പ്രളയ ദുരന്തത്തില്‍ അകപ്പെട്ട കേരളത്തിന് യുഎഇ സര്‍ക്കാര്‍ 700 കോടി സഹായം പ്രഖ്യാപിച്ചതിന് പിന്നാലെ നിങ്ങള്‍ക്കൊപ്പം ഞങ്ങളുണ്ട് പിന്തുണ അര്‍പ്പിച്ചുകൊണ്ടുള്ള ദുബായ് പോലീസിന്റെ വീഡിയോ സന്ദേശം വൈറലാകുന്നു.

ദുബായ് പോലീസും യുഎഇ സര്‍ക്കാരും ചേര്‍ന്ന് തയ്യാറാക്കിയ വീഡിയോ ദൃശ്യമാണ് സമൂഹമാധ്യമങ്ങളില്‍ വൈറലായിരിക്കുന്നത്. പ്രളയത്തില്‍ അകപ്പെട്ടവരെ ഹെലികോപ്ടറില്‍ ഇന്ത്യന്‍ സൈന്യം രക്ഷപ്പെടുത്തതിന്റെയടക്കം ദൃശ്യങ്ങള്‍ ഉള്‍ക്കൊള്ളിച്ച വീഡിയോയില്‍ കൈവിടരുത് നിങ്ങള്‍ക്കൊപ്പം ഞങ്ങളുണ്ട് എന്ന മലയാളത്തിലുള്ള സന്ദേശമാണ് ദുബായ് പോലീസ് നല്‍കുന്നത്. 

ദുബായ് പോലീസിലെ മലയാളി ഉദ്യോഗസ്ഥനായ അബ്ദുല്‍ അസീസിന്റെ മലയാളത്തിലുള്ള സന്ദേശവും വീഡിയോയിലുണ്ട്. കേരളത്തിലെ ദുരിതാശ്വാസ പ്രവര്‍ത്തനങ്ങള്‍ക്ക് യുഎഇ ഭരണാധികാരികള്‍ തന്നെ നേരിട്ട് രംഗത്തിറങ്ങിയിരുന്നു.