അമേരിക്കയിലെ മിനിസോട്ട നഗരത്തിലെ ഗില്‍ബര്‍ട്ടയിൽ ജനങ്ങൾ പക്ഷികളെക്കൊണ്ട് പൊറുതിമുട്ടിയിരിക്കുകയാണ്. പഴം കഴിച്ചു മത്ത് പിടിച്ച പക്ഷികൾ വാഹനങ്ങളിലും വീടുകളുടെ ജനാല ചില്ലുകളിലും പറന്നുവന്ന് ഇടിക്കുകയും വഴിയാത്രക്കാർക്കും വാഹനയാത്രികർക്കും ശല്യമാകുന്ന രീതിയിൽ പാറിപ്പറക്കുകയുമാണ്.

സംഭവത്തെത്തുടർന്ന് നഗരത്തില്‍ ക്രമരഹിതമായി പറക്കുന്ന ഇവ വാഹനങ്ങളില്‍ ഇടിക്കാന്‍ സാധ്യതയുണ്ടെന്നും ഇത് അപകടങ്ങൾക്ക് കാരണമായേക്കാമെന്നും പ്രദേശവാസികള്‍ക്ക് പോലീസ് മുന്നറിയിപ്പ് നല്‍കി.

പഴങ്ങളില്‍ നേരത്തേ പുളിപ്പ് വരുന്നതാണ് പക്ഷികളുടെ ഈ അവസ്ഥയ്ക്ക് കാരണം. ഇത്തരം പഴങ്ങളില്‍ എഥനോള്‍ ഉത്പാദിപ്പിക്കപ്പെടുകയും പഴങ്ങള്‍ക്ക് മദ്യത്തിന്റെ ഗുണങ്ങള്‍ കൈവരികയും, അവ കഴിച്ച പക്ഷികള്‍ക്ക് നിലതെറ്റുകയും ചെയ്യുന്നു.

ചെറിയ പക്ഷികളിലാണ് ഇത് കൂടുതലും കാണുന്നത്. പ്രായം ചെന്ന പക്ഷികളുടെ കരളുകൾക്ക് ടോക്‌സിനുകള്‍ വേര്‍തിരിച്ചെടുക്കാനുള്ള കഴിവ് ഉണ്ടാകാറില്ല. അതേസമയം സംഭവത്തില്‍ പരിഭ്രാന്തി വേണ്ടെന്നും ഏറെ വൈകാതെ പക്ഷികള്‍ സമചിത്തത വീണ്ടെടുക്കുമെന്നും അധികൃതര്‍ അറിയിച്ചു.