും ചെയ്യും. അല്‍പ്പം ചിട്ടയുള്ള ജീവിതം ശീലിച്ചാല്‍ ആവശ്യത്തിന് വണ്ണവും ശരീര പുഷ്ടിയും നേടുവാൻ കഴിയും. ശരീരം പുഷ്ടിക്കുവാൻ ആയൂർവേദത്തിൽ ചില പരിഹാരങ്ങളുണ്ട്. 

ബദാം പരിപ്പ് പൊടിച്ച് പാലില്‍ ചേര്‍ത്ത് കഴിച്ചാൽ മെലിഞ്ഞ ശരീരം പുഷ്ടിക്കും. ഏത്തപ്പഴം പോലുള്ള ഊര്‍ജം കൂടിയ പഴങ്ങള്‍ വണ്ണം വെയ്ക്കാന്‍ ഏറെ നല്ലതാണ്. ഏത്തപ്പഴവും പാലും കൂടി ചേര്‍ത്ത് ഷേക്ക് ആയോ ഏത്തപ്പഴം നെയ്യില്‍ വഴറ്റിയോ ഒക്കെ കഴിക്കാം. ഇത് വണ്ണം വയ്ക്കുവാൻ സഹായിക്കും. ച്യവനപ്രാശത്തില്‍ വിറ്റാമിന്‍ സി ധാരാളമുണ്ട്. ഇത് പ്രതിരോധശക്തി കൂട്ടും. ശരീരത്തിന്റെ മുഴുവന്‍ ആരോഗ്യത്തിനും വണ്ണം വയ്ക്കാനും ഇത് വളരെ നല്ലതാണ്. പച്ചക്കറി സാലഡുകള്‍ കഴിക്കുമ്പോള്‍ ഒലിവെണ്ണയോ മറ്റോ ചേർക്കുന്നതും നല്ലതാണ്.

ഉലുവ തണുത്ത വെള്ളത്തില്‍ ഇട്ട് പിറ്റേന്ന് രാവിലെ വെറും വയറ്റില്‍ ഈ വെള്ളം കുടിക്കുക. ഇത് ഒരുമാസം ആവര്‍ത്തിച്ചാൽ തീര്‍ച്ചയായും ഫലം കണ്ടിരിക്കും. പ്രഭാതഭക്ഷണത്തിന്റെ കാര്യത്തിലും ശ്രദ്ധിക്കേണ്ടതുണ്ട്. പ്രഭാതഭക്ഷണം സമയമനുസരിച്ച് ശീലമാക്കുക. വെള്ളം മാത്രം കുടിക്കാതെ കാലറി കിട്ടുന്ന പഴച്ചാറുകള്‍, പാല്‍പ്പോലുള്ള പാനീയങ്ങളും കുടിക്കുക. ഇടയ്ക്ക് ഒരു സോഡയുമാകാം.

ഓരോ ഭക്ഷണനേരത്തിനിടയിലും രണ്ടര മുതല്‍ മൂന്നു മണിക്കൂര്‍ ഇടവേളയെ പാടുള്ളു. ഒരിക്കലും അഞ്ചുമണിക്കൂറില്‍ കൂടുതല്‍ ഇടവേള വരരുത്. ആഹാരത്തിനോടൊപ്പം മിതമായ രീതിയില്‍ വ്യായാമവും മെലിഞ്ഞിരിക്കുന്നവര്‍ക്ക് നല്ലതാണ് എങ്കില്‍ മാത്രമേ ദഹനം നല്ല രീതിയില്‍ നടക്കുകയുള്ളു. പെട്ടെന്നു ശരീരഭാരം കൂട്ടണമെങ്കില്‍ പാല്‍ കുടിക്കുക. മികച്ച ഗുണനിലവാരമുള്ള രണ്ടു തരം പ്രോട്ടീനുകള്‍ പാലിലുണ്ട്. പാലിനൊപ്പം മില്‍ക്ക് ഷേക്കുകളും പാലു കൊണ്ടുള്ള സ്മൂതികളും മാറി മാറി പരീക്ഷിക്കാം. ഭക്ഷണത്തില്‍ പയര്‍വര്‍ഗ്ഗങ്ങള്‍, വെണ്ണ, പച്ചക്കറികള്‍ എന്നിവ സ്ഥിരമാക്കുക.