പുകവലിയും മദ്യപാനവുമൊക്കെ ജീവന് അപകടമുണ്ടാക്കുന്നവ തന്നെയാണ്...പക്ഷേ ഫ്രാന്സില് കൊല്ലപ്പെട്ട ഇന്ത്യക്കാരനെ തിരിച്ചറിയാന് സഹായിച്ചത് സിഗററ്റ് ലൈറ്റര്!
കുഴിച്ചുമൂടിയ നിലയില് ഫ്രാന്സില് കണ്ടെത്തിയ ജീര്ണ്ണിച്ച മൃതദേഹം ഇന്ത്യക്കാരന്റേതെന്ന് സ്ഥിരീകരണം.
വടക്കന് ഫ്രാന്സിലെ ബോര്ബോര്ഗില് കഴിഞ്ഞ ഒക്ടോബറില് റോഡ് സൈഡില് കുഴിയെടുക്കുന്നതിനിടെയാണ് മെഷീന് ഓപറേറ്റര് ഒരു ചാക്ക് കുഴിച്ചിട്ട നിലയില് കണ്ടെത്തുന്നത്. ചാക്ക് തുറന്നുപരിശോധിക്കുമ്പോള് പുരുഷന്റേതാണോ സ്ത്രീയുടേതാണോ എന്ന തിരിച്ചറിയാന് പോലും കഴിയാത്തവിധം ജീര്ണ്ണിച്ച മൃതദേഹം കണ്ടെത്തി. എന്തെങ്കിലും രേഖകളോ മൊബൈല് ഫോണോ മൃതദേഹത്തിനൊപ്പമുണ്ടായിരുന്നില്ല. അതിനാല് അന്വേഷണം മുന്നോട്ടുപോകാന് കഴിയാത്ത വിധത്തിലായിരുന്നു പോലീസ്.
മൃതദേഹത്തില് നിന്നെടുത്ത ഡി.എന്.എ ഉപയോഗിച്ച് ഫ്രാന്സില് വ്യാപകമായ പരിശോധന നടന്നു. ഒരു പ്രയോജനമുണ്ടായില്ല. വിരലടയാളങ്ങളും ഉപയോഗിച്ചുവെങ്കിലും അന്വേഷണം മുന്നോട്ടുപോയില്ല. അതിനിടെയാണ് മൃതദേഹത്തിന്റെ ട്രൗസറിന്റെ പോക്കറ്റില് നിന്നും ഒരു ലൈറ്റര് കണ്ടെത്തുന്നത്. 'Kroeg Cafe' എന്ന ലൈറ്ററില് മുദ്രപതിച്ചിരുന്നു. ഇതാണ് അന്വേഷണത്തില് വഴിത്തിരിവായത്.
ഈ തെളിവിന്റെ ചിത്രം കണ്ട ബെല്ജിയം പോലീസ് ആണ് അന്വേഷണത്തില് നിര്ണായക വിവരങ്ങള് കണ്ടെത്തിയത്. ബെല്ജിയത്ത് താമസിച്ചുവന്നിരുന്ന ദര്ശന് സിംഗ് (42) എന്നയാളെ കഴിഞ്ഞ ജൂണ് മുതല് പോലീസ് തിരഞ്ഞുവരികയായിരുന്നു.
ലൈറ്ററില് കാണിച്ചിരിക്കുന്ന 'Kroeg Cafe' മുദ്ര ബെല്ജിയം, നെതര്ലാന്ഡ് എന്നിവിടങ്ങളില് സാധാരണയായി ഉപയോഗിക്കുന്ന പേരാണ്. മദ്യശാല എന്നാണ് ഇത് അര്ത്ഥമാക്കുന്നത്. ഡച്ച് അതിര്ത്തിക്കു സമീപമുള്ള റവേല്സിനു സമീപം കാണാതായ വ്യക്തിയുടെ വീടിനു സമീപത്തുള്ള മദ്യശാലയില് ഉപയോഗിക്കുന്നതാണ് ഈ ലൈറ്റര് എന്നും പോലീസ് കണ്ടെത്തി. ഇയാളുടെ വീട്ടില് നിന്നും കണ്ടെത്തിയ ടൂത്ത്ബ്രഷില് നിന്നെടുത്ത ഡി.എന്.എ മൃതദേഹത്തിലെ ഡി.എന്.എയുമായി ചേരുന്നതാണെന്ന് പോലീസിന് ബോധ്യപ്പെട്ടു.
ഇതോടെ ബെല്ജിയത്തില് നിന്നും കാണാതായ ഇന്ത്യക്കാരനാണ് കൊല്ലപ്പെട്ടതെന്ന് സ്ഥിരീകരിച്ചു. ബെല്ജിയം പോലീസിന്റെ തുടര്ന്നുള്ള അന്വേഷണത്തിലാണ് മറ്റൊരു ഇന്ത്യക്കാരനെ കഴിഞ്ഞ മാര്ച്ചില് ചോദ്യം ചെയ്തത്. ഇയാളെ കുറിച്ചുള്ള വിവരങ്ങളോ കൊലപാതകത്തിലേക്ക് നയിച്ച കാരണമോ പുറത്തുവിട്ടിട്ടില്ല. കേസുമായി ബന്ധപ്പെട്ട ഫയലുകള് ഫ്രഞ്ച് അധികൃതര് ബെല്ജിയം പോലീസിന് കൈമാറുമെന്നാണ് റിപ്പോര്ട്ട്.
https://www.facebook.com/Malayalivartha