പൂന്തോട്ടത്തില്‍ ഇന്ന് ഒഴിച്ചുകൂടാനാകാത്തെ ഒന്നായി മാറിയിരിക്കുകയാണ് ബോണ്‍സായി ഇനത്തില്‍പെട്ട അലങ്കാര ചെടികള്‍. വര്‍ഷങ്ങളുടെ ഫലമായാണ് ഒരു ബോണ്‍സായി ചെടി രൂപപ്പെട്ടുവരുന്നത്. വന്‍ വൃക്ഷങ്ങളെ ചെടിചട്ടിയില്‍ ചെറിയ വൃക്ഷങ്ങളാക്കി വളര്‍ത്തുന്ന രീതിയാണ് ബോണ്‍സായി എന്ന് പറയുന്നത്. ധാരാളം ശാഖയോടുകൂടി വളരുക, പെട്ടെന്ന് വേരുപൊട്ടി കിളുര്‍ക്കുക, ഏതു പ്രതികൂല അവസ്ഥകളെയും അതിജീവിക്കാനുളള കഴിവുണ്ടാവുക എന്നിവയാണ് ബോണ്‍സായി വൃക്ഷങ്ങള്‍ക്കുവേണ്ട സവിശേഷതകള്‍. മേല്‍പ്പറഞ്ഞ പ്രത്യേകതകള്‍ എല്ലാം ഉണ്ടെങ്കില്‍ അരയാല്‍, പേരാല്‍, വാളന്‍പുളി, വാക,കശുമാവ്, ഓറഞ്ച്, പ്ലാവ്, മാവ് എന്നിങ്ങനെ വന്‍ വൃക്ഷമായി മാറുന്ന എന്തിനേയും ബോണ്‍സായിയാക്കിമാറ്റം. ബോണ്‍സായി ഉണ്ടാക്കുന്നത് രണ്ടു ഘട്ടങ്ങളായിട്ടാണ്. അദ്യഘട്ടത്തില്‍ ചെടിയുടെ തായ് വേര് മുറിച്ചുമാറ്റി ചട്ടികളില്‍ നടുകയാണ് വേണ്ടത്. ഈ ചട്ടികളില്‍ തുല്യഅളവില്‍ മണ്ണും ജൈവവളവും ചേര്‍ത്തുവേണം തൈകള്‍ നടുവാന്‍. ഇവയ്ക്ക് സാധാരണ രീതിയില്‍ വെളളവും വളവും നല്‍കി വളര്‍ത്തുക.

ബോണ്‍സായി നടുമ്പോള്‍ ചെടി അധികം ഉയരം വയ്ക്കാതെ വ്യാപിച്ച് വളരുകയോ ചെയ്യാതെ ശാഖമുറിച്ച് നിയന്ത്രിക്കണം. ഏകദേശം എട്ട് 10 വര്‍ഷത്തിന് ശേഷം ബോണ്‍സായി രണ്ടാം ഘട്ടം ആരംഭിക്കണം. ഇത് തീരുമാനിക്കേണ്ടത് ചെടികളുടെ വളര്‍ച്ച പരിശോധിച്ചാണ്.തൈകള്‍ക്ക് ആവശ്യത്തിന് വേരും ശാഖകളും വരുന്നതും ശ്രദ്ധിക്കണം. വളര്‍ച്ച തൃപ്തികരമെങ്കില്‍ ആദ്യത്തെ ചട്ടിയില്‍ നിന്ന് ചെടികള്‍ ഇളക്കി എടുക്കണം. പരന്ന് അധികം ഉയരമില്ലാത്ത ചട്ടികളില്‍ മൂന്ന് നാല് വെള്ളം ഒഴുകിപ്പോകുവാനുള്ള സുഷിരങ്ങള്‍ ഉണ്ടാകണം. ഇത്തരത്തിലുള്ള ചട്ടിവേണം തിരഞ്ഞെടുക്കുവാന്‍. തൈചെടിയുടെ വണ്ണം ചട്ടിയുടെ വലിപ്പത്തെ സ്വാധനിക്കുന്നതിനല്‍ വേരുകള്‍ ഇറങ്ങി നശിക്കാത്ത വിധത്തിലുളള ചെടചട്ടികള്‍ തന്നെ വേണം ഉപയോഗിക്കാന്‍. ചെറിയ നൂല്‍കമ്പികള്‍ ഉപയോഗിച്ചാണ് ചെടിയുടെ വളര്‍ച്ച നിയന്ത്രിക്കേണ്ടത്. ചട്ടിയുടെ അടിഭാഗത്തുള്ള ചെറിയ സുഷിരങ്ങളിലൂടെ അലുമിനിയം കമ്പിയോ ചെമ്പ് കമ്പിയോ ലംബമായി കടത്തിവിടുക. ശേഷം കമ്പി ഉള്‍പ്പടെ സുക്ഷിരങ്ങള്‍ ചെറിയ പ്‌ളാസ്റ്റിക് വലകഷണങ്ങള്‍ ഉപയോഗിച്ച് അടയ്ക്കുക. പഴയ ചട്ടിയില്‍ നിന്നെടുത്ത ചെടി അതിന്റെ വേരുകള്‍ പകുതിയോളം ചെത്തിമിനുക്കി പുതിയ ചട്ടിയില്‍ കൊള്ളുന്ന വിധത്തിലാക്കുക. അതിന് ശേഷം ചട്ടിയുടെ ചുവട്ടില്‍ ചരല്‍ നിറഞ്ഞ കട്ടിയുള്ള മണ്ണ് നിരത്തുക.

ചെടിഅതിലേക്ക് ഉറപ്പിച്ച് നിറുത്തണം. ആവശ്യമില്ലാത്ത തളിരിലകളും ചില്ലകളും മാറ്റണം. ശേഷം ലംബമായി നില്‍ക്കുന്ന കമ്പികൊണ്ട് ചെടിയുടെ തായ് തടി വരിഞ്ഞുമുറുക്കുക. ശാഖകള്‍ ആവശ്യമുള്ള രീതിയില്‍ കമ്പികൊണ്ട് കെട്ടി നിയന്ത്രിക്കണം. ചട്ടിയുടെ ബാക്കിയുള്ള സ്ഥലത്ത് ചാണകപ്പൊടി,മണല്‍ എന്നിവ നിറയ്ക്കാം. തണലിനും അലങ്കാരത്തിനുമായി ഇതിന് മുകളില്‍ പായല്‍ നിരത്തണം. അദ്യത്തെ രണ്ട് ആഴ്ച തണലില്‍ വെച്ച് നനച്ചതിന് ശേഷം പിന്നീട് സൂര്യപ്രകാശം കിട്ടുന്ന സ്ഥലത്തേക്ക് മാറ്റുക. ഒപ്പം നനയ്ക്കുകയും വളപ്രയോഗവും നടത്താം. ചെടിയുടെ ചുവട്ടില്‍ വെള്ളം ഒഴിക്കുന്നതിനേക്കാള്‍ സ്‌പ്രേയര്‍ ഉപയോഗിച്ച് ഇലകള്‍ നനയ്ക്കുന്നതാണ് നല്ലത്. 10 മുതല്‍ 20 വര്‍ഷം വരെ ഇങ്ങനെ ചെടികളെ നിയന്ത്രിച്ച് വളര്‍ത്തിയാല്‍ വര്‍ഷം കഴിയുമ്പോഴും ചെടിയുടെ ഭംഗി കൂടുകയാണ് ചെയ്യുന്നത്. ചെടി വളരുന്നതനുസരിച്ച് കമ്പി അഴിച്ചുകെട്ടേണ്ടത് ആവശ്യമാണ്. പല വലുപ്പത്തിലും ആകൃതിയുലുമുളള ബോണ്‍സായി ചെടികളുടെ ഉയരം 20 സെന്റിമീറ്ററാണ്. ബോണ്‍സായിയായി നട്ടുവളര്‍ത്തുന്ന ചെടികളില്‍ നിന്നു തന്നെ അതിന്റെ വംശഗുണമുള്ള പുതിയ ചെടികള്‍ സൃഷ്ടിച്ചെടുക്കാം. ആല്‍ത്തറകളും ആല്‍വൃക്ഷങ്ങളും അതേരീതിയില്‍ ഉണ്ടാക്കുവാന്‍ കഴിയും. 500 രൂപ മുതല്‍ 15000 രൂപ വരെയാണ് ഇതിന് വില ലഭിക്കുക. ബോണ്‍സായി വളരും തോറും ഇതിന്റെ ഭംഗിയും വര്‍ദ്ധിക്കും.