പുതിയ തീരുമാനവുമായി രംഗത്ത് എത്തിയിരിക്കുകയാണ് കുവൈത്ത്. ഹോം ക്വാറൻറീനിൽ കഴിയുന്നവർക്ക് രാജ്യത്തിന് പുറത്തേക്ക് യാത്ര അനുവദിക്കുന്നതാണ്. രോഗലക്ഷണങ്ങൾ ഇല്ലെന്ന് ഉറപ്പു വരുത്തിയും യാത്രക്കാവശ്യമായ മറ്റു നിബന്ധനകൾ പാലിച്ചും വീട്ടുനിരീക്ഷണത്തിലുള്ളവർക്ക് കുവൈത്തിന് പുറത്തേക്ക് യാത്ര ചെയ്യുന്നതിന് തടസ്സമൊന്നുമില്ലെന്ന് വിമാനത്താവള അധികൃതർ ഇതിനോടകം തന്നെ വ്യക്തമാക്കി. എന്നാൽ കുവൈത്തിലെത്തുന്ന സ്വദേശികളും വിദേശികളും ഉൾപ്പെടെ മുഴുവൻ യാത്രക്കാരും 14 ദിവസം നിർബന്ധമായും വീടുകളിൽ നിരീക്ഷണത്തിൽ കഴിയണമെന്നാണ് നിയമം.

അതേസമയം ഇക്കാര്യം ഉറപ്പുവരുത്താനായി ബോർഡിങ് സമയത്തുതന്നെ യാത്രക്കാരൻ പ്രത്യേക സമ്മതപത്രം ഒപ്പിട്ടു നൽകേണ്ടതാണ്. ശ്ലോനിക് ആപ്ലിക്കേഷൻ വഴി 14 ദിവസവും ആരോഗ്യമന്ത്രാലയം ക്വാറൻറീനിൽ കഴിയുന്നവരെ നിരീക്ഷിക്കുകയും നിർദേശങ്ങൾ ലംഘിക്കുന്നില്ലെന്നു ഉറപ്പു വരുത്തുകയാണ്. എന്നാൽ, ഇൗ കാലയളവിനിടെ ഒരാൾക്ക് കുവൈത്തിന് പുറത്തേക്ക് യാത്രചെയ്യണമെന്നുണ്ടെങ്കിൽ അതിനു സാങ്കേതിക തടസ്സമില്ലെന്നാണ് വിമാനത്താവള അധികൃതർ വ്യക്തമാക്കി. സ്വന്തം രാജ്യത്തേക്ക് മടങ്ങാൻ വിദേശികൾക്കും വിദേശങ്ങളിലേക്ക് യാത്ര ചെയ്യാൻ കുവൈത്ത് പൗരന്മാർക്കും ഇവിടെ ക്വാറൻറീൻ തടസ്സമാകില്ല.