മനുഷ്യന്റെ ജീവിതവും അവന്റെ സാഹചര്യങ്ങളും വളരെയധികം വ്യത്യസ്തത നിറഞ്ഞതാണ്. അതിനെ പുച്ഛിക്കുന്നവര്‍ അറിയാന്‍ അത് മാറാനും നിമിഷങ്ങള്‍ മതി.. ഒരു സിനിമാക്കഥയെ അനുസ്മരിപ്പിക്കുമാറുള്ള കഥയുടെ തുടക്കം അങ്ങു സൗദിയില്‍ നിന്നാണ്.

സൗദിയില്‍ ക്ലീനറായി ജോലി ചെയ്യുന്ന നാസര്‍ അല്‍ ഇസ്ലാം അബ്ദുല്‍ കരീം എന്ന മനുഷ്യന്‍ ജോലി ചെയ്യുന്നതിനിടയില്‍ ഒരു ജൂവലറിയുടെ മുന്നില്‍ നിന്ന് ആഭരണങ്ങളിലേക്കു കൊതിയോടെ നോക്കുമ്പോള്‍ ഒരിക്കലും ആ മനുഷ്യന്‍ കരുതിയിരുന്നില്ല അതു തനിക്കു സ്വന്തമാകുമെന്ന്.

അറുപത്തിയഞ്ചുകാരനായ നാസര്‍ പതിവുപോലെ ക്ലീനിങ്ങിന് എത്തിയപ്പോഴാണ് ജ്വല്ലറിക്കു മുന്നില്‍ നിന്നു ആഭരണങ്ങളെ നോക്കിനിന്നത്. ആ സമയം തന്നെ തന്റെ ഫോട്ടോ ആരോ എടുത്തതായി തോന്നിയെങ്കിലും നാസര്‍ കാര്യമാക്കിയില്ല. അധികം താമസിയാതെ സമൂഹ

മാധ്യമത്തില്‍ നാസര്‍ ആഭരണങ്ങളെ നോക്കിനില്‍ക്കുന്ന ചിത്രം വൈറലായി. ഇയാള്‍ക്കു മാലിന്യം നോക്കി നില്‍ക്കാന്‍ മാത്രമേ അര്‍ഹതയുള്ളു എന്ന അടിക്കുറിപ്പോടെ നാസറിനെ പരിഹസിച്ചായിരുന്നു ചിത്രം ഷെയര്‍ ചെയ്യപ്പെട്ടത്. ഇതു കണ്ട നന്മയുള്ള ഒരു അറബിയാണ് നാസറിന്റെ ജീവിതത്തില്‍ വെളിച്ചമായി വന്നത്.

അബ്ദുള്ള അല്‍ഖ്വഹാതാനി എന്ന അറബിയുടെ കണ്ണുകളിലാണ് നാസറിന്റെ ഈ ദയനീയചിത്രം ഉടക്കിയത്. ഉടന്‍ തന്നെ ഇദ്ദേഹത്തെ കണ്ടെത്തിത്തരാന്‍ സഹായിക്കണം എന്നാവശ്യപ്പെട്ട് അറബി ട്വീറ്റ് ചെയ്തു. ആറായിരത്തോളം റീട്വീറ്റിനൊടുവില്‍ നാസറിനെ കണ്ടെത്തുക തന്നെ ചെയ്തു. നാസറിന്റെ ഫോട്ടോയിലുള്ള ഗ്ലാസില്‍ നിന്നുള്ള പ്രതിബിബം പരിശോധിച്ചാണ് സ്ഥലം കണ്ടെത്തിയത്. ശേഷം നാസര്‍ ആഗ്രഹിച്ചതുപോലെ ആ ആഭരണങ്ങള്‍ അദ്ദേഹത്തിനു കൈമാറുകയാണ് അറബി ചെയ്തത്.

ഇതു കൂടാതെ ട്വീറ്റുകള്‍ ഷെയര്‍ ചെയ്യപ്പെട്ടതോടെ ധാരാളം പേര്‍ നാസറിനു സഹായ വാഗ്ദാനവുമായി എത്തിരിക്കുകയാണത്രേ. രാജ്യത്തേക്കു പോയി വരാനുള്ള ടിക്കറ്റും ഒരു ഐഫോണും സാംസങ് ഗാലക്‌സിയും പണവുമൊക്കെ നാസറിനു സമ്മാനിച്ചവരുണ്ട്. കേവലം പതിമൂന്നായിരം രൂപ മാത്രമാണ് നാസറിന്റെ പ്രതിമാസ വരുമാനം. തനിക്ക് ലഭിച്ച പുതിയ സമ്മാനങ്ങളുമായി നാസര്‍ നില്‍ക്കുന്ന ഫോട്ടോകളും പുറത്ത് വന്നിട്ടുണ്ട്. എന്തായാലും വെറുതെ ഒരു നിമിഷത്തേക്ക് ആ ഫോട്ടോയില്‍ നോക്കിനിന്നത് നാസറിന്റെ ജീവിതത്തിന് ഒരു വഴിത്തിരിവായി.