ക്രൈസ്റ്റ് ചര്‍ച്ചിലുണ്ടായ വെടിവെയ്പ്പിന്റെ നടുക്കത്തില്‍ നിന്നും ലോകം കരകയറും മുന്നേ നെതര്‍ലന്‍ഡിലും വെടിവെയ്പ്പ്; അജ്ഞാതന്റെ ആക്രമണത്തിൽ ഒരാൾ കൊല്ലപ്പെട്ടു; മൂന്നു പേരുടെ നില ഗുരുതരം
ന്യൂസിലാന്‍ഡിനെ ക്രൈസ്റ്റ് ചര്‍ച്ചിലുണ്ടായ വെടിവെയ്പ്പിന്റെ നടുക്കത്തില്‍ നിന്നും ലോകം കരകയറും മുന്നേ നെതര്‍ലന്‍ഡിലും വെടിവെയ്പ്പ്. യൂട്രെച്ച്‌ നഗരത്തിലെ ട്രാം യാത്രക്കാര്‍ക്ക് നേരെയാണ് അക്രമി വെടി വെച്ചത്. അജ്ഞാതന്റെ ആക്രമണത്തിൽ ഒരാള്‍ മരിക്കുകയും നിരവധിയാളുകള്‍ക്ക് പരിക്കേല്‍ക്കുകയും ചെയ്തു. ഇതിൽ മൂന്നുപേരുടെ നില ഗുരുതരമായി തുടരുന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
തോക്കുമായെത്തിയ ഒരാള്‍ ജനങ്ങള്‍ക്കു നേരെ വെടിയുതിര്‍ക്കുകയായിരുന്നു. പ്രാദേശിക സമയം തിങ്കളാഴ്ച രാവിലെ 10.45നാണു സംഭവം. ഇതേതുടര്‍ന്ന് ട്രാം സ്റ്റേഷനു സമീപത്തെ അക്രമമുണ്ടായ സ്ഥലത്ത് പൊലീസിനെ വിന്യസിച്ചതായി യൂട്രെച്ച്‌ പൊലീസ് പറഞ്ഞു.
അതേസമയം തീവ്രവാദയാക്രമണമെന്നാണ് വിലയിരുത്തലുകള്‍. അക്രമിയെ ഇതുവരെ പിടികൂടാനായിട്ടില്ലെന്നാണ് സൂചന. സംഭവത്തെ തുടര്‍ന്ന് പ്രദേശത്തെ ട്രാം സര്‍വീസ് നിര്‍ത്തി വെച്ചിരിക്കുകയാണ്.
https://www.facebook.com/Malayalivartha
