പീഡിപ്പിക്കാന് ശ്രമിച്ചയാളുടെ നാക്ക് കടിച്ചെടുത്ത് ഡി എന് എ തെളിവിനായി നല്കി
യു.കെ.യിലെ ഒരു യൂണിവേഴ്സിറ്റി ജീവനക്കാരിയായ ഇരുപത്തിയെട്ടുകാരി ജോലി കഴിഞ്ഞ് തിരികെ വീട്ടിലെത്താനായി ഒരു ഇടവഴിയിലേയ്ക്കു കയറുമ്പോഴാണ് പെട്ടെന്നൊരാള് അവളുടെ ദേഹത്തേക്ക് ചാടി വീണത്. താന് ലൈഗികാക്രമണത്തിന് വിധേയയാകുകയാണെന്ന് ഞെട്ടലോടെ അവള് മനസിലാക്കി. മറ്റു പലരുടെയും ജീവിതത്തില് നടക്കുന്നതായി പത്രങ്ങളിലും ടിവിയിലും വായിച്ചും കണ്ടും അറിഞ്ഞ കാര്യങ്ങള് സ്വന്തം ജീവിതത്തില് സംഭവിക്കാന് പോകുകയാണെന്നോര്ത്ത് അവള് ഞെട്ടി വിറങ്ങലിച്ചു.
തന്റെ ഇഷ്ടത്തിനെതിരായി തന്നെ കീഴടക്കാന് ശ്രമിക്കുന്ന വ്യക്തിയെ തടയുവാനുള്ള കായിക ശേഷി ഇല്ലാത്ത അബലയായ സ്ത്രീയാണെന്ന തോന്നല് നല്കുന്ന കഠിനമായ മനോവേദനയോടൊപ്പം, ആക്രമണം നടത്തുന്നവന് ഉദ്ദേശ്യം സാധിച്ചിട്ട് പോകുമ്പോള് അഭിമാനം ഇല്ലാതാകുന്നത് തനിക്കാണെന്ന ചിന്തയും അഗാധമായ ഷോക്കാണ് അവള്ക്ക് നല്കിയത്.
എങ്കിലും തന്നെ അപമാനിച്ചിട്ടു പോകുന്നവനെതിരെ പരമാവധി തെളിവുകള് ഉണ്ടാക്കി അവന് തക്കതായ ശിക്ഷ വാങ്ങി കൊടുക്കണം എന്ന് ആ സമയത്തും അവള് ചിന്തിച്ചുറപ്പിച്ചു. അതിനായി ഉഭയസമ്മതപ്രകാരമുള്ള ലൈംഗികബന്ധമായിരുന്നു അതെന്ന് പ്രതി പറയാതിരിക്കാന് അവന്റെ ദേഹത്തും മുഖത്തുമെല്ലാം പല്ലും നഖവും കൊണ്ട് കഴിയുന്നത്ര മുറിപ്പാടുകള് ഉണ്ടാക്കാന് ശ്രമിച്ചു. കൂടാതെ അവന്റെ നാക്കിന്റെ ഒരു ഭാഗം കടിച്ചു മുറിച്ചതോടെ അയാള് അവളെ ഉപേക്ഷിച്ചിട്ട് രക്ഷപ്പെട്ടു. കടിച്ചെടുത്ത നാക്കിന്റെ ഭാഗം ഭദ്രമായെടുത്ത് ഡി.എന്.എ പരിശോധനയ്ക്കായി പോലീസിനെ ഏല്പ്പിച്ചു.
രണ്ടു മാസങ്ങള്ക്കു ശേഷം മറ്റു മൂന്നു ആക്രമണങ്ങളുമായി ബന്ധപ്പെട്ട് ഫെര്ഡിനന്റ് മനില എന്ന ഇരുപത്തിയെട്ടുകാരന് പിടിയിലായി. ആ കുറ്റങ്ങളില് അയാള് ശിക്ഷിക്കപ്പെട്ടില്ലെങ്കിലും ഈ കേസില് അയാള്ക്കെതിരെയുള്ള ഡി.എന്.എ തെളിവ് ശക്തമായിരുന്നതിനാല് അയാള് ശിക്ഷിക്കപ്പെട്ടു. എന്നാല് പ്രതിയുടെ മാനസികാരോഗ്യനില ശരിയല്ലാത്തതിനാല് അയാളെ മാനസിക രോഗാശുപത്രിയില് പ്രവേശിപ്പിച്ചിരിക്കുകയാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivarthahttps://www.facebook.com/Malayalivartha
