സന്ദർശക വിസയിലെത്തിയ ഇന്ത്യക്കാർ ദുബൈ വിമാനത്താവളത്തിൽ വീണ്ടും കുടുങ്ങിയാതായി റിപ്പോർട്ട്. തിങ്കൾ, ചൊവ്വ ദിവസങ്ങളിലായി എത്തിയ 300ഓളം ഇന്ത്യക്കാരാണ്​ കുടുങ്ങിയിരിക്കുന്നത്​എന്നാണ് അധികൃതർ വ്യക്തമാക്കിയത്. ഇവരിൽ മലയാളികളില്ല എന്ൻ ലഭ്യമാകുന്ന വിവരം. ഇതിൽ 1300ഓളം പാകിസ്​താനികളും വിമാനത്താവളത്തിൽനിന്ന്​ പുറത്തിറങ്ങാൻ കഴിയാത്തവരിൽപെടുന്നു. ഇവരിൽ 1276 പേരെ മടക്കിയയ്ക്കുകയുണ്ടായി. ഇതിൽ 98 പേർ വിമാനത്താവളത്തിൽ തുടരുന്നു. ഇവരെയും ഉടൻ മടക്കിയയക്കുമെന്ന്​ അധികൃതർ അറിയിക്കുകയുണ്ടായി.

അതേസമയം 300ഓളം ഇന്ത്യക്കാരാണ്​ വിമാനത്താവളത്തിൽ കുടുങ്ങിയതെന്ന്​ കോൺസുലേറ്റ്​ സ്​ഥിരീകരിച്ചു. 80 പേർക്ക്​ പിന്നീട്​ പ്രവേശനം അനുവദിക്കുകയായിരുന്നു. ബാക്കിയുള്ളവരെ മടക്കി അയക്കാൻ ശ്രമിക്കുന്നതായി അധികൃതർ വ്യക്തമാക്കി. അതോടൊപ്പം തന്നെ ടൂറിസ്​റ്റ്​ വിസയിൽ ജോലി അന്വേഷിച്ച്​ യു.എ.ഇയിലേക്ക്​ വരരുതെന്നും കൃത്യമായ രേഖകൾ ഉണ്ടെങ്കിൽ മാത്രമേ യാത്ര ചെയ്യാവുവെന്നും ഇന്ത്യൻ കോൺസുലേറ്റ്​ അറിയിപ്പ് നൽകി.

മാത്രമല്ല യു.എ.ഇയിൽ താമസിക്കാൻ സ്​ഥലവും സാമ്പത്തിക ശേഷിയുമുണ്ടെന്ന്​ അധികൃതരെ ബോധ്യപ്പെടുത്തിയാൽ മാത്രമേ പുറത്തിറങ്ങാൻ അനുമതി നൽകു. എന്നാൽ സന്ദർശക വിസക്കാർക്കുള്ള നിബന്ധനകൾ കർശനമാക്കിയതോടെയാണ്​ ഇവർ വിമാനത്താവളത്തിൽ അകപ്പെട്ടത്​. സന്ദർശക വിസയിലെത്തുന്നവർ റി​ട്ടേൺ ടിക്കറ്റ്​ ​നിർബന്ധമായും കൈയിൽ കരുതണമെന്ന്​ കഴിഞ്ഞ ദിവസം വിമാനക്കമ്പനികളും ദുബൈ എയർപോർട്ടും കർശന നിർദേശം നൽകിയിരുന്നു.

എന്നാൽ ഇത്​ പാലിക്കാതെ എത്തിയവരാണ്​ കുടുങ്ങിയവരിൽ ഏറെയും.കഴിഞ്ഞ ദിവസം മലയാളികൾ അടക്കം വിമാനത്താവളത്തിൽ കുടുങ്ങിയിരുന്നു. തുടർന്ന് ഒരു ദിവസത്തിന്​ ശേഷമാണ്​ ഇവർക്ക്​ പുറത്തിറങ്ങാൻ കഴിഞ്ഞത്​.