ഇറാന്‍ അമേരിക്കക്കാരെയോ അമേരിക്കന്‍ താല്‍പര്യങ്ങളേയോ ആക്രമിച്ചാല്‍ കനത്ത തിരിച്ചടി നല്‍കുമെന്ന ഭീഷണിപ്പെടുത്തി യുഎസ് പ്രസിഡന്റ് ഡോണള്‍ഡ് ട്രംപ്.' ഉയര്‍ന്ന തലത്തിലുള്ള' 52 ഇറാനിയന്‍ ലക്ഷ്യങ്ങള്‍ ആക്രമിക്കുമെന്നാണ് ട്രംപ് ഭീഷണി മുഴക്കിയിരിക്കുന്നത്. സുലൈമാനിയെ വധിച്ചതിനു പ്രതികാരം ചെയ്യുമെന്ന് ഇറാന്‍ വ്യക്തമാക്കിയിരുന്നു.
ഇന്നലെ രാത്രി ഇറാഖി തലസ്ഥാനമായ ബഗ്ദാദിലെ ഗ്രീന്‍സോണില്‍ സ്ഥിതി ചെയ്യുന്ന യുഎസ് എംബസിയേയും വടക്കന്‍ ഇറാക്കിലെ യുഎസ് സൈനിക താവളത്തേയും ലക്ഷ്യമിട്ട് വ്യോമാക്രമണം നടന്നിരുന്നു. യുഎസ് എംബസിക്കു സമീപവും വടക്കന്‍ ഇറാഖിലെ ബലാദ് സൈനിക താവളത്തിനു നേരെയുമാണ് ആക്രമണമുണ്ടായത്. ജനറലിന്റെ മരണത്തെ തുടര്‍ന്ന് യുഎസിന്റെ കേന്ദ്രങ്ങള്‍ക്കു നേരെ ആക്രമണം നടത്തുമെന്ന് ഇറാന്‍ ധൈര്യത്തോടെ പറയുന്നു.
യുഎസ് 52 ഇറാനിയന്‍ സൈറ്റുകള്‍ തിരിച്ചറിഞ്ഞിട്ടുണ്ട്. ചിലത് ഇറാനും ഇറാന്‍ സംസ്‌കാരത്തിനും തന്നെയും വളരെ പ്രധാനപ്പെട്ടവയാണ്. ടെഹ്റാന്‍ യുഎസിനെ ആക്രമിച്ചാല്‍ ഇവയെ വളരെ വേഗത്തിലും കഠിനമായും ബാധിക്കും- ട്രംപ് ട്വീറ്റ് ചെയ്തു. ഇറാനിലെ യുഎസ് എംബസി വളഞ്ഞ് ഉദ്യോഗസ്ഥരെ ബന്ദികളാക്കിയ സംഭവുമായി ബന്ധപ്പെട്ടാണ് 52 ഇറാനിയന്‍ സൈറ്റുകളെന്ന് ട്രംപ് സൂചിപ്പിച്ചതെന്നാണ് കരുതുന്നത്.