ഓപ്പറേഷന്‍ സമുദ്ര സേതു മൂന്നാം ഘട്ടത്തിലേക്ക്: ഇന്ത്യന്‍ നാവികസേന ശ്രീലങ്കയില്‍ കുടുങ്ങിയവരെ എത്തിക്കും. വിദേശരാജ്യങ്ങളില്‍ കുടുങ്ങിയ ഇന്ത്യന്‍ പൗരന്മാരെ എത്തിക്കുന്ന വന്ദേഭാരത് മിഷന്റെ ഓപ്പറേഷന്‍ സമുദ്ര സേതു മൂന്നാം ഘട്ടം ഉടനാരംഭിക്കും. ഇന്ത്യന്‍ നാവിക സേനയുടെ രക്ഷാ ദൗത്യമായ സമുദ്ര സേതു പദ്ധതി പ്രകാരം മൂന്നാം ഘട്ടം ശ്രീലങ്ക യിലേക്കാണ് നടക്കുന്നത്.

അടുത്തമാസം ആദ്യമാണ് ശ്രീലങ്കയിലുള്ളവരെ നാവികസേന ഇന്ത്യയിലേക്ക് മടക്കിക്കൊണ്ടുവരാന്‍ തീരുമാനിച്ചിരിക്കുന്നത്. ' നാവികസേനയുടെ സമുദ്ര സേതു രക്ഷാ ദൗത്യത്തിന്റെ മൂന്നാം ഘട്ടമാണ് അടുത്തമാസം ജൂണ്‍ ഒന്നിന് നടക്കുക. ശ്രീലങ്കയിലേക്ക് ഇന്ത്യന്‍ പൗരന്മാരെ മടക്കിക്കൊണ്ടുവരാനായുള്ള ദൗത്യം ഐഎന്‍എസ് ജലാശ്വയാണ് നിര്‍വ്വഹിക്കുക.' നാവിക സേനാ കമാന്റര്‍ വിവേക് മാധ്വാള്‍ അറിയിച്ചു.
ജലാശ്വ വഴി 600 മുതല്‍ 700 വരെ യാത്രക്കാരെയാണ് കൊണ്ടുവരാന്‍ ഉദ്ദേശിക്കുന്നത്. കപ്പലില്‍ പ്രവേശിക്കും മുമ്പ് എല്ലാവരേയും വൈദ്യ പരിശോധനയക്ക് വിധേയരാക്കുകയും ബാഗുകള്‍ അണുവിമുക്തമാക്കുകയും ചെയ്യും. കൊറോണ ബാധയുണ്ടെങ്കില്‍ കപ്പലിലെ പ്രത്യേക മുറികളിലായിരിക്കും പ്രവേശിപ്പിക്കുകയെന്നും നാവികസേന അറിയിച്ചു. 27 നാവിക ഉദ്യോഗസ്ഥരുടെ കീഴില്‍ 380 നാവികസേനാംഗങ്ങളാണ് ജലാശ്വയില്‍ സ്ഥിരമായുള്ളത്.

നിലവില്‍ നാവികസേനയുടെ ജലാശ്വയും മകറും ചേര്‍ന്ന് മാലിദ്വീപില്‍ നിന്നും 1488 പേരെ ഇന്ത്യയിലേക്ക് എത്തിച്ചുകഴിഞ്ഞു. വന്ദേഭാരത് മിഷന്‍രെ ഭാഗമായ രക്ഷാ ദൗത്യമാണ് നാവിക സേനയും വ്യോമസേനയും എയര്‍ ഇന്ത്യയും നടത്തിക്കൊണ്ടിരിക്കുന്നത്. 10 ദിവസത്തിലേറെ കടലില്‍1000ത്തിലധികം സൈനികരെയും യുദ്ധവിമാനങ്ങളും ടാങ്കുകളും വഹിച്ച് യാത്രചെയ്യാനാകുന്ന ശേഷിയുള്ളവയാണ് രണ്ടു കപ്പലുകളെന്നും നാവികസേന വ്യക്തമാക്കി.