മസ്‌കറ്റ്‌ അന്താരാഷ്ട്ര പുസ്തകമേളക്ക് ഈ മാസം 22 ന് തുടക്കമാകും. ഒമാന്‍ കണ്‍വെന്‍ഷന്‍ ആന്‍ഡ് എക്‌സിബിഷന്‍ സെന്ററിലാണ് മേളയെന്ന് സംഘാടക സമിതി മേധാവിയും ഇന്‍ഫര്‍മേഷന്‍ മന്ത്രിയുമായ ഡോ. അബ്ദുല്‍ മുനീം ബിന്‍ മന്‍സൂര്‍ അല്‍ ഹസനി വാര്‍ത്താസമ്മേളനത്തില്‍ അറിയിച്ചു. ഇന്‍ഫര്‍മേഷന്‍ മന്ത്രാലയം അണ്ടര്‍ സെക്രട്ടറി അലി ബിന്‍ ഖല്‍ഫാന്‍ അല്‍ ബാജ്രി, പൈതൃക സാംസ്‌കാരിക മന്ത്രാലയം അണ്ടര്‍ സെക്രട്ടറി ശൈഖ് ഹമദ് ബിന്‍ ഹിലാല്‍ അല്‍ മഅ്മരി, ബുക്ക് ഫെയര്‍ ഡയറക്ടര്‍ യൂസുഫ് ബിന്‍ ഇബ്രാഹീം അല്‍ ബലൂഷി എന്നിവരും വാര്‍ത്താസമ്മേളനത്തില്‍ പങ്കെടുത്തു. 22 ന് തുടങ്ങുന്ന പുസ്തകമേള മാര്‍ച്ച് നാലിന്തീരും. നേരിട്ടും ഏജന്‍സികളിലൂടെയും മറ്റും 28 രാഷ്ട്രങ്ങളില്‍ നിന്ന് 750 പ്രസാധകര്‍ പുസ്തകമേളയില്‍ പങ്കെടുക്കും. മേളയിലെ വിശിഷ്ടാതിഥി സൊഹാര്‍ വിലായത്തായിരിക്കും.

ഔദ്യോഗിക സംഘടനകള്‍, വിദേശ പുസ്തകങ്ങള്‍, കുട്ടികളുടെ പുസ്തകങ്ങള്‍, സാംസ്‌കാരിക, കലാ വിഭാഗങ്ങളിലുള്ള പുസ്തകങ്ങള്‍ എന്നിവക്ക് പ്രത്യേകം പവലിയനുകള്‍ ഉണ്ടാകും. കഴിഞ്ഞവര്‍ഷം 8550 സ്‌ക്വയര്‍ മീറ്ററിലായി 950 പവലിയനുകളാണ് ഉണ്ടായിരുന്നത്. ഈ വര്‍ഷം അത് 12,114 സ്‌ക്വയര്‍ മീറ്റര്‍ സ്ഥലത്തായി 1200 പവലിയനുകളുണ്ടാകും. 30 ശതമാനം പുതിയ പുസ്തകങ്ങളുള്‍പ്പടെ നാലരലക്ഷം പുസ്തകങ്ങളാണ് മേളക്കായി എത്തുന്നത്. 37 ഔദ്യോഗിക ഏജന്‍സികളും അറബ്, ഗള്‍ഫ്, വിദേശ രാഷ്ട്രങ്ങളില്‍നിന്നായി 34 പ്രസാധകരും ഈ മേളയില്‍ പങ്കെടുക്കും. ചില പുസ്തകങ്ങളുടെ രചയിതാക്കളും പവലിയനുകളില്‍ ഉണ്ടാകും. 
സാംസ്‌കാരിക പരിപാടികള്‍ക്കായി മൂന്നു ഹാളുകള്‍ മേളയിലുണ്ടാകും. 

ഇതോടൊപ്പം കുട്ടികളുടെ പരിപാടിക്ക് പ്രത്യേക വിഭാഗവും ഉണ്ടാകും. വെള്ളിയാഴ്ചകള്‍ ഒഴിച്ചുള്ള ദിവസങ്ങളില്‍ രാവിലെ പത്ത് മുതല്‍ രാത്രി പത്തു വരെയാണ് പ്രദര്‍ശനത്തിലെ പ്രവേശനം. വെള്ളിയാഴ്ചകളില്‍ വൈകുന്നേരം നാലുമുതല്‍ പത്തുവരെയായിരിക്കും പ്രവേശം. മേളയുടെ നടത്തിപ്പിന് നാഷനല്‍ ഹ്യുമന്‍ റൈറ്റ്‌സ് കമീഷന്‍, നാഷനല്‍ യൂത്ത് കമീഷന്‍ തുടങ്ങി വിവിധ ഏജന്‍സികളും കമ്മിറ്റികളും സഹകരിക്കുന്നുണ്ട്.