കുവൈത്തിലെ സമ്പദ്‌വ്യവസ്ഥക്ക് തകര്‍ച്ച; കാരണം തൊഴില്‍ നഷ്ടമായി വിദേശികളുടെ കൊഴിഞ്ഞുപോക്കും സ്വദേശിവത്കരണ നടപടികളും; വിദേശികള്‍ പ്രയാസം നേരിടുന്ന രാജ്യങ്ങളുടെ പട്ടികയില്‍ കുവൈത്തും
കുവൈത്തിലെ സമ്പദ്‌വ്യവസ്ഥയ്ക്ക് തകര്‍ച്ച നേരിടാന്‍ കാരണം തൊഴില്‍ നഷ്ടമായി വിദേശികളുടെ കൊഴിഞ്ഞുപോക്കും സ്വദേശിവത്കരണ നടപടികളും ശക്തമായത്. എക്‌സ്പാറ്റ് ഇന്‍സൈഡര്‍ അടുത്തിടെ നടത്തിയ സര്‍വേ റിപ്പോര്‍ട്ട് അനുസരിച്ചാണ് ഈ വിവരം. വിദേശികള്‍ പ്രയാസം നേരിടുന്ന രാജ്യങ്ങളുടെ പട്ടികയില്‍ കുവൈത്ത് 68ാം സ്ഥാനത്താണ്.
വിദേശികള്‍ തൊഴില്‍ നഷ്ടപ്പെട്ടു മടങ്ങുന്നതും അവരുടെ കുടുംബങ്ങളെ നാട്ടിലേക്കയച്ച് ഒറ്റയ്ക്കു താമസിക്കുന്നതും റിയല്‍ എസ്‌റ്റേറ്റ് മേഖല ഉള്‍പ്പെടെയുള്ളവയെ സാരമായി ബാധിച്ചിട്ടുണ്ട്. കച്ചവട സ്ഥാപനങ്ങള്‍, വിദ്യാഭ്യാസം തുടങ്ങിയ എല്ലാ മേഖലയെയും ഏറെ പ്രതികൂലമായി ബാധിച്ചതായിട്ടാണ് റിപ്പോര്‍ട്ട് സൂചിപ്പിക്കുന്നത്. സ്വദേശിവത്കരണം സര്‍ക്കാര്‍ മേഖലയിലും സ്വകാര്യ മേഖലയിലും ശക്തമാക്കിയതോടെ ആയിരകണക്കിന് വിദേശികളാണ് തൊഴില്‍ നഷ്ടമായി മടങ്ങുന്നത്. കൂടാതെ നിയന്ത്രണങ്ങള്‍ കര്‍ശനമാക്കിയതോടെ നിരവധി പേര്‍ കുടുംബത്തെ നാട്ടിലേക്ക് അയയ്ക്കുകയും മറ്റുചിലര്‍ തൊഴില്‍ ഉപേക്ഷിച്ചു സ്വന്തം നാടുകളിലേക്ക് മടങ്ങുകയും ചെയ്യുന്നു.
ആരോഗ്യചികിത്സയ്ക്ക് ഏര്‍പ്പെടുത്തിയ നിയന്ത്രണങ്ങള്‍, വര്‍ധിപ്പിച്ച ചികിത്സാനിരക്ക്, സബ്‌സിഡി കുറച്ചത്, ഇന്ധനവില വര്‍ധന, പുതിയ വിസ നിയന്ത്രണങ്ങള്‍, വരുമാനത്തിന് നികുതി ഏര്‍പ്പെടുത്താനുള്ള നീക്കം എന്നിവയെല്ലാം വിദേശികളുടെ ജീവിതച്ചെലവ് വര്‍ധിപ്പിച്ചു.
https://www.facebook.com/Malayalivartha
