കൊറോണ വ്യാപനത്തെ തുടർന്ന് ദുരിതത്തിലായ പ്രവാസികൾക്ക് നല്കിവന്നിരുന്ന ഇളവുകൾ എല്ലാം തന്നെ അവസാനിക്കുന്നു. ഇതിന്റെ ഭാഗമായി യു.എ.ഇ. താമസവിസ, എമിറേറ്റ്‌സ് ഐ.ഡി കാലാവധി കഴിഞ്ഞവർ തിങ്കളാഴ്ച മുതൽ പിഴ നൽകണമെന്ന് അധികൃതർ വ്യക്തമാക്കി. മാർച്ച് ഒന്നുമുതൽ ജൂലായ് 11 വരെ വിസ കാലാവധി കഴിഞ്ഞവർക്ക് പിഴയില്ലാതെ നാട്ടിലേക്ക് മടങ്ങാനും വിസ പുതുക്കാനും നീട്ടിനൽകിയിരുന്ന സമയം ഞായറാഴ്ച അവസാനിച്ചതോടെയാണ് നിലപാട് കടുപ്പിച്ചത് തന്നെ. ഇനിമുതൽ പിഴ നൽകിയാൽ മാത്രമേ നാട്ടിലേക്ക് പോകാനോ വിസ നിയമാനുസൃതമാക്കാനോ സാധിക്കുകയുള്ളു. എമിറേറ്റ്‌സ് ഐ.ഡി. കഴിഞ്ഞവരും പിഴ നൽകേണ്ടതാണ്.

അതേസമയം ആദ്യദിനം 125 ദിർഹവും പിന്നീടുള്ള ദിവസങ്ങളിൽ 25 ദിർഹം വീതവുമാണ് പിഴയീടാക്കുന്നത്. ഇതുകൂടാതെ രാജ്യം വിടുമ്പോൾ 250 ദിർഹം അധികമായി നൽകണം. എമിറേറ്റ്‌സ് ഐ.ഡി. പുതുക്കാത്തവർക്ക് ദിവസം 20 ദിർഹവും പിഴ ചുമത്തുന്നതാണ്. അതേസമയം ആറ്്‌ മാസത്തിൽ കൂടുതൽ യു.എ.ഇ.ക്ക് പുറത്തുള്ള താമസവിസക്കാർക്ക് തിരിച്ചുവരാനാകുമെന്ന് ദുബായ് ഇമിഗ്രേഷൻ വ്യക്തമാക്കി. എന്നാൽ വിസ സാധുവായിരിക്കണം. താമസവിസയുമായി ബന്ധപ്പെട്ട കൂടുതൽ വിവരങ്ങൾക്കും പിഴകളെക്കുറിച്ചും കൂടുതലറിയാൻ ഫെഡറൽ അതോറിറ്റി ഫോർ ഐഡന്റിറ്റി ആൻഡ് സിറ്റിസൺഷിപ്പ് അഥവാ www.ica.gov.aeഎന്ന വെബ്‌സൈറ്റ് പരിശോധിക്കേണ്ടതാണ്.