ദേശീയ സുരക്ഷ ഉപദേഷ്ടാവ് അജിത് ഡോവലിന് പിന്നാലെ പ്രധാന മന്ത്രി നരേന്ദ്ര മോദിയും സൗദി സന്ദർശിക്കാൻ ഒരുങ്ങുന്നു. ഈ മാസം 29ന് മോദി സൗദിയിലേക്ക് പോകും.മാത്രമല്ല ഇന്ത്യയും സൗദി അറേബ്യയും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിന് മുന്നോടിയായി റിയാദില്‍ നടക്കുന്ന നിക്ഷേപക സംഗമത്തില്‍ മോദി പങ്കെടുക്കും. പ്രധാനമന്ത്രിയുടെ സന്ദര്‍ശനത്തിന് മുന്നോടിയായിട്ടായിരുന്നു ദേശീയ സുരക്ഷ ഉപദേഷ്ടാവ് അജിത് ഡോവല്‍ ഈ മാസം ആദ്യം സൗദി സന്ദര്‍ശിച്ചത്. നിക്ഷേപ സഹകരണം, ഉഭയകക്ഷി ബന്ധം എന്നിവ ശക്തിപ്പെടുത്തുന്നതിന്റെ ഭാഗമായിട്ടായിരുന്നു പ്രധാനമന്ത്രി സൗദി സന്ദര്‍ശിക്കുന്നത്.

ഒക്ടോബര്‍ 29, 30 തീയതികളില്‍ റിയാദില്‍ നടക്കുന്ന മൂന്നാമത് ഫ്യുച്ചര്‍ ഇന്‍വെസ്റ്റ്‌മെന്റ് ഇനിഷ്യേറ്റിവ് സംഗമത്തില്‍ അദ്ദേഹം പങ്കെടുക്കുന്നുണ്ട്. ആഗോള ബിസിനസ് മേഖലയിലെ പ്രമുഖരും നിക്ഷേപകരും ഈ സംഗമത്തില്‍ പങ്കെടുക്കും. ആഗോള തലത്തിലുള്ള വ്യാപാര, വാണിജ്യ വിഷയങ്ങളാണ് സമ്മേളനത്തിന്റെ മുഖ്യ അജണ്ടയാകുന്നത്. ഊര്‍ജ്ജം, വിനോദ സഞ്ചാരം, നയതന്ത്രം എന്നീ മേഖലകളില്‍ ഇന്ത്യയും സൗദിയുമായി നിലനില്‍ക്കുന്ന ബന്ധത്തിന് കൂടുതല്‍ കരുത്ത് പകരുന്നതായിരിക്കും പ്രധാനമന്ത്രിയുടെ സന്ദര്‍ശനം. 2016ലാണ് മോദി അവസാനമായി സൗദി അറേബ്യ സന്ദര്‍ശിച്ചത്. ദേശീയ സുരക്ഷ ഉപദേഷ്ടാവ് അജിത് ഡോവൽ സൗദി കിരീടാവകാശി അമീർ മുഹമ്മദ് ബിൻ സൽമാനുമായി കൂടിക്കാഴ്ച നടത്തിയിരുന്നു .