ടിബറ്റൻ ആത്മീയാചാര്യൻ ദലൈലാമയുടെ ക്രിസ്‌മസ് സന്ദേശം ചിന്തനീയം. ചൈനയിലെ കമ്മ്യൂണിസ്റ്റുകാർക്ക് തോക്കിന്റെ ശക്തി മാത്രമാണ് കൈമുതലായി ഉള്ളതെന്നും എന്നാൽ തങ്ങളുടെ കൈവശം സത്യത്തിന്റെ കരുത്താനുള്ളതെന്നും വരുംകാലം കണക്കിലെടുക്കുമ്പോൾ സത്യത്തിന്റെ കരുത്ത് തോക്കിന്റെ ശക്തിയേക്കാൾ കൂടുതലാണെന്നും ലാമ അഭിപ്രായപ്പെട്ടു.

തന്റെ ക്രിസ്മസ് സന്ദേശത്തിലായിരുന്നു ലാമ ചൈനീസ് സർക്കാരിനെ കടന്നാക്രമിച്ചത്. ലോകത്തിൽ ഏറ്റവും കൂടുതൽ ബുദ്ധമതക്കാർ ഉള്ളത് ചൈനയിലാണെന്നും ശരിയായ ബുദ്ധിസം തങ്ങളുടേതാണെന്ന് ചൈനയിലെ ബുദ്ധമതക്കാർ ഇപ്പോൾ മനസിലാക്കി വരികയാണെന്നും അദ്ദേഹം പറയുകയുണ്ടായി . ഇന്ത്യയിലെ ഏറ്റവും പ്രധാനപ്പെട്ട ബുദ്ധമത കേന്ദ്രങ്ങളിൽ ഒന്നായ ബിഹാറിലെ ഗയ സന്ദർശിക്കാനെത്തിയതായിരുന്നു ലാമ. ഇവിടെ 14 ദിവസത്തേക്ക് തങ്ങാനും അദ്ദേഹത്തിന് പദ്ധതിയുണ്ട്. എട്ടാം നൂറ്റാണ്ടിലെ ബുദ്ധിസ്റ്റ് സന്യാസിയായ ശാന്തിദേവൻ എഴുതിയ 'ബോധിസത്വന്റെ ജീവിത വഴിയിലേക്കുള്ള സൂചിക' എന്ന ഗ്രന്ഥത്തെ പറ്റിയുള്ള ഒരു പ്രഭാഷണവും ഇവിടെ അദ്ദേഹം നടത്തും.