മുട്ടയും, പനീറും നമ്മുക്ക് പ്രിയപ്പെട്ടവയാണ്. എന്നാൽ ഇവ ഒന്നിച്ചു കഴിക്കാമോയെന്ന് മിക്കവര്‍ക്കും സംശയമുള്ള ഒന്നാണ്. കാത്സ്യം, വൈറ്റമിന്‍ B12, പ്രോട്ടീന്‍ എന്നിവ ധാരാളമടങ്ങിയതാണ് രണ്ടും. അതിനാൽ ഒരേസമയം രണ്ടും കഴിക്കാമോ ഇല്ലയോ എന്നതില്‍ സംശയം പലര്‍ക്കുമുണ്ട്.

മുട്ടയിൽ പ്രോട്ടീന്‍ കൂടിയ അളവിൽ അടങ്ങിട്ടുണ്ട്. കൂടാതെ വൈറ്റമിനുകളായ എ, ബി, ഇ, കെ, കാത്സ്യം, മഗ്നീഷ്യം, ഇരമ്പ് എല്ലാം മുട്ടയില്‍ ഭദ്രം. എങ്കിലും മുട്ടയുടെ മഞ്ഞയില്‍ കൊളസ്ട്രോള്‍ കൂടുതലുണ്ട് എന്ന് പറഞ്ഞു അത് ഒഴിവാക്കുന്നവര്‍ കൂടുതലാണ്. എന്നാൽ ഇത് ശരിയല്ല. മുട്ടയുടെ മഞ്ഞയിലാണ് ഏറ്റവും കൂടുതല്‍ പോഷകങ്ങള്‍ അടങ്ങിയിരിക്കുന്നത്. മാത്രമല്ല ഒരു പുഴുങ്ങിയ മുട്ടയില്‍ 5.5 ഗ്രാം ആണ് പ്രോട്ടീന്‍ അടങ്ങിയിരിക്കുന്നത്.

അതേസമയം പനീറും വളരെ മികച്ച ഗുണങ്ങളുള്ളത് ആണ്. സാധാരണ കോട്ടേജ് ചീസ് എന്നറിയപ്പെടുന്ന പനീര്‍ വൈറ്റമിന്‍ ഡി, റൈബോഫ്ലേവിന്‍, സെലീനിയം, കാത്സ്യം ഇങ്ങനെ പോഷകസമ്പന്നമാണ്. ഒലിവ്, സലാഡ് എന്നിവയ്ക്കൊപ്പം ഇവ കഴിക്കുന്നത്‌ ഏറെ ഗുണകരവുമാണ്. കൂടാതെ ഭാരം കുറയ്ക്കാന്‍ സഹായിക്കുന്ന ഒന്ന് കൂടിയാണ് പനീര്‍ അടങ്ങിയ പ്രോട്ടീന്‍ ഡയറ്റ്.

മുട്ടയും പനീറും മെറ്റബോളിസം നന്നാക്കുന്നതാണ്. ഇതിന്റെ ഫലമായി ഭാരം കുറയുന്നുണ്ടെങ്കിലും, പ്രോട്ടീന്‍ ശരീരത്തിന് നല്ലതാണെങ്കില്‍ പോലും ആവശ്യത്തിലധികം കഴിക്കാന്‍ പാടില്ല. മറ്റൊരു കാര്യം മുട്ടയും പനീറും ഒന്നിച്ചു കഴിക്കുന്നതില്‍ ഒരു തെറ്റുമില്ല. പക്ഷേ ആവശ്യത്തില്‍ കൂടിയ അളവില്‍ ഇവ കഴിക്കാന്‍ പാടില്ലെന്ന് മാത്രം. എന്ന് വെച്ചാൽ ഒരു ദിവസത്തേക്ക് ആവശ്യമായ അളവില്‍ കൂടുതല്‍ പ്രോട്ടീന്‍ കഴിക്കാന്‍ പാടില്ല എന്ന് സാരം.