സൗദി അറേബിയയിൽ രാത്രി ജോലി ചെയ്യുന്നവർക്ക് പുതിയ ഇളവുകൾ അനുവദിച്ചുകൊണ്ട് സൗദി തൊഴിൽ മന്ത്രാലയം. നൈറ്റ് ഷിഫ്റ്റുകളില്‍ ജോലി ചെയ്യുന്ന തൊഴിലാളികൾക്ക് ആനുകൂല്യങ്ങളും ജോലിയിലെ ഇളവുകളും നൽകുന്ന തൊഴിൽ മന്ത്രാലയത്തിന്റെ പുതിയ തീരുമാനം ബുധനാഴ്ച മുതൽ ആണ് പ്രാബല്യത്തിൽ വന്നത്. രാത്രി 11 മുതല്‍ രാവിലെ ആറ് വരെ ജോലി ചെയ്യുന്നവരാണ് നിയമത്തിന്‍റെ പരിധിയിൽ ഉൾപ്പെടുന്നത്.

തൊഴില്‍, സാമൂഹിക വികസന മന്ത്രി എൻജി. അഹമ്മദ് അല്‍രാജ്ഹി ഒക്ടോബറിൽ ഇത് സംബന്ധിച്ച ഉത്തരവ് പുറപ്പെടുവിച്ചിരുന്നു. മുഴുവൻ സമയവും പ്രവര്‍ത്തിക്കുന്ന വ്യാപാര സ്ഥാപനങ്ങളിലെ രാത്രി ജീവനക്കാർക്കാണ് നിയമത്തിന്റെ ആനുകൂല്യങ്ങൾ ലഭിക്കുന്നത്. ആരോഗ്യപരമായ പ്രയാസങ്ങളുള്ളവരെ രാത്രി ജോലിക്ക് നിയോഗിക്കരുതെന്നും പുതിയ നിയമപ്രകാരമുള്ള വ്യവസ്ഥയിൽ പറയുന്നു. രാത്രി ജോലി ചെയ്യുന്ന തൊഴിലാളികൾക്ക് ഭക്ഷണം ലഭ്യമാക്കണമെന്നും ഗതാഗത സൗകര്യം ലഭ്യമല്ലാത്ത സാഹചര്യത്തിൽ സൗകര്യമേര്‍പ്പെടുത്തുകയോ ആവശ്യമായ അലവന്‍സ് അനുവദിക്കുകയോ വേണമെന്നും നിയമം വ്യവസ്ഥ ചെയ്യുന്നു. മൂന്നുമാസം രാത്രി ജോലി പൂര്‍ത്തീകരിച്ച ശേഷവും അതേ തൊഴിലാളിയെ വീണ്ടും രാത്രി ജോലിക്ക് നിയമിക്കണമെങ്കിൽ തൊഴിലാളിയില്‍ നിന്ന് രേഖാമൂലം സമ്മതം നേടിയിരിക്കണം എന്നും പുതിയ നിയമത്തിൽ പറയുന്നു.