ഉച്ച വിശ്രമ നിയമം കാറ്റിൽ പറത്തി കമ്പനികൾ; ജൂണിൽ നടത്തിയ പരിശോധനയിൽ പിടിയിലായത് 73 സംഭവങ്ങള്
കുവൈത്ത്: കുവൈത്തിലെ മാന് പവര് അതോറിറ്റി അധികൃതര് കഴിഞ്ഞമാസം നടത്തിയ പരിശോധനകളില് ഉച്ച വിശ്രമ നിയമം ലംഘിച്ച് തൊഴിലാളികളെക്കൊണ്ട് ജോലി ചെയ്യിപ്പിച്ച 73 സംഭവങ്ങള് പിടികൂടി. അതോറിറ്റിയിലെ പബ്ലിക് റിലേഷന് ഡിപ്പാര്ട്ട്മെന്റ് മേധാവി അസീല് അല് മസീദ് ആണ് ഇക്കാര്യം പുറത്തു വിട്ടത്.
അന്താരാഷ്ട്ര തൊഴില് നിയമപ്രകാരം കടുത്ത ചൂട് അനുഭവപ്പെടുന്ന ജൂണ് മുതല് ആഗസ്റ്റ് വരെ മാസങ്ങളില് കുവൈത്തിലും മധ്യാഹ്ന ജോലി വിലക്ക് പ്രാബല്യത്തിലാണ്. രാവിലെ 11 മുതല് വൈകീട്ട് നാലുവരെ തുറസ്സായ സ്ഥലങ്ങളില് തൊഴിലാളികള് ജോലി ചെയ്യുന്നതിനും അവരെ കൊണ്ട് ജോലി ചെയ്യിപ്പിക്കുന്നതും നിയമലംഘനമാണ്. രാജ്യത്തിന്റെ വിവിധ ഭാഗങ്ങളിലെ 73 നിര്മ്മാണ ഇടങ്ങളിലാണ് നിയമലംഘനം കണ്ടെത്തിയത്.
76 തൊഴിലാളികളാണ് നിയമം ലംഘിച്ച് ജോലി ചെയ്തതായായി കണ്ടെത്തിയത്. മന്ത്രാലയങ്ങളുടെ ഹോട്ട് ലൈന് നമ്പർ വഴി നേരിട്ടും സമൂഹമാധ്യമങ്ങള് വഴി നേരിട്ടല്ലാതെയും പരാതി ലഭിച്ച അഞ്ചു സംഭവങ്ങളാണ് പിടികൂടാനായത്. മധ്യാഹ്ന ജോലി വിലക്കുമായി ബന്ധപ്പെട്ട പരാതികള് 99444800 എന്ന നമ്പരില് നേരിട്ടോ 69009600 എന്ന നമ്പറില് വാട്സ്അപ്പ് വഴിയോ pr@manpower.gov.kw എന്ന മെയില് അഡ്രസിലൂടെയോ അറിയിക്കാമെന്ന് അധികൃതര് കൂട്ടിച്ചേര്ത്തു.
https://www.facebook.com/Malayalivartha