ഇന്ത്യയിൽ നിന്നുള്ള പഴം, പച്ചക്കറി തുടങ്ങിയവയ്ക്ക് ഖത്തർ ഏർപ്പെടുത്തിയിരുന്ന വിലക്ക് നീക്കിയതായി റിപ്പോർട്ടുകൾ. കേരളത്തെ മുഴുവൻ ആശങ്കയിലാഴ്ത്തിയ നിപ്പ വൈറസ് രോഗബാധയെ തുടർന്നായിരുന്നു ഖത്തർ വിലക്കേർപ്പെടുത്തിയത്. ഈ മാസം അവസാനമാണ് വിലക്ക് ഏർപ്പെടുത്തിയിരുന്നത്.

നിപ്പ വൈറസ് നിയന്ത്രണ വിധേയമായതിന്റെ അടിസ്ഥാനത്തിൽ, പൊതുജന ആരോഗ്യ മന്ത്രാലയത്തിലെ ഭക്ഷ്യ നിയന്ത്രണ വിഭാഗമാണ് നിരോധനം പിൻവലിച്ചതായി അറിയിച്ചത്. ഫ്രഷ്, ചിൽഡ്, ഫ്രോസൺ എന്നീ മൂന്ന് വിഭാഗങ്ങളിലെ പഴം, പച്ചക്കറി മുതലായവയുടെ ഇറക്കുമതിക്ക് അനുമതി നൽകിയിട്ടുണ്ട്.

45 ദിവസം നീണ്ടു നിന്ന വിലക്കിൽ കേരളത്തിൽ നിന്നുമുള്ള പഴം, പച്ചക്കറികൾക്ക് ക്ഷാമം നേരിട്ടിരുന്നു. എന്നാൽ പ്രവാസി മലയാളികളിൽ ഭൂരിഭാഗവും വേനലവധിക്ക് നാട്ടിൽ പോയതിനാൽ ഇത് കാര്യമായി ബാധിച്ചിട്ടില്ല.