പാകിസ്ഥാന്‍ ഭരണം നവാസ് ഷെറീഫിന്‌ തന്നെ, ഇമ്രാംഖാന്‍ രണ്ടാംസ്ഥാനത്ത്
12 MAY 2013 02:08 AM IST
മലയാളി വാര്‍ത്ത.
വോട്ടെണ്ണല്‍ പുരോഗമിക്കവെ പാകിസ്താനില്‍ നവാസ് ഷെരീഫ് മൂന്നാമതും പ്രധാനമന്ത്രി പദത്തിലേക്ക്. 1990-ലും 97-ലും പ്രധാന മന്ത്രിയായിരുന്ന ഷെരീഫിന്റെ പാര്‍ട്ടി പാകിസ്താന്‍ മുസ്‌ലീംലീഗ് എന്‍ കേവല ഭൂരിപക്ഷത്തിന്‌ തൊട്ടരുകിലാണ്‌. പാകിസ്താന്‍ മുസ്‌ലിം ലീഗ് 130 സീറ്റുകള്‍ നേടി. മുന്‍ ക്രിക്കറ്റ്താരം ഇമ്രാന്‍ഖാന്റെ തെഹരിക് ഇ ഇന്‍സാഫ് പാര്‍ട്ടിയാണ് രണ്ടാംസ്ഥാനത്ത്. ഭരണകക്ഷിയായ പാകിസ്താന്‍ പീപ്പിള്‍സ് പാര്‍ട്ടിയാണ് മൂന്നാമത്.
പാകിസ്താന്‍ ചരിത്രത്തില്‍ ആദ്യമായാണ് തിരഞ്ഞെടുക്കപ്പെട്ട സര്‍ക്കാര്‍ കാലാവധി പൂര്‍ത്തീകരിച്ച ശേഷം ജനാധിപത്യ രീതിയില്‍ തിരഞ്ഞെടുപ്പ് നടക്കുന്നത്. ഒറ്റയ്ക്ക് സര്‍ക്കാറുണ്ടാക്കാനുള്ള ഭൂരിപക്ഷം നവാസ് ഷെരീഫിന്റെ പാര്‍ട്ടിക്ക് ലഭിച്ചേക്കുമെന്നാണ് സൂചന. ദേശീയ അസംബ്ലിയില്‍ ആകെ 342 സീറ്റാണ് ഉള്ളത്.
പഞ്ചാബിലെ സര്‍ഗോദ മണ്ഡലത്തില്‍നിന്ന് ഷെരീഫും പെഷവാറില്‍നിന്ന് ഇമ്രാന്‍ഖാനും തിരഞ്ഞെടുക്കപ്പെട്ടു. ശനിയാഴ്ച വൈകീട്ട് പോളിങ് അവസാനിച്ച ഉടന്‍തന്നെ വോട്ടണ്ണെല്‍ തുടങ്ങിയിരുന്നു. വോട്ടെടുപ്പിനിടെയുണ്ടായ വിവിധ ആക്രമണങ്ങളില്‍ 32 പേര്‍ കൊല്ലപ്പെട്ടു. നിരവധി പേര്‍ക്ക് പരിക്കേറ്റു.
കറാച്ചിയില്‍ അവാമി നാഷണല്‍ പാര്‍ട്ടിയുടെ ഓഫീസിനു നേരേയുണ്ടായ ബോംബാക്രമണത്തില്‍ 11 പേര്‍ കൊല്ലപ്പെട്ടു. 40 പേര്‍ക്ക് പരിക്കേറ്റു. നഗരത്തില്‍ വിവിധ പ്രദേശങ്ങളില്‍ വെടിവെപ്പുണ്ടായതായും റിപ്പോര്‍ട്ടുകളുണ്ട്. പഞ്ചാബ്, സിന്ധ് പ്രവിശ്യകളിലെ വിവിധ പ്രദേശങ്ങളില്‍ എതിര്‍ രാഷ്ട്രീയപാര്‍ട്ടി പ്രവര്‍ത്തകര്‍ തമ്മില്‍ ഏറ്റുമുട്ടി. പാക് താലിബാന്റെ ശക്തിപ്രദേശമായ വടക്കന്‍ വസീരിസ്താനിലെ ആദിവാസി മേഖലകളില്‍ സ്ത്രീകളെ വോട്ടുചെയ്യുന്നതില്‍നിന്ന് വിലക്കിയിരുന്നു.
