ചൈനീസ് മൊബൈൽ നിർമ്മാതാക്കളായ ഹുവാവെയുടെ ആന്‍ഡ്രോയിഡ് ലൈസന്‍സ് ഗൂഗിള്‍ റദ്ദാക്കി. ഹാര്‍ഡ് വെയര്‍, സോഫ്റ്റ്‌വെയര്‍ കൈമാറ്റത്തിന് പുറമെ ടെക്‌നിക്കല്‍ സേവനങ്ങളും ഗൂഗിള്‍ നിര്‍ത്തിയെന്നാണ് റിപ്പോര്‍ട്ട്. ഇതോടെ ഹുവാവെ-ഹോണർ ഫോണുകളിൽ ആൻഡ്രോയ്ഡ് ഒ.എസ് അപ്ഡേറ്റ് ചെയ്യാനാകാത്ത സ്ഥിതിയായിരിക്കുകയാണ്. അതേസമയം നിലവിലെ വാവെയ് സ്മാര്‍ട്ട്‌ഫോണുകളെ ബാധിക്കില്ലെങ്കിലും ഭാവിയില്‍ വാവെയ് ഫോണുകളില്‍ അപ്‌ഡേഷനുകളൊന്നും ലഭിച്ചേക്കില്ലെന്നുമാണ് സൂചന.

എന്നാൽ അമേരിക്കൻ പ്രസിഡണ്ടിന്റെ എക്സിക്യുട്ടീവ് ഓർഡർ അനുസരിച്ചാണ് തങ്ങളുടെ നടപടിയെന്ന് ഗൂഗിൾ വ്യക്തമാക്കി. ഗൂഗിൾ പ്ലേ, ഗൂഗിള്‍ പ്ലേ പ്രൊട്ടക്ട് എന്നിവിടങ്ങളിൽ നിലവിലുള്ള ഹുവേയ് പ്രോഡക്ടുകൾ തുടർന്നു ലഭ്യമാകുമെങ്കിലും ഇവയുടെ അടുത്ത പതിപ്പ് ലഭിക്കില്ല. ചൈനയ്ക്കു പുറത്തുള്ള ഡിവൈസുകളിൽ ഗൂഗിളിന്റെ മറ്റ് പ്രോഡക്ടുകളും ഉപയോഗിക്കാൻ ഹുവേയ് സ്മാർട്ഫോണുകള്‍ക്ക് സാധിക്കില്ല.

ഡോണൾഡ് ട്രംപ് ഭരണകൂടം ചൈനീസ് കമ്പനിയെ കരിമ്പട്ടികയിൽപ്പെടുത്തിയതോടെയാണ് ബന്ധം ഉപേക്ഷിക്കാൻ ഗൂഗിൾ തയ്യാറായത്. കഴിഞ്ഞ ആഴ്ചയാണ് അമേരിക്കൻ സർക്കാർ ഹൂവേയെ കരിമ്പട്ടികയിൽ പെടുത്തിയത്. അമേരിക്ക ശക്തമായ നിലപാട് സ്വീകരിച്ചതോടെ മറ്റ് രാജ്യങ്ങളും ഹൂവേയ്ക്കെതിരെ നീങ്ങുമെന്ന് ഉറപ്പായി കഴിഞ്ഞു. ഇതോടെ ഇന്ത്യ ഉൾപ്പടെയുള്ള സ്മാർട്ട് ഫോൺ വിപണിയിൽ ഹൂവേ നിലനിൽപ്പ് ഭീഷണി നേരിടുമെന്നാണ് വിവരം.

അതേസമയം ദേശീയ സുരക്ഷയ്ക്ക് വലിയ ഭീഷണി ഉയർന്നതിനാലാണ് ഈ നടപടിയെന്നാണ് ട്രംപ് വിശദീകരിച്ചത്. പടിഞ്ഞാറൻ രാജ്യങ്ങളിൽ ഹുവേയ് ചാരപ്രവർത്തനം നടത്താനുള്ള സന്നാഹങ്ങളൊരുക്കുകയാണെന്ന് ട്രംപ് ആരോപിക്കുന്നു. വരാനിരിക്കുന്ന 5ജി വോയ്സ്-ഡാറ്റ നെറ്റ്‌വർക്കുകൾക്ക് ആവശ്യമായ ഉപകരണങ്ങളിലാണ് ചാരപ്രവർത്തനത്തിനുള്ള സന്നാഹങ്ങൾ ഒരുക്കിയിരിക്കുന്നത്. പടിഞ്ഞാറൻ രാജ്യങ്ങളിലേക്ക് ഇവ ഇറക്കുമതി ചെയ്യുന്നതിലൂടെ വൻ ചാരപ്പണിക്കുള്ള സാധ്യതകളാണ് തെളിയുന്നതെന്ന് ട്രംപ് പറയുന്നു.

നിലവിൽ ആൻഡ്രോയ്ഡ് ഒ.എസ് ഉപയോഗിക്കുന്ന ഹൂവേ ഫോണുകളിൽ സെക്യൂരിറ്റി ഫീച്ചർ ഉൾപ്പടെ ഒരു അപേഡറ്റ് ലഭിക്കില്ല. ഗൂഗിളിൽനിന്നുള്ള സാങ്കേതികസഹായങ്ങൾ നിൽക്കുന്നതിനൊപ്പം പ്ലേ സ്റ്റോർ, മാപ്പ്, യൂട്യൂബ് ഉൾപ്പടെ ഗൂഗിൾ പ്ലേ സർവീസുകളെല്ലാം ഹൂവേ-ഹോണർ ഫോണിൽനിന്ന് വൈകാതെ അപ്രത്യക്ഷമാകുമെന്നാണ് റിപ്പോർട്ട്.

അതേസമയം ആൻഡ്രോയ്ഡ് ഓപ്പൺ സോഴ്സ് പ്രോജക്ടിലൂടെ ആൻഡ്രോയ്ഡ് പതിപ്പുകൾ അപ്ഡേറ്റ് ചെയ്യാനാകുമെന്ന സാധ്യത മാത്രമാണ് ഇനി ഹൂവേയ്ക്ക് മുന്നിലുള്ളത്. എന്നാൽ ഇത്തരത്തിൽ ആൻഡ്രോയ്ഡ് സേവനം സ്വീകരിക്കുമ്പോൾ വളരെ പരിമിതമായ സൌകര്യങ്ങൾ മാത്രാമാണ് ലഭ്യമാകുക.

ഹുവേയ് ഗൂഗിളിന്റെ നടപടിയോട് ഇതുവരെ പ്രതികരിച്ചിട്ടില്ല. എന്നാല്‍ ഗൂഗിളിന്റെ നീക്കം വാവെയ് കമ്പനിയെ തെല്ലും ഭയപ്പെടുത്തുന്നില്ലെന്നും റിപ്പോര്‍ട്ടുകളുണ്ട്. സ്വന്തമായി സോഫ്റ്റ് വെയറും ടെക്‌നോളജിയും കണ്ടെത്തി പ്രശ്‌നം പരിഹരിക്കാനുള്ള തയ്യാറെടുപ്പിലാണ് കമ്പനി. അടിപൊളി ക്യാമറ ഫീച്ചറുകളുമായി വാവെയ് അടുത്തിടെ രണ്ട് സ്മാര്‍ട്ട്‌ഫോണുകള്‍ പുറത്തിറക്കിയിരുന്നു. പി30 പ്രോ, പി30 എന്നിവയാണ് മോഡലുകള്‍. ഈ വര്‍ഷവും ഒത്തിരി പ്രത്യേകതകളുമായി വാവെയ് കമ്പനിയില്‍ നിന്ന് സ്മാര്‍ട്ട്‌ഫോണ്‍ എത്താനുണ്ട്. അതിനിടെയായാണ് കമ്പനിയ്ക്ക് ഇത്തരത്തിലൊരു തിരിച്ചടി നേരിടേണ്ടി വന്നത്.