സൗദിയിൽ സ്ത്രീകൾക്ക് വാഹനമോടിക്കുന്നതിനുള്ള അനുമതിയ്ക്ക് പിന്നാലെ കാര്‍ വര്‍ക്ക് ഷോപ്പുകളിലേക്ക് വനിതാ തൊഴിലാളികളെ നിയമിക്കാനൊരുങ്ങുന്നതിയി റിപ്പോർട്ടുകൾ. ഹൈവേകളിലും മറ്റും പ്രയാസമനുഭവിക്കുന്ന വനിതാ ഡ്രൈവര്‍മാര്‍ക്ക് സഹായം നല്‍കുകയാണ് പദ്ധതിയുടെ പ്രാഥമിക ലക്ഷ്യം.

റോഡുകളില്‍ വാഹനവുമായി ഒറ്റപ്പെടുന്നവരെ സഹായിക്കാന്‍ മെക്കാനിക്കുകളെ പ്രാപ്തമാക്കുന്നതിന്റെ ഭാഗമായി കാര്‍ വര്‍ക്ക് ഷോപ്പുകളിൽ വിവിധ ജോലികളിലായാണ് വനിതകളെ നിയമിക്കുന്നത്.

മെക്കാനിക്ക്, റിസപ്ഷനിസ്റ്റ്, കോള്‍ സെന്റര്‍ സ്റ്റാഫ്, മാര്‍ക്കറ്റിംഗ് തുടങ്ങി വിവിധ ജോലികളിലേക്കാണ് വനിതകളെ നിയമിക്കുന്നത്. കാര്‍ വര്‍ക്ക് ഷോപ്പുകളിലും റിപ്പയര്‍ സെന്ററുകളിലും 30 ശതമാനം വരെ അധിക വരുമാനമാണ് നിക്ഷേപകര്‍ പ്രതീക്ഷിക്കുന്നത്.

സൗദി ജപ്പാനീസ് ഹൈ ഇന്‍സ്റ്റിറ്റ്യൂട്ടില്‍ ജോലി ചെയ്യുന്നതിനായി വനിതാ അപേക്ഷകരുടെ എണ്ണം വര്‍ധിച്ചിട്ടുണ്ട്. അപേക്ഷ ഇനിയും കൂടാനാണ് സാധ്യതയുള്ളത്. വര്‍ദ്ധിച്ചു വരുന്ന ഉപഭോക്താക്കളെ സേവിക്കുന്നതിനായി യോഗ്യരായ വനിതാ മെക്കാനിക്കുകളെ നിയമിക്കും. സമീപ ഭാവിയില്‍ തന്നെ വനിതാ മെക്കാനിക്കുകളെ നിയമിക്കുമെന്നും സൗദി ജപ്പാനീസ് ഹൈ ഇന്‍സ്റ്റിറ്റ്യൂട്ട് സി.ഇ.ഒ. സലീം അല്‍അസ്മാരി പറഞ്ഞു.