അബൂദാബിയില്‍ വർധിച്ചു വരുന്ന വാഹനാപകടനകൾ കണക്കിലെടുത്ത് റോഡ്സുരക്ഷ ഉറപ്പാക്കാന്‍ വാഹന പരിശോധന കർശനമാക്കാനൊരുങ്ങുന്നു. ചൂട് ശക്തി പ്രാപിച്ചതിനെ തുടര്‍ന്ന് അപകടങ്ങൾ വർധിക്കാനുള്ള സാഹചര്യം മുൻ നിർത്തിയാണ് നടപടി കൈക്കൊണ്ടിരിക്കുന്നത്.

അതേസമയം വാഹനങ്ങളുടെ ടയറുകള്‍ പരിശോധിച്ച്‌ നിലവാരം ഉറപ്പ് വരുത്തണമെന്ന് പൊലീസ് ആവശ്യപ്പെട്ടു. കുറ്റമറ്റ ടയറുകള്‍ ഉപയോഗിക്കാതെ വാഹനം ഓടിക്കുന്നവരെ കണ്ടെത്തുകയും കര്‍ശന ശിക്ഷ ഉറപ്പാക്കുകയും ചെയ്യുമെന്ന് അധികൃതര്‍ മുന്നറിയിപ്പ് നല്‍കി.

മോശം ടയറുകള്‍ ഘടിപ്പിച്ച്‌ വാഹനമോടിച്ച 28727 പേര്‍ക്ക് പിഴ ചുമത്തിയതായി അബൂദാബി പൊലീസ് അറിയിച്ചു. വേനല്‍കാലത്ത് ടയറുകള്‍ പൊട്ടിത്തെറിക്കാന്‍ സാധ്യത കൂടുതലാണ്. വേണ്ടത്ര കാറ്റ് നിറക്കാതിരിക്കുക, അമിത ഭാരം കയറ്റുക, കൃത്യമായ രൂപവും വലിപ്പവുമുള്ള റിമ്മുകള്‍ ഉപയോഗിക്കാതിരിക്കുക എന്നിവയൊക്കെ അപകടകരമാണെന്നും മുന്നറിയിപ്പുണ്ട്.