ചില ബിരിയാണി ടിപ്‌സുകള്‍
ബിരിയാണി ഉണ്ടാക്കുന്നത് അല്പം മെനക്കേടുളള പണിയാണെങ്കിലും ചില കാര്യങ്ങള്‍ ശ്രദ്ധിച്ചാല്‍ അരി വെന്തു കുഴഞ്ഞു പൊകാതെ സ്വാദിഷ്ടമായി ബിരിയാണി ഉണ്ടാക്കാന്‍ സാധിക്കും. മൂന്നുതരത്തില്‍ ബിരിയാണി അരി വേവിച്ചെടുക്കാം. ബിരിയാണി ഉണ്ടാക്കുന്നതിനെകുറിച്ചുളള ചില ടിപ്‌സുകള്‍ നമുക്ക് നോക്കാം.
* അരി വേവിക്കുമ്പോള്‍ അതിലേക്ക് കുറച്ച് നാരങ്ങാ നീരി പിഴിഞ്ഞൊഴിച്ചാല്‍ ചോറ് കട്ടിപിടിക്കില്ല.
* വെളളം തിളച്ച ശേഷം അതില്‍ പാകത്തിന് ഉപ്പും എണ്ണയും ചേര്‍ത്ത് ഇളക്കി അരിയിട്ട് വേവിക്കുക.
* ബിരിയാണിക്ക് നല്ല രുചിയും മണവും കിട്ടാന്‍ എണ്ണ ചൂടാക്കിയ ശേഷം കറുവാപ്പട്ട, ഏലയ്ക്കാ, ഗ്രാമ്പു, കുരുമുളക് എന്നിവ ചേര്‍ത്താല്‍ മതി.
* ബിരിയാണി അരി വേവിക്കുന്നതിന് മുന്‍പ് 30 മിനിട്ടെങ്കിലും വെളളത്തില്‍ കുതിര്‍ത്തു വയ്ക്കുന്നതാണ് നല്ലത്.
* മസാലയും ആരിയും വെവ്വേറെ വേവിച്ചെടുത്ത ശേഷം മറ്റൊരു പാത്രത്തില്‍ വേണം ദമ്മിനിടാന്‍.
* ഒരു കപ്പ് അരിക്ക് രണ്ട് കപ്പ് വെളളം എന്ന കണക്കില്‍ വേണം ബിരിയാണി അരി വേവിക്കാന്‍ വെളളം എടുക്കേണ്ടത്.
* വെളളം മുഴുവന്‍ വറ്റിയതിന് ശേഷം അരി 10 മിനിട്ട് അടച്ചുവച്ച ശേഷം ഉപയോഗിക്കുന്നത് ചോറിന്റെ രുചി കൂട്ടും.
* പാത്രത്തില്‍ ആവശ്യത്തിന് വെള്ളം എടുക്കുക (അളവ് പ്രശ്‌നമല്ല). ഇതിലേക്ക് ആവശ്യത്തിന് ഉപ്പ് ചേര്‍ത്തിളക്കുക. വെള്ളം വെട്ടിത്തളച്ചു കഴിഞ്ഞാല്‍ അതിലേക്ക് ആവശ്യത്തിന് ഉപ്പ് ചേര്‍ത്തിളക്കുക. വെള്ളം വെട്ടിത്തളച്ചു കഴിഞ്ഞാല്‍ അതിലേക്ക് ഒരു വലിയ സ്പൂണ്‍ വെണ്ണയോ നെയ്യോ ചേര്‍ക്കുക. നെയ്യ് മുഴുവനായും വെള്ളത്തില്‍ അലിഞ്ഞു ചേര്‍ന്നു കഴിഞ്ഞാല്‍ ഏലയ്ക്കാ, പട്ട, ഗ്രാമ്പൂ, തക്കോലം, പെരുംജീരകം, കറുവയില എന്നിവ കൂടി വെള്ളത്തിലേക്ക് ചേര്‍ക്കുക. രണ്ട് മിനിറ്റിനു ശേഷം, അര മണിക്കൂര്‍ വെള്ളത്തിലിട്ട് കുതിര്‍ത്ത് മൂന്നു വെള്ളത്തില്‍ കഴുകിയെടുത്ത അരി വെള്ളത്തിലേക്ക് ചേര്‍ക്കാം. അരി മുക്കാല്‍ വേവായാല്‍ വെള്ളത്തില്‍ നിന്നും വേര്‍തിരിച്ച് മാറ്റാം. അല്ലെങ്കില്‍ അരി അധികമായി വെന്തുപോകും. അരി ഒന്നില്‍ ഒന്ന് തൊടാതെ നില്‍ക്കുന്നതാണ് ഈ പരുവം. ബാക്കി വേവ് ബിരിയാണി ദമ്മിനിടുമ്പോള്‍ വെന്തുകൊള്ളും.
* അടി കട്ടിയുള്ള ഒരു പാത്രമെടുത്ത് അടുപ്പത്ത് വച്ച് അതില്‍ രണ്ട് ടേബിള്‍സ്പൂണ്‍ നെയ്യൊഴിക്കുക. നെയ്യ് ചൂടായാല്‍ അതിലേക്ക് ഏലയ്ക്ക, പട്ട, ഗ്രാമ്പൂ എന്നിവ ചേര്‍ത്ത് നന്നായി വഴറ്റിയെടുക്കുക. ഇവ വഴന്നു വന്നുകഴിഞ്ഞാല്‍ വെള്ളം ചേര്‍ക്കാം. ഒരു കപ്പ് അരിയ്ക്ക് രണ്ട് കപ്പ് വെള്ളം എന്നാണ് കണക്ക്. അരി വെന്തുപോകാതെ ഒന്നില്‍ ഒന്ന് തൊടാതെയുള്ള പരുവത്തില്‍ കിട്ടാനാണെങ്കില്‍ ഒരു കപ്പ് അരിയ്ക്ക് ഒന്നര കപ്പ് വെള്ളം എന്ന അളവാണ് നല്ലത്. ഇനി ഇതിലേക്ക് ആവശ്യാനുസരണം ഉപ്പ് ചേര്‍ക്കാം. നേരത്തേ പറഞ്ഞതുപോലെ ചോറിന് വേണ്ടുന്ന ഉപ്പും കൂടി കണക്കാക്കി വേണം വെള്ളത്തിലേക്ക് ഉപ്പ് ചേര്‍ക്കാന്‍. വെള്ളം വെട്ടിത്തിളച്ചാല്‍ വെള്ളത്തില്‍ കുതിര്‍ത്തു വച്ചിരിക്കുന്ന അരി ചേര്‍ക്കാം. വെള്ളത്തിലെ ചേരുവകളുമായി അരി നന്നായി ഒന്നിളക്കിച്ചേര്‍ത്ത ശേഷം ഇടത്തരം തീയില്‍ അടച്ചുവച്ച് വേവിക്കുക. ഏകദേശം പത്തുമിനിറ്റ് കൊണ്ടു തന്നെ അരി വെന്തുകിട്ടും. അരി അടച്ചുവച്ച് തന്നെ വേവിക്കാന്‍ ശ്രദ്ധിക്കുക.
* മലബാര്‍ ബിരിയാണികള്‍ ഉണ്ടാക്കുമ്പോള്‍ പ്രയോഗിക്കാവുന്ന രീതിയാണ് ഇത്. ജീരകശാലാ അരിയും കൈമാ അരിയുമാണ് മലബാര്‍ ബിരിയാണികള്‍ക്ക് പൊതുവെ ഉപയോഗിക്കുന്നത്. അടി കട്ടിയുള്ള പാത്രത്തില്‍ വേണം ഈ ബിരിയാണിയും ഉണ്ടാക്കാന്‍. പാത്രം അടുപ്പത്ത് വച്ച് രണ്ട് ടേബിള്‍ സ്പൂണ്‍ നെയ്യൊഴിച്ച് ചൂടാക്കുക. നെയ്യ് ചൂടായാല്‍ ഇതിലേക്ക് ഏലയ്ക്ക, പട്ട, ഗ്രാമ്പൂ, പെരുംജീരകം, കറുവയില എന്നിവ ചേര്‍ത്തു നന്നായി വഴറ്റിയെടുക്കാം. ഇവിടെ ശ്രദ്ധിക്കേണ്ടത്, ജീരകശാലാ അരിയും കൈമാ അരിയും ഉപയോഗിക്കുമ്പോള്‍ അരി വെള്ളത്തില്‍ കുതിര്‍ത്തെടുക്കേണ്ട ആവശ്യമില്ല. അരി മൂന്നുവെള്ളത്തില്‍ നന്നായി കഴുകി നേരിട്ട് നെയ്യിലേക്ക് ചേര്‍ക്കാം. അരി നെയ്യുമായി നന്നായി ചേര്‍ത്തിളക്കി ചെറുതായൊന്ന് വഴറ്റിയെടുക്കുക. അരി നെയ്യില്‍ കിടന്ന് വെന്ത് ഒന്നില്‍ ഒന്ന് തൊടാത്ത പരുവത്തില്‍ ആകുന്നത് വരെ അരി നെയ്യില്‍ ചൂടാക്കണം. അരി ഈ പരുവത്തില്‍ ആയാല്‍ പാത്രത്തിലേക്ക് വെള്ളം ചേര്‍ക്കാം. ഒരു കപ്പ് അരിയ്ക്ക് ഒന്നരക്കപ്പ് വെള്ളം എന്നാണ് ഇവിടുത്തെ കണക്ക്.
https://www.facebook.com/Malayalivartha
