കൊറോണ വ്യാപനത്തെ തുടർന്ന് ഏക ആശ്വാസമായിരുന്നു വന്ദേ ഭരത് മിഷൻ ഏഴാം ഘട്ടത്തിലേക്ക്. ഏഴാം ഘട്ടത്തിൽ ജിദ്ദയിൽ നിന്നും എയർ ഇന്ത്യയിൽ ഒമ്പത് സർവീസുകളാണ് പ്രഖ്യാപിച്ചത്. ഒക്ടോബർ 11 മുതൽ 22 വരെയാണ് സർവീസുകൾ ഏർപ്പെടുത്തിയിട്ടുള്ളത്. ഇതിൽ മൂന്നെണ്ണം കോഴിക്കോട്ടേക്കാണ് ഉള്ളത്. ഒക്ടോബർ 12, 16, 19 തീയതികളിലാണ് കോഴിക്കോട്ടേക്കുള്ള സർവീസുകൾ നൽകിയിട്ടുള്ളത്.

അതേസമയം ജിദ്ദയിൽ നിന്നും മുംബൈ വഴിയാണ് കോഴിക്കോട്ടേക്കുള്ള സർവീസുകൾ. എന്നാൽ മുംബൈയിൽ ഒരു മണിക്കൂർ സ്റ്റോപ്പ് മാത്രമാണ് ഉണ്ടാവുക എന്നും യാത്രക്കാർ വിമാനത്തിൽ നിന്ന് പുറത്തിറങ്ങേണ്ടതില്ലെന്നും ജിദ്ദയിലെ ഇന്ത്യൻ കോൺസുലേറ്റ് അറിയിക്കുകയുണ്ടായി. വൈകീട്ട് 5.10ന് പുറപ്പെടുന്ന വിമാനം പുലർച്ചെ 12.25ന് മുംബൈയിൽ എത്തിച്ചേരുന്നതാണ്. ശേഷം 1.25ന് പുറപ്പെട്ട് 3.20ന് കോഴിക്കോട്ടെത്തുകയും ചെയ്യും. മുതിർന്നവർക്ക് 1061 റിയാൽ, 12 വയസ് വരെയുള്ള കുട്ടികൾക്ക് 835 റിയാൽ, രണ്ട് വയസിന് താഴെ 163 റിയാൽ എന്നിങ്ങനെയാണ് ടിക്കറ്റ് നിരക്കുകൾ ഉള്ളത്.

ഒക്ടോബർ 11, 14, 18, 21 തീയതികളിൽ ഡൽഹി വഴി ലക്‌നോ, 15, 22 തീയതികളിൽ ഹൈദരാബാദ് വഴി മുംബൈ എന്നിവയാണ് മറ്റു സർവീസുകൾ നൽകിയിട്ടുള്ളത്. മുതിർന്നവർക്ക് 1360 റിയാൽ, 12 വയസ് വരെയുള്ള കുട്ടികൾക്ക് 1061 റിയാൽ, രണ്ട് വയസിന് താഴെ 193 റിയാൽ എന്നിങ്ങനെയാണ് ഈ സർവീസുകളുടെ ടിക്കറ്റ് നിരക്കുകൾ നൽകിയിട്ടുള്ളത് . ഇന്ത്യൻ എംബസി വെബ്സൈറ്റിൽ പേര് രജിസ്റ്റർ ചെയ്തവരിൽ യാത്ര ചെയ്യാൻ ആഗ്രഹിക്കുന്നവർ എയർ ഇന്ത്യ ഓഫീസിനെ നേരിട്ട് ബന്ധപ്പെട്ട് ടിക്കറ്റുകൾ വാങ്ങണം. ആദ്യം വരുന്നവർക്ക് ആദ്യം എന്ന ക്രമത്തിലാവും ടിക്കറ്റ് വിൽപ്പന നടത്തുന്നത്.