വീട് വാങ്ങാന്‍ ഇതാണ് നല്ല സമയം
രാജ്യത്തിന്റെ പല ഭാഗങ്ങളിലും പ്രോപ്പര്‍ട്ടി വിലകളില്‍ കഴിഞ്ഞ ഒരു വര്‍ഷത്തിനിടെ മാറ്റം വന്നതിനാല്‍ താങ്ങാവുന്ന വിലയില്‍ പ്രോപ്പര്‍ട്ടി വാങ്ങാവുന്ന സാഹചര്യമുണ്ടായി. ചരക്കുസേവന നികുതി വന്നതോടെ റിയല്‍ എസ്‌റ്റേറ്റ് മേഖല കൂടുതല്‍ സുതാര്യമാവുകയാണ്. മുമ്പ് ഉയര്‍ന്ന നികുതി നിരക്കുകളായിരുന്നു ഉണ്ടായിരുന്നു. ഏകീകൃത നികുതി ഘടനയെ അതുകൊണ്ടുതന്നെ മിക്ക റിയല്‍എസ്‌റ്റേറ്റ് സംരംഭകരും സ്വാഗതം ചെയ്യുകയാണ്. റെറ പൂര്‍ണ അര്‍ത്ഥത്തില്‍ പ്രാബല്യത്തില്‍ വന്നയിടങ്ങളില്‍ വ്യക്തിഗത ആവശ്യത്തിനാണെങ്കില്‍ ഇപ്പോള്‍ വീട് വാങ്ങുന്നത് നല്ലതാണെന്നാണ് മിക്ക വിദഗ്ധരും അഭിപ്രായപ്പെടുന്നത്. ആര്‍ബിഐ നിരക്കുകള്‍ കുറച്ചതും അനുയോജ്യസമയമാണിതെന്ന് ഓര്‍മിപ്പിക്കുന്നു. റെഡി ടു മൂവ് വീട് വാങ്ങുന്നതാകും പണി നടന്നുകൊണ്ടിരിക്കുന്ന പദ്ധതി വാങ്ങുന്നതിനേക്കാള്‍ ഇപ്പോള്‍ ഗുണം ചെയ്യുക.
നിക്ഷേപത്തിലെ നേട്ടം പ്രതീക്ഷിച്ചാണ് പ്രോപ്പര്‍ട്ടി വാങ്ങുന്നതെങ്കില്‍ കുറച്ചു സമയം കൂട്ടി കാത്തിരിക്കുന്നതാണ് ഉചിതം. 10 വര്‍ഷത്തിനിടയിലെ ഏറ്റവും താഴ്ന്ന നിരക്കിലാണ് ഭവനവായ്പ. റെറ (റിയല്‍ എസ്‌റ്റേറ്റ് റെഗുലേറ്ററി അതോറിറ്റി), ജിഎസ്ടി തുടങ്ങിയ പരിഷ്‌കരണങ്ങള്‍ കൂടി എത്തിയതോടെ ഉപഭോക്താക്കള്‍ക്ക് ഒന്നു കൂടി സംരക്ഷണമായി. അപ്പോള്‍ പിന്നെ ഇതാണോ നിങ്ങളുടെ സ്വപ്‌ന ഭവനം വാങ്ങാന്‍ ഏറ്റവും അനുയോജ്യമായ സമയം.പല റിയല്‍ എസ്‌റ്റേറ്റ് വിദഗ്ധരും അഭിപ്രായപ്പെടുന്നത് ഇതാണ് റിയല്‍റ്റി മേഖലയില്‍ നിക്ഷേപിക്കാന്‍ പറ്റിയ സമയമെന്നാണ്. നോട്ട് അസാധുവാക്കല്‍, റെറ, ജിഎസ്ടി എന്നീ മൂന്ന് പരിഷ്‌കരണങ്ങളാണ് ഇതിന് കാരണമായി അവര്‍ പറയുന്നത്. മറ്റെന്നത്തേക്കാളും ഉപരിയായി റിയല്‍ എസ്‌റ്റേറ്റ് മേഖല ഇപ്പോള്‍ കൂടുതല്‍ അച്ചടക്കമുള്ളതും സംഘടിതവുമായി എന്നാണ് പൊതുവെയുള്ള വിലയിരുത്തല്‍.
നോട്ട് അസാധുവാക്കലിന് ശേഷം മേഖല തല്‍ക്കാലത്തേക്ക് സ്തംഭിച്ചെങ്കിലും കാര്യങ്ങള്‍ കുറച്ചുകൂടി സിസ്റ്റമാറ്റിക്ക് ആകുകയായിരുന്നു. ഇപ്പോള്‍ യാഥാര്‍ത്ഥ്യബോധമുള്ളതാണ് പ്രോപ്പര്‍ട്ടി വിലകളെന്നാണ് മിക്കവരുടെയും അഭിപ്രായം. കേരളം ഉള്‍പ്പടെയുള്ള സംസ്ഥാനങ്ങളില്‍ റെറ പൂര്‍ണ അര്‍ത്ഥത്തില്‍ പ്രാബല്യത്തിലാകുന്നതോടെ നിങ്ങള്‍ വാങ്ങുന്ന ഫഌറ്റുകള്‍ കൃത്യസമയത്ത് തന്നെ കൈയ്യിലെത്തും. പദ്ധതിയുമായി ബന്ധപ്പെട്ട കാര്യത്തില്‍ പൂര്‍ണ സുതാര്യതയുണ്ടാകുകയും ചെയ്യും. പദ്ധതിയുടെ തുടക്കം തൊട്ട് എല്ലാ കാര്യങ്ങളെക്കുറിച്ചും ഉപഭോക്താവിന് വ്യക്തമായ ബോധ്യമുണ്ടാകും. ഉപഭോക്താക്കള്‍ക്ക് നിക്ഷേപങ്ങളില്‍ സുരക്ഷിതത്വബോധം നല്‍കാന്‍ ഇപ്പോഴത്തെ സാഹചര്യങ്ങള്‍ക്ക് സാധിച്ചേക്കും.
https://www.facebook.com/Malayalivartha
