കുവൈത്തിലേക്ക് യുവതികളെ എത്തിക്കുന്നതിന്റെ ആസൂത്രകന്‍ കേസിലെ രണ്ടാംപ്രതിയും പത്തനംതിട്ട സ്വദേശിയുമായ അജുമോനാണെന്ന് തുറന്നുപറഞ്ഞ് കുവൈത്തില്‍ ഒളിവില്‍ കഴിയുന്ന ഒന്നാംപ്രതി മജീദ്.

താന്‍ കുവൈറ്റ് റിക്രൂട്ടിംഗ് കമ്ബനിയിലെ വെറുമൊരു ഡ്രൈവര്‍ മാത്രമാണ്. അറബി പറയുന്നതിന് അനുസരിച്ച്‌ പണം അയച്ചുകൊടുക്കുക മാത്രമാണ് ചെയ്തിട്ടുള്ളത്. ഒന്നരലക്ഷമാണ് അജുവിന്റെ കമ്മിഷനെന്നും പുറത്തുവിട്ട വീഡിയോയില്‍ മജീദ് പറയുന്നു. മജീദിന്റെ വിശദീകരണം പൊലീസ് അപാടേ തള്ളുകയാണ്. യുവതികളെ
കുവൈത്തിലെത്തിക്കുന്നതിന് പിന്നില്‍ മജീദാണെന്നാണ് അജുമോന്റെ മൊഴി.

ഇന്നലെ രാവിലെയാണ് മജീദ് വീഡിയോ മാദ്ധ്യമങ്ങള്‍ക്ക് നല്‍കിയത്. കുവൈത്തിലെ ഒളിസങ്കേതത്തില്‍നിന്ന് പകര്‍ത്തിയ വീഡിയോയാണിതെന്നാണ് കുരുതുന്നത്. ജോലിക്കായി ഒരാളെ നല്‍കിയാല്‍ അറബികള്‍ രണ്ടുലക്ഷംരൂപ താന്‍ ജോലിചെയ്യുന്ന കമ്ബനിക്ക് നല്‍കും. ഒന്നരലക്ഷംരൂപ അജുവിന് കമ്മീഷന്‍ നല്‍കും.

ഇതുവരെ 30പേര്‍ അജുവഴി കുവൈത്തില്‍ എത്തിയിട്ടുണ്ടെന്ന് മജീദ് പറഞ്ഞു. മജീദിനായി പൊലീസ് ലുക്കൗട്ട് നോട്ടീസ് പുറത്തിറക്കിയിരുന്നു. മജീദ് തന്നെയാണ് മനുഷ്യക്കടത്തിന്റെ ആസൂത്രകനെന്നാണ് പൊലീസ് പറയുന്നത്.മജീദിനെ നാട്ടിലെത്തിക്കാനുള്ള ശ്രമങ്ങളുമായി മുന്നോട്ടുപോവുകയാണ് കേരള പൊലീസ്. ഇയാളുടെ സഹായിയായ കോഴിക്കോട് സ്വദേശിയെ ഉടന്‍ കസ്റ്റഡിയിലെടുക്കും. അറസ്റ്റിലായ ഒന്നാംപ്രതി അജുമോന്‍ നടത്തിയിരുന്ന രവിപുരത്തെ 'ഗോള്‍ഡന്‍ വിയ' എന്ന സ്ഥാപനത്തിന്റെ മാനേജരായി പ്രവര്‍ത്തിച്ച കൊല്ലം സ്വദേശി ആനന്ദിനെതിരെയും സൗത്ത് പൊലീസിന് പരാതി ലഭിച്ചിട്ടുണ്ട്.

ഇയാളെക്കുറിച്ചും അന്വേഷണം ആരംഭിച്ചു. മനുഷ്യക്കടത്ത് കേസില്‍പ്പെട്ട് മടങ്ങിയെത്തിയ തൃക്കാക്കര സ്വദേശിനി നല്‍കിയ പരാതിയിലാണ് ഇയാളുടെ പേരുള്ളത്. കുവൈത്തില്‍ ജോലിചെയ്യുന്ന മലയാളി സ്ത്രീക്കുനേരെ മജീദ് വധഭീഷണി മുഴക്കിയതായി തൃക്കാക്കര സ്വദേശിനിയുടെ മൊഴിയും വിശദമായി പരിശോധിച്ച്‌ വരികയാണ്.