ബ്രിട്ടീഷ് രാജകുടുംബത്തില്‍ അസ്വാരസ്യങ്ങളുണ്ടെന്ന ഗോസിപ്പുകള്‍ പ്രചരിക്കുന്നതിനിടെ കഴിഞ്ഞദിവസം വാര്‍ത്താക്കുറിപ്പിലൂടെ ഹാരി രാജകുമാരന്‍ നടത്തിയ പ്രഖ്യാപനം ബ്രിട്ടനെയും രാജകുടുംബത്തെയും ഞെട്ടിച്ചിരിക്കുകയാണ്. രാജകുടുംബാംഗമെന്ന നിലയില്‍ വഹിക്കുന്ന ഔദ്യോഗിക പദവികള്‍ ഉപേക്ഷിക്കുകയാണെന്നാണ് ബ്രിട്ടനിലെ ഹാരി രാജകുമാരനും ഭാര്യ മെഗന്‍ മെര്‍ക്കലും പ്രഖ്യാപിച്ചിരിക്കുന്നത്.

യുഎസിലും ബ്രിട്ടനിലുമായി സ്വകാര്യജീവിതം നയിക്കുകയാണ് ലക്ഷ്യമെന്നും രാജകീയ ഉത്തരവാദിത്തങ്ങളില്‍ നിന്നും ഒഴിവായി കൂടുതല്‍ സാമ്പത്തിക സ്വാതന്ത്ര്യം അനുഭവിക്കുകയാണ് ലക്ഷ്യമെന്നും ദമ്പതികള്‍ പറയുന്നു. മകന്‍ ആര്‍ച്ചിയോടൊപ്പം ചേര്‍ന്ന് കൂടുതല്‍ സ്വാതന്ത്രത്തോടെ ജീവിക്കാനാണ് തീരുമാനമാനമെന്നാണ് വ്യക്തമാക്കിയിരിക്കുന്നത്.

ഡ്യൂക്ക് ആന്‍ഡ് ഡച്ചസ് ഓഫ് സസെക്‌സ് എന്ന ഔദ്യോഗിക പദവിയാണു ഹാരി-മെഗന്‍ ദന്പതികള്‍ക്കുള്ളത്. ബ്രട്ടീഷ് റോയല്‍ എയര്‍ഫോഴ്‌സിലും ജോലിചെയ്യുന്ന ഹാരി നിരവധി സന്നദ്ധസംഘടനകളുടെ രക്ഷാധികാരിയായും പ്രവര്‍ത്തിക്കുന്നുണ്ട്. ബ്രിട്ടനിലെ എലിസബത്ത് രാജ്ഞിയുടെ ചെറുമകനും ചാള്‍സ് രാജകുമാരന്റയും അന്തരിച്ച ഡയാന രാജകുമാരിയുടെയും രണ്ടാമത്തെ മകനുമാണ് ഹാരി.

രണ്ടുവര്‍ഷം മുമ്പാണ് ഹോളിവുഡ് നടിയും മോഡലുമായ മെഗന്‍ മെര്‍ക്കലിനെ ഹാരി വിവാഹം ചെയ്തത്. ഇതിനുശേഷം സഹോദരന്‍ വില്യമുവായുള്ള ഹാരിയുടെ ബന്ധം മോശമായതായി പ്രചാരണങ്ങളുണ്ടായിരുന്നു. രാജകീയപദവി ഉപേക്ഷിക്കാന്‍ ഇതും കാരണമായതായി പറയപ്പെടുന്നു. എലിസബത്ത് രാജ്ഞിയോടോ പിതാവ് ചാള്‍സ് രാജകുമാരനോടോ ആലോചിക്കാതെയാണു രാജകീയ പദവികള്‍ ഉപേക്ഷിക്കുകയാണെന്ന പ്രഖ്യാപനം ഹാരി നടത്തിയത്.