പുല്‍വാമ ഭീകരാക്രമണത്തില്‍ വീരമൃത്യു വരിച്ച ജവാന്‍മാരുടെ കുടുംബങ്ങള്‍ക്ക് 1 കോടിയോളം രൂപ ധനസഹായമായി നല്‍കിയെന്ന് കേന്ദ്രസര്‍ക്കാര്‍. പുല്‍വാമ ഭീകരാക്രമണത്തില്‍ വീരമൃത്യു വരിച്ച 40 ജവാന്‍മാരുടെ കുടുംബങ്ങള്‍ക്ക് 1 കോടിയോളം രൂപയുടെ ധനസഹായം നല്‍കിയതായി കേന്ദ്രസര്‍ക്കാര്‍. രാജ്യസഭയിലാണ് സര്‍ക്കാര്‍ ഇക്കാര്യം വ്യക്തമാക്കിയത്.

കേന്ദ്രസര്‍ക്കാരിന്റെ നസഹായ ഇനത്തില്‍ 35 ലക്ഷം, സംസ്ഥാനത്തിന്റെ വകയില്‍ 5 ലക്ഷം, സിആര്‍പിഎഫ് റിസ്‌ക് ഫണ്ടില്‍ നിന്നും 20 ലക്ഷം, കേന്ദ്രത്തിന്റെ ക്ഷേമനിധിയില്‍ നിന്നും 1.5 ലക്ഷം, സ്റ്റേറ്റ് ബാങ്ക് ഓഫ് ഇന്ത്യയുടെ പാര്‍ലമെന്ററി സാലറി പാക്കേജ് കവറില്‍ നിന്നും 30 ലക്ഷം എന്നിങ്ങനെയാണ് ധനസഹായം ലഭ്യമാക്കിയത്. ഇതിനു പുറമേ, ജവാന്‍മാരുടെ കുടുംബങ്ങള്‍ക്ക് അവരവരുടെ സംസ്ഥാനത്തിന്റെ ധനസഹായവും ലഭ്യമാക്കിയിട്ടുണ്ടെന്ന് കേന്ദ്ര ആഭ്യന്തര സഹമന്ത്രി നിത്യാനന്ദ് റായ് രാജ്യസഭയില്‍ പറഞ്ഞു. പുല്‍വാമ ഭീകരാക്രമണത്തില്‍ ചാവേറുള്‍പ്പടെയുള്ള അഞ്ച് ഭീകരരില്‍ മൂന്ന് പേരെയും സുരക്ഷാ സേന വധിച്ചെന്നും ഒരാളെ അറസ്റ്റ് ചെയ്‌തെന്നും കേന്ദ്രമന്ത്രി ജി.കിഷന്‍ റെഡ്ഡി സഭയില്‍ അറിയിച്ചു. പ്രധാനമന്ത്രി നരേന്ദ്ര മോദിയുടെ ഭീകര വിരുദ്ധ നടപടികള്‍ കാരണം കഴിഞ്ഞ കുറച്ച് വര്‍ഷങ്ങളായി രാജ്യത്ത് ഭീകരവാദികളുടെ എണ്ണത്തില്‍ വലിയ കുറവാണുണ്ടായതെന്നും അദ്ദേഹം കൂട്ടിച്ചേര്‍ത്തു. 

അതേസമയം പുല്‍വാമ ഭീകരാക്രമണത്തില്‍ ഉള്‍പ്പെട്ട അഞ്ച് ഭീകരരില്‍ നാലുപേരെ വധിക്കുകയും ഒരാളെ അറസ്റ്റ് ചെയ്യുകയും ചെയ്തിരുന്നു ഈവിവരം കേന്ദ്രസര്‍ക്കാര്‍ തന്നെയാണ് അറിയിച്ചിരുന്നത്. ലോക്‌സഭയില്‍ നടന്ന ചര്‍ച്ചയില്‍ കേന്ദ്ര ആഭ്യന്തര സഹമന്ത്രി ജി കിഷന്‍ റെഡ്ഡിയായിരുന്നു ഇക്കാര്യം വ്യക്തമാക്കിയത്. ദേശീയ അന്വേഷണ ഏജന്‍സിയുടെ അന്വേഷണത്തില്‍ ഭീകരാക്രമണം ആസൂത്രണം ചെയ്തതും നടപ്പിലാക്കിയതും ജയ്‌ഷെ മുഹമ്മദാണെന്ന് വ്യക്തമായതായും അദ്ദേഹം ലോക്‌സഭയോട് വെളിപ്പെടുത്തി. ഭീകരാക്രമണത്തില്‍ ഉള്‍പ്പെട്ട അഞ്ച് പേരില്‍ ഒരാള്‍ സിആര്‍പിഎഫ് വാഹനത്തിലേക്ക് കാര്‍ ഇടിച്ചുകയറ്റിയ ചാവേര്‍ ആയിരുന്നു. ഇയാള്‍ ആക്രമണത്തില്‍ കൊല്ലപ്പെട്ടു. മറ്റുള്ള മൂന്നുപേരെ സുരക്ഷാസേന ഏറ്റുമുട്ടലില്‍ വധിക്കുകയും ഒരാളെ ജീവനോടെ പിടികൂടുകയും ചെയ്തുവെന്നും മന്ത്രി പറഞ്ഞു. വിഷയത്തില്‍ അന്വേഷണം തുടരുന്നുണ്ടെന്നും അദ്ദേഹം വ്യക്തമാക്കി.

ഫെബ്രുവരി 14 നാണ് രാജ്യത്തെ നടക്കിയ ഭീകരാക്രമണം നടന്നത്. അവധി കഴിഞ്ഞ് തിരികെ വരുകയായിരുന്ന ജവാന്മാരുടെ വാഹനവ്യൂഹത്തിന് നേരെ ആയിരുന്നു ഭീകരാക്രമണം ഉണ്ടായത്. ജമ്മുവില്‍ ഒരുമിച്ച് ചേര്‍ന്നതിന് ശേഷം ശ്രീനഗറിലേക്ക് പുറപ്പെട്ട ജവാന്‍മാരുടെ വാഹനവ്യൂഹം ആണ് ആക്രമിക്കപ്പെട്ടത്. ശ്രീനഗറില്‍ നിന്ന് 20 അകലെ ജമ്മു - ശ്രീനഗര്‍ ദേശീയപാതയിലെ അവന്തിപ്പൊരയിലാണ് സംഭവം. വാഹനവ്യൂഹത്തിന് നേരെ ഉഗ്രശേഷിയുള്ള ബോംബ് വച്ച വാഹനം ഓടിച്ചു കയറ്റി സ്ഫോടനം നടത്തുകയായിരുന്നു. 40 ജവാന്മാരാണ് ആക്രമണത്തില്‍ വീരമൃത്യുവരിച്ചത്.

 "