കസാക്കിസ്ഥാനിലെ അല്‍മാട്ടിയില്‍ യാത്രവിമാനം തകര്‍ന്നുണ്ടായ അപകടത്തില്‍ മരണസംഖ്യ പതിനഞ്ചായി ഉയര്‍ന്നു. 95 യാത്രക്കാരും അഞ്ച് ജീവനക്കാരുമായിരുന്നു വിമാനത്തില്‍ ഉണ്ടായിരുന്നത്. കുട്ടികള്‍ അടക്കം അറുപതോളം പേര്‍ക്ക് പരിക്കേറ്റിട്ടുണ്ട്. ഇവരെ ആശുപത്രിയില്‍ പ്രവേശിപ്പിച്ചു. പലരുടേയും നിലഗുരുതരമായതിനാല്‍ മരണസംഖ്യ ഉയര്‍ന്നേക്കാമെന്നാണ് റിപ്പോര്‍ട്ട്. വെള്ളിയാഴ്ച പ്രാദേശിക സമയം രാവിലെ 7.22നായിരുന്നു സംഭവം.
അല്‍മാട്ടിയില്‍ നിന്ന് രാജ്യതലസ്ഥാനമായ നൂര്‍സുല്‍ത്താനിലേക്ക് പോയ ബെക് എയര്‍ കമ്പനിയുടെ ഫോക്കര്‍-100 വിമാനമാണ് തകര്‍ന്നത്. അല്‍മാട്ടി വിമാനത്താവളത്തില്‍ നിന്ന് പറന്നുയര്‍ന്ന വിമാനം രണ്ട് നില കെട്ടിടത്തിലേക്ക് തകര്‍ന്നുവീഴുകയായിരുന്നു. പ്രദേശത്ത് രക്ഷാപ്രവര്‍ത്തനം പുരോഗമിക്കുകയാണ്. അപകടത്തെക്കുറിച്ച് അന്വേഷിക്കാന്‍ പ്രത്യേക കമ്മീഷനെ സര്‍ക്കാര്‍ നിയോഗിച്ചു. മോശം കാലാവസ്ഥയാണ് അപകടകാരണമെന്നാണ് സൂചന.