മരണ ശേഷം തൂക്കം ശാപമായി തോന്നി... 85 കിലോ, ഒരു കിലോ ശവം നാട്ടിലെത്തിക്കാന്‍ 18 ദര്‍ഹം അങ്ങനെ 27,000 രൂപ, പ്രവാസിയുടെ എഫ്.ബി പോസ്റ്റ് വയറലാകുന്നു... മരണ ശേഷം പ്രവാസികളുടെ മൃതദേഹം വീട്ടിലെത്തിക്കുന്നത് സംബന്ധിച്ച ബുദ്ധിമുട്ടുകളും വീട്ടുകാരുടെ അവസ്ഥയും പിന്നീട് അവര്‍ക്കുണ്ടാകുന്ന മാറ്റങ്ങളും സംബന്ധിച്ച് കണ്ണൂര്‍ കൂത്ത്പറമ്പ് സ്വദേശിയും പ്രവാസിയുമായ രഞ്ജിത് ആലഞ്ചേരി നീലനാണ് കുറുപ്പിട്ടിരിക്കുന്നത്. സമൂഹമാധ്യമങ്ങളില്‍ ഇതിനകം ഇത് ചര്‍ച്ചയായിട്ടുണ്ട്. 

15 വര്‍ഷത്തെ പ്രവാസത്തിന് ശേഷം പെട്ടന്നായിരുന്നു എന്റെ മരണം , അങ്ങനെ ഇരുന്നപ്പോള്‍ നെഞ്ച് അങ്ങ് പൊട്ടി ...!! ആദ്യമായി എന്റെ തൂക്കം എനിക്കൊരു ശാപമായി തോന്നി ... 85 കിലോ ... ഒരു കിലോ ശവം നാട്ടില്‍ എത്തിക്കാന്‍ 18 ദിര്‍ഹം ... മൊത്തം 1530 ദിര്‍ഹം ..... ഏതാണ്ട് ഇരുപത്തിഏഴായിരം രൂപ ചിലവാക്കി എന്നെ ആരൊക്കയോ കയറ്റി അയച്ചു ... !! 

ശവത്തിന്റെ പിന്നാലെ നടന്നും പറന്നും ഞാന്‍ വീട്ടില്‍ എത്തിയപ്പോള്‍ 10 ദിവസം പിന്നിട്ടിരുന്നു ... !! ഞാന്‍ ആദ്യം നോക്കിയത് ആ പറമ്പിലേക്കാണ് , ഒരു മണ്‍കൂനയോ, കത്തി അമര്‍ന്ന പാടോ, ആ പറമ്പിലില്ല , ഞാന്‍ വാങ്ങിയതാണ് ആ സ്ഥലം , നിറയെ മാവുകള്‍ ഉള്ള മുപ്പത് സെന്റ് , ഒത്ത നടുവില്‍ ഞാന്‍ ഉണ്ടാക്കിയ വീട് , വീടിന് മുന്നില്‍ ചിലരൊക്കെ ഉണ്ട് . ശവം പൊതുശ്മശാനത്തില്‍ അടക്കിയത്രേ ..!

ഞാന്‍ മരിച്ചാല്‍ ജീവിതം ഇരുട്ടില്‍ വീഴും എന്ന് കരുതിയ അച്ഛനും അമ്മയും എന്റെ മക്കളെ മാറി മാറി താലോലിക്കുന്നു... കരഞ്ഞ് വാടി തളര്‍ന്ന് പോകും എന്ന കരുതിയ പെങ്ങള്‍ പുസ്തകെട്ടും അടുക്കി ക്ലാസില്‍ പോയി തുടങ്ങിയിരിക്കുന്നു ... നല്ലത് തന്നെ , എന്റെ മരണത്തിന്റെ വേദനയെ അവരൊക്കെ അതിജീവിച്ചല്ലോ ... സന്തോഷം ....

ഞാന്‍ എന്റെ ഭാര്യയെ തിരഞ്ഞു .... നെഞ്ച് തല്ലി കരഞ്ഞ് വല്ല ആശുപത്രിയിലും ആകും അവളെന്നാണ് കരുതിയത് , ഇല്ല അവളും ഇവിടെ തന്നെയുണ്ട് , അടുക്കളയില്‍ അവള്‍ തിരക്കിലാണ്... ആരോ ശവത്തിന്റെ കൂടെ എത്തിയ എന്റെ ബാഗ് എടുത്ത് മുറ്റത്തേക്ക് ഇട്ടൂ , ചിലരൊക്കെ ചിക്കിചികഞ്ഞു .... പാതി ഉപയോഗിച്ച ഒരു സ്‌പ്രേ , ഞാന്‍ വലിച്ചിട്ട് ബാക്കി വെച്ച അര പായ്ക്ക് റോത്ത്മാന്‍സ് സിഗരറ്റ് , പിന്നെ എന്തൊക്കയോ പ്രവാസി അവശേഷിപ്പുകള്‍ ...

ഒടുവില്‍ മുഷിഞ്ഞ കുറച്ച് വസ്ത്രങ്ങളും എന്റെ 'ക്യാന്‍സല്‍' അടിച്ച പാസ്‌പോര്‍ട്ടും ബാക്കിയായി ..!! മഴ നനഞ്ഞ് രണ്ട് ദിവസം അതാ മുറ്റത്തു കിടന്നു .... ഇന്നലെ വരെ ഇവരൊക്കെ എത്ര ഭദ്രമായി വെച്ചതാണ് അതെന്ന് ആലോചിച്ച് ചിരിച്ചുകൊണ്ട് ഞാന്‍ ആ മാവിന്‍ തോപ്പിലൂടെ കുറെ നേരം നടന്നു ... ഇനി എനിക്ക് എന്റെ നാടും പുഴയും പറമ്പും എല്ലാം നന്നായി ഒന്ന് നടന്ന് കാണണം ..!!