പ്രവാസലോകത്ത് നിന്ന് ഒരു സന്തതിശവർത്തയാണ് പുറത്തേക്ക് വരുന്നത്. യുഎഇയിൽ വൻ നിയമ മാറ്റങ്ങൾ പ്രഖ്യാപിച്ചതായി റിപ്പോർട്ട്. പുതിയ ഭേദഗതി പ്രകാരം പ്രവാസികൾക്ക് സ്വത്തിന്റെ അനന്തരാവകാശം, വിവാഹം എന്നിവ അവരുടെ സ്വന്തം നാട്ടിലെ നിയമ പ്രകാരം നിർവഹിക്കാൻ സാധിക്കും. ഉഭയകക്ഷി സമ്മതപ്രകാരമുള്ള ലൈംഗികബന്ധം, മദ്യപാനം എന്നിവ ഉപാധികളുടെ അടിസ്ഥാനത്തിൽ രാജ്യത്ത് നിയമ പ്രകാരം ഇനി ശിക്ഷാർഹമായിരിക്കില്ല എന്നതാണ്.

പ്രസിഡന്റ് ശൈഖ് ഖലീഫയാണ് രാജ്യത്ത് വലിയ നിയമമാറ്റങ്ങൾ പ്രഖ്യാപിച്ചുകൊണ്ടുള്ള ഉത്തരവ് ഇറക്കിയത്. പുതിയ നിയമപ്രകാരം യുഎഇയിൽ കഴിയുന്ന പ്രവാസികൾക്ക് അവരുടെ രാജ്യത്തെ നിയമപ്രകാരം സ്വത്ത് അനന്തരാവകാശികൾക്ക് വീതം വെക്കാൻ സാധിക്കുന്നതായിരിക്കും. വിവാഹം, വിവാഹമോചനം എന്നിവക്ക് അത് നിർവഹിക്കപ്പെട്ട രാജ്യത്തെ നിയമം ബാധകമാക്കാൻ സാധിക്കും. അതോടൊപ്പം തന്നെ പ്രായപൂർത്തിയായവർ തമ്മിൽ പരസ്പര സമ്മതപ്രകാരം ലൈംഗികബന്ധത്തിൽ ഏർപ്പെടുന്നത് നിയമപ്രകാരം യുഎഇയിൽ ഇനി ശിക്ഷാർഹമായിരിക്കില്ല. എന്നാൽ, മാനസികരോഗികളുമായും പ്രായപൂർത്തിയാകാത്തവരുമായുള്ള ലൈംഗിക ബന്ധത്തിന് വധശിക്ഷ വരെ ലഭിക്കുന്നതായിരിക്കും. ബലംപ്രയോഗിച്ചും സമ്മർദത്തിലാക്കിയും നിഷ്കളങ്കത മുതലെടുത്തും സംഭവിക്കുന്ന ലൈംഗിക ബന്ധങ്ങളും കുറ്റകരമായിരിക്കുന്നതാണ്.

അതോടൊപ്പം തന്നെ മദ്യപിക്കാൻ അനുവദിച്ച സ്ഥലങ്ങളിൽ 21 വയസ് പിന്നിട്ടവർ മദ്യപിക്കുന്നതിന് നിയമ നടപടിയുണ്ടാകുകയുമില്ല. ദുരഭിമാനകൊലകൾക്ക് അഭിമാനം സംരക്ഷിക്കാൻ നടത്തിയ കൊലപാതകം എന്ന പരിരക്ഷ ഉണ്ടായിരിക്കില്ല. അത് കൊലപാതകമായി തന്നെ പരിഗണിക്കപ്പെടുന്നതാണ്. ആത്മഹത്യാശ്രമത്തിന് ഇനി ശിക്ഷക്ക് പകരം മാനസിക ചികിൽസയായിരിക്കും രാജ്യത്തെ നിയമം വ്യക്തമാക്കുന്നത്. എന്നാൽ ഒരാളെ ആത്മഹത്യക്ക് സഹായിച്ചാൽ തടവ് ശിക്ഷ ലഭിക്കുന്നതായിരിക്കും.