തെക്കൻ കാലിഫോർണിയയിലെ ബക്കെർഫീൽഡിൽ തോക്കുധാരിയായ അക്രമി ഭാര്യയെ ഉൾപ്പടെ അഞ്ചു പേരെ വെടിവച്ചു കൊന്ന ശേഷം ആത്മഹത്യ ചെയ്തതായി റിപ്പോർട്ടുകൾ. അക്രമി രക്ഷപ്പെടാൻ ശ്രമിക്കുന്നതിനിടെ പൊലീസുമായി ഏറ്റുമുട്ടുന്നതിനിടെയാണ് സ്വയം നിറയൊഴിച്ചത്.

സംഭവസമയം അക്രമിയും ഭാര്യയും കാലിഫോർണിയയിലെ ​ബക്കെർഫീൽഡിലെ ട്രാവലിങ്ങ്​ കമ്പനിയിലേക്ക്​ ചെന്ന്​ അവിടെ ഒരാളുമായി വാക്കു തർക്കത്തിലേർപ്പെടുന്നതിനിടെ ഇയാൾ ആദ്യം സ്വന്തം ഭാര്യയെ വെടി​വെടിവച്ചു വീഴ്ത്തി. തുടർന്ന്​ ഇയാളുമായി തർക്കിച്ച വ്യക്​തിയെയും സമീപത്തുണ്ടായിരുന്ന മറ്റൊരാളെയും വെടിവെച്ചു കൊന്നുവെന്ന് കെൻ കൗണ്ടി ഷെരിഫ്​ ഡോണി യങ്​ബ്ലഡ്​ പറഞ്ഞു. ശേഷം ഇയാൾ ഒരു വീട്ടിലേക്ക്​ ഇടിച്ചു കയറി രണ്ടുപേരെക്കൂടി വെടിവെച്ചു വീഴ്ത്തുകയായിരുന്നു.

ഒരു സ്​ത്രീയും കുട്ടിയും സഞ്ചരിച്ചിരുന്ന വാഹനം തട്ടിയെടുത്ത്​ രക്ഷപ്പെടാൻ ശ്രമിക്കുന്നതിനിനെ പൊലീസുമായി ഏറ്റുമുട്ടിയ അക്രമി ഇതിനിടയിൽ സ്വയം വെടിവെച്ചു മരിക്കുകയായിരുന്നു. അതേസമയം അക്രമത്തിനു പിന്നിലെ പ്രേരണ വ്യക്​തമായിട്ടില്ല. സംഭവത്തിൽ പൊലീസ്​ അന്വേഷണം ആരംഭിച്ചതായി അധികൃതർ അറിയിച്ചു.