ഇന്ത്യക്കാര്‍ ഉള്‍പ്പെടെ വിദേശ തൊഴിലാളികള്‍ക്കും ഹജ്ജ് ഉംറ തീര്‍ഥാടകര്‍ക്കും സന്ദര്‍ശകര്‍ക്കുമെല്ലാം കനത്ത സാമ്പത്തിക ബാധ്യത വരുത്തുന്ന രീതിയില്‍ സൗദിയില്‍ വിസാ ഫീസും എക്‌സിറ്റ് റീഎന്‍ട്രി ഫീസും കുത്തനെ വര്‍ധിപ്പിച്ചു. എക്‌സിറ്റ് റീഎന്‍ട്രി,ബിസിനസ് ട്രിപ്പുകള്‍ തുടങ്ങിയ വകയില്‍ സൗദിയിലെ ചെറുതും വലുതുമായ എല്ലാ സ്ഥാപനങ്ങളും വന്‍ തുക ചെലവഴിക്കേണ്ടി വരും. ഗതാഗത നിയമ ലംഘനങ്ങളുടെയും സ്ട്രീറ്റ് പരസ്യങ്ങളുടെയും ഫീസുകളും വര്‍ധിപ്പിച്ചിട്ടുണ്ട്. പുതുക്കിയ ഫീസ് ഒക്ടോബര്‍ രണ്ടു മുതല്‍ സൗദിയില്‍ പ്രാബല്യത്തില്‍ വരും.

വിദേശ തൊഴിലാളികള്‍ക്ക് സൗദിക്ക് പുറത്ത് പോകാനുള്ള എക്‌സിറ്റ് റീഎന്‍ട്രിയടിക്കാനുമുള്ള ഫീസ് രണ്ടു മാസത്തേക്ക് 200 റിയാല്‍ തന്നെയായിരിക്കും. എന്നാല്‍ തുടര്‍ന്നുള്ള ഓരോ മാസത്തിനും 100 റിയാല്‍ വീതം നല്‍കണം. അതായത് ആറു മാസത്തെ എക്‌സിറ്റ് റീഎന്‍ട്രിക്ക് ഇതുവരെ 200 റിയാല്‍ നല്‍കിയിരുന്ന സ്ഥാനത്ത് ഇനി മുതല്‍ 600 റിയാല്‍ നല്‍കണം. ഒരു വര്‍ഷത്തേക്ക് 1200 റിയാല്‍. അഞ്ചംഗ കുടുംബത്തിന് ഒരു വര്‍ഷത്തെക്ക് നാട്ടില്‍ പോകണമെങ്കില്‍ എക്‌സിറ്റ് റീ എന്‍ട്രിക്ക് മാത്രം 6000 റിയാല്‍ വേണം. മൂന്നു മാസത്തെ മള്‍ട്ടിപ്പ്ള്‍ റീഎന്‍ട്രിക്ക് 500 റിയാലും തുടര്‍ന്നുള്ള ഓരോ മാസത്തിനും 200 റിയാല്‍ വീതവുമായിരിക്കും ഫീസ്.

ഹജ്ജ്ഉംറ വിസകള്‍ക്ക് രണ്ടായിരം റിയാല്‍ ഫീസ് ഈടാക്കും. മള്‍ട്ടിപ്പ്ള്‍ വിസിറ്റ് വിസയ്ക്ക് ആറു മാസത്തേക്ക് 3000 ഒരു വര്‍ഷത്തേക്ക് 5000 രണ്ടു വര്‍ഷത്തേക്ക് 8000വും റിയാല്‍ നല്‍കണം. 300 റിയാല്‍ ആയിരിക്കും ട്രാന്‍സിറ്റ് വിസാ ഫീസ്. ഇന്ത്യക്കാര്‍ ഉള്‍പ്പെടെ വിദേശ തൊഴിലാളികള്‍ക്കും ഹജ്ജ് ഉംറ തീര്‍ഥാടകര്‍ക്കും സന്ദര്‍ശക വിസക്കാര്‍ക്കുമെല്ലാം കനത്ത സാമ്പത്തിക ബാധ്യത ഉണ്ടാക്കുന്നതാണ് പുതിയ നിയമം.