ചൈനയോട് വളരെക്കൂടുതല്‍ അടുപ്പം കാണിച്ച മുന്‍ പ്രസിഡന്റ് മഹീന്ദ രാജപക്ഷെയെ ശ്രീലങ്കന്‍ തെരഞ്ഞെടുപ്പില്‍ പരാജയപ്പെടുത്താന്‍ ഇന്ത്യന്‍ രഹസ്യാന്വേഷണ ഏജന്‍സിയായ റോ(റിസര്‍ച്ച് അനലിസസ് വിങ്)യെ ഉപയോഗിച്ചെന്ന് ആരോപണം. പ്രതിപക്ഷവുമായി ഇന്ത്യ കൂടുതല്‍ അടുപ്പത്തിലാവുന്നു എന്നു ചൂണ്ടിക്കാട്ടി കൊളംബോയിലെ റോയുടെ മേധാവിയെ തിരിച്ചു വിളിക്കാന്‍ തിരഞ്ഞെടുപ്പിന് ഒരുമാസം മുന്‍പ് ശ്രീലങ്ക ഇന്ത്യയോട് ആവശ്യപ്പെട്ടിരുന്നു. 
രാജപക്ഷെയുടെ കാലത്ത് അദ്ദേഹം ചൈനയോട് കൂടുതല്‍ അടുപ്പം കാണിച്ചിരുന്നു. ഇത് ഇന്ത്യയെ കൂടുതല്‍ ആശങ്കയിലാക്കി. രണ്ടു ചൈനീസ് അന്തര്‍വാഹനികള്‍ക്ക് ലങ്കന്‍ തീരത്ത് നങ്കൂരമിടാന്‍ രാജപക്ഷെ അനുമതി നല്‍കിയതും എട്ടു കൊല്ലത്തിനിടയില്‍ ഏഴു തവണ രാജപക്ഷെ ചൈന സന്ദര്‍ശിച്ചതും ഇന്ത്യയെ അലട്ടിയിരുന്നതായും മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്.
ശ്രീലങ്കയുടെ പുതിയ പ്രസിഡന്റ് മൈത്രിപാല സിരിസേനയുമായി റോയിലെ ഉദ്യോഗസ്ഥര്‍ നിരന്തരം ബന്ധപ്പെട്ടിരുന്നതായി നേരത്തെ ശ്രീലങ്കയിലെ ചില മാധ്യമങ്ങള്‍ റിപ്പോര്‍ട്ട് ചെയ്തിരുന്നു. പ്രതിപക്ഷവുമായി ഇന്ത്യയ്ക്ക് അടുത്ത ബന്ധമാണുള്ളതെന്നും റിപ്പോര്‍ട്ടിലുണ്ടായിരുന്നു.
അതേസമയം ഇത് സാധാരണ നിലയിലുള്ള സ്ഥലം മാറ്റമാണിതെന്നും തെരഞ്ഞെടുപ്പുമായി ഇതിന് ബന്ധമില്ലെന്നും ഇന്ത്യന്‍ വിദേശകാര്യ മന്ത്രാലയ വക്താവ് അറിയിച്ചു. രാജപക്ഷെ ചൈനയെ ഇന്ത്യയ്‌ക്കെതിരെ ഉപയോഗിക്കുകയും ഇന്ത്യയെ ചൈനയ്‌ക്കെതിരെ ഉപയോഗിക്കുകയും ചെയ്‌തെന്ന് ലങ്കയുടെ പുതിയ പ്രധാനമന്ത്രി റനില്‍ വിക്രമസിംഗെ ഇന്നലെ വ്യക്തമാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha