ഓറഞ്ചും ഓറഞ്ച് ജ്യൂസും കരുതലോടെ ഉപയോഗിക്കൂ... കൂടുതല് ആരോഗ്യത്തിന് ഇത് ധാരാളം!
ഓറഞ്ച് സ്വാദിഷ്ഠമായ ഫലം ആണെന്നതു കൂടാതെ ധാരാളം വിറ്റാമിനുകളുടെയും പോഷകങ്ങളുടെയും സങ്കേതം കൂടിയാണ്. വിറ്റാമിന് എ, ബി, സി, കാല്സ്യം, മഗ്നീഷ്യം, പൊട്ടാസ്യം, ഫോസ്ഫറസ് തുടങ്ങി നിരവധി പോഷകങ്ങള് ഓറഞ്ചിലുണ്ട്. 170-ല്പരം ഫൈറ്റോകെമിക്കലുകളും 60-ല്പരം ഫ്ളേവനോയിഡുകളും അതിലുണ്ട്. ഇവയുടെ, നീര്വീക്കം തടയുന്ന സ്വഭാവം അഥവാ ആന്റി ഇന്ഫ്ളമേറ്ററി , ആന്റി ഓക്സിഡന്റ് സ്വഭാവം രോഗങ്ങള് തടയുകയും യുവത്വം നിലനിര്ത്തുകയും ചെയ്യുന്നു.
വിറ്റാമിന് സിയാണ് ഓറഞ്ചിന്റെ ആരോഗ്യപരമായ സിദ്ധികള്ക്ക് അടിസ്ഥാനം. വിറ്റാമിന് സി സപ്ലിമെന്റുകള് കഴിക്കുന്നതിനേക്കാള് ഫലപ്രദം ഒരു ഗ്ലാസ് ഓറഞ്ച് ജ്യൂസ് കഴിക്കുന്നതാണെന്ന് ഇറ്റലിയില് നടത്തിയ ഒരു പഠനം പറയുന്നു. എന്നു പറയുന്നത് കൊണ്ട് ഓറഞ്ച് ജ്യൂസ് എത്രവേണമെങ്കിലും കഴിക്കാം എന്നു ധരിക്കരുത്. അമിതമായി ഓറഞ്ച് ജ്യൂസ് ശീലമാക്കിയാല് പല്ലുകള്ക്കും പല്ലിന്റെ ഇനാമലിനും കേടുവരുത്തും. ഓറഞ്ച് ജ്യൂസിലെ പഞ്ചസാരയുടെയും ആസിഡിന്റേയും സാന്നിധ്യമാണ് അതിന് ഇടയാക്കുന്നത്.
ഓറഞ്ചില് ജലത്തില് ലയിക്കുന്നതരം പെക്റ്റിന് എന്ന നാരുകളുണ്ട്. ആഹാരത്തിലൂടെ ശരീരത്തിലെത്തുന്ന കൊളസ്ട്രോള് രക്തത്തില് കലരുന്നതിനുമുമ്പ് അവയെ പിടികൂടി ശരീരത്തില് നിന്നു പുറന്തളളുന്നതിനു പെക്റ്റിന് സഹായിക്കുന്നു. കൂടാതെ ഓറഞ്ചിലുളള hesperidin എന്ന ആന്റി ഓക്സിഡന്റ് കൊളസ്ട്രോള്, രക്തസമ്മര്ദം എന്നിവ കുറയ്ക്കുന്നു. ഓറഞ്ച്ജ്യൂസില് അടങ്ങിയ ഫ്ളേവനോണുകള് ചീത്ത കൊളസ്ട്രോളായ എല്ഡിഎല്-ന്റെ തോതു കുറയ്ക്കുന്നതായി പഠനങ്ങള് പറയുന്നു.
ഓറഞ്ചിലെ ആന്റി ഓക്സിഡന്റുകള്, ഫോളേറ്റ്, പൊട്ടാസ്യം എന്നിവ ഹൃദയാരോഗ്യത്തിന് കരുത്തുപകരുന്നവയാണ്. പ്രത്യേകിച്ചും വിറ്റാമിന് സി എന്ന ആന്റി ഓക്സിഡന്റ് ആര്ട്ടറികളെ ഫ്രീ റാഡിക്കലുകളില് നിന്നു സംരക്ഷിക്കുന്നു. രക്തക്കുഴലുകള്ക്കുള്ളില് കൊളസ്ട്രോള് അടിഞ്ഞുകൂടാതെ തടയുന്നു. ഓറഞ്ചിലെ ഫൈറ്റോകെമിക്കലുകള് ശരീരകോശങ്ങളിലേക്ക് പോഷകങ്ങളും ഓക്സിജനും വഹിക്കുന്ന രക്തക്കുഴലുകളുടെ കരുത്തുകൂട്ടുന്നവയാണ്.
ശരീരത്തില് ഹോമോസിസ്റ്റൈന് എന്ന അമിനോആസിഡ് അധികമായാല് ഹൃദയാഘാതത്തിനു സാധ്യതയേറും. ഓറഞ്ചിലുളള ഫോളേറ്റ്, വിറ്റാമിന് ബി9, ഹോമോസിസ്റ്റൈനെ വിഘടിപ്പിച്ചു നീക്കുന്നു.
ഓറഞ്ചില് വിറ്റാമിന് സിയും നാരുകളും ധാരാളമുണ്ട്. നാരുകളടങ്ങിയ വിഭവങ്ങള് കഴിച്ചയുടന് വയറു നിറഞ്ഞതായി അനുഭവപ്പെടും. അതിനാല് കൊഴുപ്പടങ്ങിയ മറ്റുവിഭവങ്ങള് അളവില് കുറച്ചുകഴിച്ചാല് മതിയാകും. മാത്രമല്ല അതിലുളള വിറ്റാമിന് സി ശരീരത്തിലുളള ഗ്ലൂക്കോസിനെ ഊര്ജമാക്കി മാറ്റുന്നു. തന്മൂലം ശരീരത്തിലടിഞ്ഞുകൂടിയ കൊഴുപ്പു നീങ്ങുന്നു. കലോറി കുറഞ്ഞ ഫലമായ ഓറഞ്ച് കൊഴുപ്പു കുറഞ്ഞ പോഷകങ്ങളുടെ ഉറവിടവും കൂടിയാണ്.
പ്രായമായവരെ റുമറ്റോയ്ഡ് ആര്ത്രൈറ്റിസില് നിന്നു സംരക്ഷിക്കുവാന് ഓറഞ്ചിനു കഴിയും. ഓറഞ്ച് ജ്യൂസിലുളള വിറ്റാമിന് സി എന്ന ആന്റി ഓക്സിഡന്റ്, സന്ധികളിലെ നീരും വേദനയും കുറയ്ക്കാന് സഹായകമാണ്. ഓറഞ്ചിലുള്ള zeaxanthin(സിയാസാന്തിന്) , beta-cryptoxanthin( ബീറ്റാ ക്രിപ്റ്റോസാന്തിന്) എന്നീ പോഷകങ്ങളും റുമറ്റോയ്ഡ് ആര്ത്രൈറ്റിസില് നിന്നു സംരക്ഷണം നല്കുന്നവയാണ്.
ഓറഞ്ചിനു പകരം ഓറഞ്ച് ഫ്ളവറുളള പൊടികള് ഉപയോഗിച്ചാലും മതിയല്ലോ എന്നു വിചാരിക്കുന്നവര് അറിയുക. അവയില് കൃത്രിമമധുരവും പ്രിസര്വേറ്റീവുകളും ഏറെയാണ്. അവ ഉണ്ടാക്കുന്ന ആരോഗ്യപ്രശ്നങ്ങളും ഏറെയാണ്. അതിനാല് അത്തരം കൃത്രിമ ജ്യൂസ് ശീലമാക്കുന്നത് ആരോഗ്യകരമല്ല.
https://www.facebook.com/Malayalivartha
