അടുത്ത അധ്യയന വര്‍ഷം മുതല്‍ ദുബായില്‍ സ്വകാര്യ സ്‌കൂളുകള്‍ക്ക് ഫീസ് വര്‍ധിപ്പിക്കാന്‍ അനുമതി നല്‍കി. നോളജ് ആന്‍ഡ് ഹ്യൂമന്‍ ഡവലപ്‌മെന്റ് അതോറിറ്റി (കെഎച്ച്ഡിഎ) നടത്തിയ പരിശോധനാ റിപ്പോര്‍ട്ടില്‍ സ്‌കൂളിന്റെ നിലവാരമനുസരിച്ചു ഫീസ് വര്‍ധിപ്പിക്കാനാണ് അനുമതി നല്‍കിയിരിക്കുന്നത്. എല്ലാ സ്‌കൂളുകള്‍ക്കും നിലവിലെ ഫീസിന്റെ 2.4 ശതമാനം വര്‍ധിപ്പിക്കാന്‍ അനുമതിയുണ്ട്. പ്രവര്‍ത്തന ചെലവ്, അധ്യാപകരുടെ ശമ്പളം, വാടക, അറ്റകുറ്റപ്പണി, ജല-വൈദ്യുതി ബില്‍ തുടങ്ങി സ്‌കൂളിന്റെ ദൈനംദിന ചെലവ് കണക്കിലെടുത്താണ് ഫീസ് വര്‍ധിപ്പിക്കുന്നതിനുളള തീരുമാനം എടുത്തിരിക്കുന്നത്. 

പരിശോധനയില്‍ ഉന്നത നിലവാര പട്ടികയിലെത്തിയ സ്‌കൂളുകള്‍ക്ക് സൂചികയുടെ ഇരട്ടിയും. ഔട്ട്സ്റ്റാന്‍ഡിങ് സ്‌കൂളുകള്‍ക്ക് 4.8 %, വെരി ഗുഡ് വിഭാഗത്തിന് 4.2% ഗുഡ് സ്‌കൂളുകള്‍ക്ക് 3.6 % എന്നിങ്ങനെ ഫീസ് വര്‍ധിപ്പിക്കാം. ആക്‌സപ്റ്റബിള്‍, വീക്ക്, വെരി വീക്ക് വിഭാഗം സ്‌കൂളുകള്‍ക്കെല്ലാം 2.4 % ഫീസ് ആണ് വര്‍ധിപ്പിക്കാവുന്നത്. ഫീസ് വര്‍ധനവ് കുടുംബ ബഡ്ജറ്റ് താളം തെറ്റിക്കും. രക്ഷിതാക്കളുമായി നടത്തിയ ചര്‍ച്ചയെ തുടര്‍ന്ന് ഫീസ് വര്‍ധിപ്പിക്കാന്‍ ഉദ്ദേശിക്കുന്നില്ലെന്ന് ഒമ്പത് സ്‌കൂളുകളുള്ള തഅലീം ഗ്രൂപ്പ് വ്യക്തമാക്കി. ഈ ഗ്രൂപ്പിന് ഒന്‍പത് സ്‌കൂളുകളാണ് ദുബായില്‍ ഉളളത്.

ഘട്ടം ഘട്ടമായി ഫീസടയ്ക്കാനുള്ള സൗകര്യവും ഏര്‍പ്പെടുത്തിയത് രക്ഷിതാക്കള്‍ക്ക് ആശ്വാസമായി. സ്‌കൂളിനും രക്ഷിതാക്കള്‍ക്കും പ്രയാസമുണ്ടാകാത്ത നിലയിലാണ് ഫീസ് വര്‍ധനയെന്ന് കെഎച്ച്ഡിഎ മേധാവി മുഹമ്മദ് ദര്‍വിഷ് വിശദീകരിച്ചു. ഇത് വിദ്യാഭ്യാസ നിലവാരം ഉയര്‍ത്താന്‍ സ്‌കൂളുകളെ പ്രേരിപ്പിക്കും. സ്‌കൂളുകള്‍ക്ക് കടിഞ്ഞാണിടുക വഴി അമിത ഫീസ് വര്‍ധനയില്‍നിന്ന് രക്ഷിതാക്കളെ മോചിപ്പിക്കാനുമാകും. ഇതേ സമയം പുതിയ സ്‌കൂളുകള്‍ക്ക് മൂന്നു വര്‍ഷത്തേക്ക് ഫീസ് വര്‍ധിപ്പിക്കാനാവില്ലെന്നും അധികൃതര്‍ അറിയിച്ചു.