സിംഗപ്പൂരിലെ രാജ്യത്തെ ആദ്യ മനുഷ്യക്കടത്ത് കേസില്‍ ഇന്ത്യന്‍ ദമ്പതികള്‍ കുറ്റക്കാരാണെന്ന് കോടതി വിധിച്ചു. ജോലിക്കാരായ മൂന്നു പെണ്‍കുട്ടികളെ പീഡിപ്പിച്ചുവെന്ന കേസില്‍ നിശാ ക്ലബുകള്‍ നടത്തിയിരുന്ന പ്രിയങ്ക ഭട്ടാചാര്യ രാജേഷ് (31), മല്‍ക്കര്‍ സവലരാം ആനന്ദ് (51) എന്നിവരാണു വിചാരണ നേരിട്ടത്. കൂട്ടത്തില്‍ ഒരു പെണ്‍കുട്ടിയെ വേശ്യാവൃത്തിക്കു പ്രേരിപ്പിച്ചുവെന്നും പൊലീസ് പറയുന്നു.

തൊഴില്‍ വീസയില്‍ സിംപ്പൂരിലെത്തിച്ച ബംഗ്ലദേശി പെണ്‍കുട്ടികള്‍ക്കു പ്രതിമാസം 60,0000 രൂപയോളം ശമ്പളം വാഗ്ദാനം ചെയ്‌തെങ്കിലും നല്‍കിയിരുന്നില്ല. ആറ് മുറികളുള്ള ഫ്‌ലാറ്റില്‍ ദമ്പതികള്‍ക്കൊപ്പം താമസിച്ചിരുന്ന യുവതികള്‍ക്ക് കൊടിയ പീഡനമാണ് നേരിടേണ്ടി വന്നത്. യുവതികളെ ഫ്‌ലാറ്റ് വിട്ടുപോകാന്‍ അനുവദിച്ചിരുന്നില്ല. ഉപഭോക്താക്കള്‍ ടിപ്പായി നല്‍കുന്ന തുക പോലും ദമ്പതികളാണ് കൈപ്പറ്റിയിരുന്നത്.

പീഡനം സഹിക്കാന്‍ കഴിയാതെ യുവതികളില്‍ ഒരാള്‍ 2016 മേയില്‍ നെറ്റ്ക്ലബില്‍ നിന്ന് ഒളിച്ചോടി. മൂന്നു മാസത്തെ ശമ്പളം ലഭിക്കാതിരുന്നതിനെ തുടര്‍ന്ന് രണ്ട് യുവതികള്‍ 2016 ജൂണ്‍ ഒന്നു മുതല്‍ ജോലിക്കു പോകാതെയായി.

നിത്യ സന്ദര്‍ശകര്‍ക്കൊപ്പം രാത്രി ചെലവഴിക്കാന്‍ യുവതികളെ നിര്‍ബന്ധിച്ചിരുന്നു. പാസ്‌പോര്‍ട്ട് ദമ്പതികള്‍ പിടിച്ചെടുത്തതായും അതിക്രൂരമായ മര്‍ദനത്തിന് ഇരയാക്കിയതായും യുവതികള്‍ ആരോപിച്ചു. ഇതെല്ലാം ദമ്പതികള്‍ നിഷേധിച്ചു. യുവതികളെ വ്യേശ്യാവൃത്തിക്കു പ്രേരിപ്പിച്ചിരുന്നില്ലെന്നായിരുന്നു ഇരുവരുടെയും പ്രതികരണം. ബ്ലംഗ്ലദേശിലേക്കു തിരിച്ചു പോകണമെങ്കില്‍ നഷ്ടപരിഹാരമായി ഭീമമായ തുക നല്‍കണമെന്നു പ്രിയങ്ക പറഞ്ഞതായി യുവതികളിലൊരാള്‍ വെളിപ്പെടുത്തി. ദമ്പതികള്‍ക്കുള്ള ശിക്ഷ പിന്നീട് വിധിക്കും.