പെരുന്നാൾ അവധികൾ പ്രഖ്യാപിച്ചതിന് പിന്നാലെ പ്രവാസികളുടെ കീശകാലിയാക്കുന്ന നയമാണ് വിമാനക്കമ്പനികൾ സ്വീകരിച്ചുവരുന്നത്. ഏറെ നാളുകളായുള്ള കാത്തിരിപ്പിന് ശേഷം നാട്ടിൽ പോകാൻ തയ്യാറായ പ്രവാസികൾക്ക് നേരിടേണ്ടി വരുന്നത് കനത്ത തിരിച്ചടി. യുഎഇയ്ക്ക് പിന്നാലെ ഇതാ കുവൈത്തിൽ പെരുന്നാൾ അവധിയോടനുബന്ധിച്ച്​ 76 അധിക വിമാനങ്ങൾ ഏർപ്പെടുത്തിയിട്ടും തിരക്കും വിമാന ടിക്കറ്റ്​ വില വർധനയും തുടരുന്നതായി റിപ്പോർട്ട്.

അങ്ങനെ 70 മുതൽ 150 ശതമാനം വരെയാണ് ടിക്കറ്റ്​ നിരക്ക്​ വർദ്ധിച്ചിരിക്കുന്നത്. അവധി ആഘോഷത്തിന്​ തന്നെ വിദേശത്ത്​ പോകുന്ന കുവൈത്തികളും ഹ്രസ്വകാല അവധിക്ക്​ നാട്ടിൽ പോകുന്ന പ്രവാസികളുമാണ്​ ഇത്തരത്തിൽ വിമാനത്താവളത്തിൽ തിരക്ക്​ വർധിക്കാൻ കാരണം. 2,800 വിമാനങ്ങളാണ്​ അവധി ദിവസങ്ങളിൽ ഷെഡ്യൂൾ ചെയ്​തിരിക്കുന്നത്​. ചെറിയ പെരുന്നാളിന് തുടർച്ചയായ ഒമ്പത് ദിവസത്തെ അവധി പ്രഖ്യാപിച്ചതോടെയാണ്​ യാത്രക്കാരുടെ തിരക്കും ടിക്കറ്റ് നിരക്കും കൂടിയിരിക്കുന്നത്.

അതേസമയം കഴിഞ്ഞ ദിവസം പുറത്ത് വന്ന റിപ്പോർട്ടുകൾ അനുസരിച്ച് വിമാനക്കമ്പനികൾ മത്സരിച്ച് നിരക്ക് ഉയർത്തിയതോടെ നാട്ടിലേക്ക് പോകാൻ കഴിയാതെയിരിക്കുകയാണ് സാധാരണക്കാരായ പ്രവാസികൾ. നേരിട്ടുള്ള വിമാനങ്ങളിൽ സീറ്റ് കിട്ടാനില്ല. എന്നാൽ കണക്​ഷൻ വിമാനങ്ങളിലാകട്ടെ ആറിരട്ടി നിരക്കും. കോവിഡ് മൂലം നാട്ടിലേക്ക് പോകാൻ കഴിയാതെ വിഷമിച്ച പലരും ഈദ് ആഘോഷിക്കാനെങ്കിലും നാട്ടിൽ പോകാമെന്ന് കരുതിയെങ്കിലും അതിനും കഴിയാതെ വിഷമിക്കുകയാണ്.